Read Hmong Njua Yelemis 12 Bible Online

Yelemis 12 - Hmong Njua bible

Yelemis 12

¹“Tug TSWV, yog kuv ua plaub rua koj; koj yuav yog tug kws yeej xwb. Tabsis kuv xaav nug koj txug txujkev ncaaj nceeg. Vim le caag cov tuabneeg sab phem tsuas muaj vaammeej zuj zug xwb? Vim le caag cov tuabneeg sab tsi ncaaj ua dlaabtsi los tav?

²Koj yog tug cog puab, puab txhaj nrhau caag; puab luj hlub hab tawg paaj txi txiv. Puab naj nub has koj lub npe, tabsis puab lub sab tsi npuab koj.

³Tabsis tug TSWV, koj paub kuv zoo; koj pum ntsoov tej kws kuv ua hab paub has tas, kuv hlub koj npaum le caag. Thov koj ntab cov tuabneeg sab phem nuav moog ib yaam le tug yaaj kws luas caab moog tua; koj zuv rawv puab moog txug thaus luas muab puab tua lawm.

⁴Yuav ca peb lub tebchaws qhuav, hab tej nroj tsuag huv peb tej laj teb ntsws moog txug thaus twg? Tej tsaj hab tej noog tuag taag vim tej kev phem kev qas kws peb cov tuabneeg ua; puab has tas, ‘Vaajtswv yeej tsi paub tej kws peb ua.’ ”

⁵Tug TSWV has tas, “Yelemis, yog koj nrug cov tuabneeg nuav sis tw, koj tub qaug zug lawm koj yuav ua le caag nrug neeg sis tw dlha? Yog has tas koj tub tsi tau luag nyob huv tej taj nraag nuav, koj yuav ua le caag tau luag nyob huv lub haav zoov ntawm ntug dlej Yauladees?

⁶Txawm yog koj tej kwvtij hab koj tsev tuabneeg los ntxeev sab rua koj; puab ua ib nqaag tawmtsaam koj. Txawm yog puab yuav has lug zoo npaum twg rua koj los koj tsi xob tso sab rua puab.”

⁷Tug TSWV has tas, “Kuv tso cov Yixalayees tseg lawm; kuv tsi leeg paub tsaav tuabneeg kws kuv xaiv. Kuv muab tsaav tuabneeg kws kuv hlub cob rua puab cov yeebncuab teg.

⁸Tsaav tuabneeg kws kuv xaiv ntxeev sab rua kuv; puab nyooj rua kuv ib yaam le tug tsuv ntxhuav nyooj huv haav zoov; vim le ntawd kuv txhaj ntxub puab.

⁹Tsaav tuabneeg kws kuv xaiv zoo ib yaam le tug noog kws tej dlaav yaa txhua phaab tuaj muab. Ca le hu tej tsaj qus tuaj nrug noj!

¹⁰Ntau tug numtswv txawv tebchaws tuaj rhuav kuv lub vaaj txiv maab puamtsuaj taag; puab tuaj tsuj kuv tej teb ua lwj ua lam; puab ua rua lub tebchaws kws kuv hlub ua suabpuam taag.

¹¹Puab ua rua kuv lub tebchaws nyob qhuav nkuag ca; lub tebchaws quaj saib ntsoov kuv; thoob plawg lub tebchaws ua suabpuam taag, tsi muaj leejtwg quavntsej le.

¹²Cov tuabneeg fuab noj fuab haus tuaj nyob puv nkaus sau tej roob suabpuam. Kuv txhaj tso kev tsuv kev rog tuaj rhuav lub tebchaws kuas puamtsuaj taag; tsi muaj leejtwg tau nyob kaaj sab lug le.

¹³Kuv tsaav tuabneeg cog nplej, tabsis puab sau tau txhauv xwb; puab rau sab ua num, tabsis puab tsi tau ib yaam dlaabtsi le. Tub yog vim kuv txujkev chim, puab txhaj tsi muaj qoob sau.”

¹⁴Tug TSWV has tas, “Kuv muaj lug yuav has rua tej tsaav tuabneeg kws nyob ibncig cov Yixalayees lub tebchaws kws ua rua lub tebchaws kws kuv muab rua cov Yixalayees puamtsuaj lawm. Kuv yuav tshem cov tuabneeg sab phem ntawd tawm huv puab tej tebchaws moog ib yaam le luas dlob nroj povtseg, hab kuv yuav cawm cov Yudas kuas dlim ntawm puab cov yeebncuab teg.

¹⁵Tabsis tom qaab kws muab puab tshem tawm lawm, kuv yuav rov hlub puab. Kuv yuav coj txhua tsaav tuabneeg rov moog nyob huv puab tej tebchaws.

¹⁶Yog puab ntseeg hab ua lawv le kuv tsaav tuabneeg txuj kevcai kawg sab kawg ntsws, hab tuav kuv lub npe coglug has tas, ‘Tug TSWV muaj sa nyob,’ ib yaam le puab kuas kuv tsaav tuabneeg tuav Npa-aas lub npe coglug, puab txhaj yuav muaj feem nrug kuv tsaav tuabneeg nyob ua ke hab vaammeej.

¹⁷Tabsis yog ib tsaav tuabneeg twg tsi noog kuv lug, kuv yuav tshem tsaav tuabneeg ntawd hab ua kuas puab puamtsuaj. Kuv yog tug TSWV kws has le ntawd.”