Read Hmong Njua Yelemis 14 Bible Online

Yelemis 14 - Hmong Njua bible

Yelemis 14

¹Tug TSWV qha rua kuv txug ntuj qhua teb nkig has tas,

²“Yudas taabtom quaj ntsuag; nwg tej nroog puamtsuaj taag, nwg tej pejxeem dlaa huv aav hab ntxhuv sab kawg, hab Yeluxalees quaj thov kev paab.

³Cov tuabneeg npluanuj khaiv puab tej tubkhai moog nqaa dlej; cov tubkhai moog rua ntawm tej qhov kws khawb tog dlej naag, tabsis tsi muaj dlej; puab nqaa thoob qhuav rov qaab lug tsev puab qaug zug hab ntxhuv sab heev puab txhaj muab ntaub kauv ntsejmuag.

⁴Vim tsi muaj naag lug, puab lub tebchaws txhaj qhuav heev, cov tuabneeg ua laj ua teb ntxhuv sab kawg, puab txhaj muab ntaub kauv puab ntsejmuag.

⁵Txawm yog tug maum muaslwj huv haav zoov kws nyavnyuas yug tau mivnyuas los ca le muab tug mivnyuas tso tseg vim tsi muaj zaub noj.

⁶Tej neeg luav qus sawv sau tej ncov roob kws dlo dlus; hab ua paa txug sav qhe ib yaam le tej maa; tej neeg luav ntawd tsaus muag tsi pum kev vim tsi muaj zaub noj.

⁷Kuv tsaav tuabneeg quaj thov kuv has tas, ‘Tug TSWV, txawm yog peb tej kev txhum tawmtsaam peb, los thov koj paab peb lawv le koj tau coglug tseg lawm. Peb tau tso koj tseg ntau zag, peb tau ua txhum rua koj tag.

⁸Tug TSWV, koj yog cov Yixalayees lub chaw vaamkhom; koj yog tug kws paab peb dlim kev puamtsuaj. Vim le caag koj ua ib yaam le tug qhua kws nyob huv peb lub tebchaws, hab ib yaam le tug tuabneeg taug kev kws pw ib mos xwb?

⁹Vim le caag koj zoo ib yaam le tug tuabneeg kws ceeb ib plhaw, hab zoo ib yaam le tug tubrog kws paab tsi tau leejtwg le. Tabsis tug TSWV, koj tseem nrug nraim peb! Peb yog koj tsaav tuabneeg, thov koj tsi xob tso peb tseg.’ ”

¹⁰Tug TSWV has txug tsaav tuabneeg nuav tas, “Puab nyam tso kuv tseg hab puab tsi tswj puab lub sab le, yog le ntawd, kuv txhaj tsi txaus sab rua puab. Kuv yuav ncu ntsoov puab tej kev txhum hab rau txim rua puab, vim tej kev txhum kws puab ua.”

¹¹Tug TSWV has rua kuv tas, “Koj tsi xob thov kuv paab cov tuabneeg nuav.

¹²Txawm yog puab yoo mov thov kuv los kuv yuav tsi noog puab tej lug thov; txawm yog puab tua tsaj hab muab nplej tuaj hlawv fij rua kuv los kuv yuav tsi txaus sab rua puab. Kuv yuav tua kuas puab tuag taag rua huv tshaav rog, hab ca puab tuag tshaib tuag nqhes, tuag mob tuag ntsaaj.”

¹³Kuv has rua tug TSWV has tas, “Tug TSWV kws kaav ib puas tsaav yaam, koj yeej paub has tas cov cev koj lug taabtom has rua suavdlawg tas, yuav tsi muaj kev tsuv kev rog hab tsi muaj kev tshaib kev nqhes le lawm, rua qhov koj tau coglug has tas peb lub tebchaws yuav muaj kev thaajyeeb xwb.”

¹⁴Tabsis tug TSWV teb has tas, “Cov cevlug tuav kuv lub npe has lug dlaag xwb; kuv tsi tau khaiv puab moog lossis kuv tsi tau kuas puab moog qha lossis tsi tau has ib lus rua puab le. Tej ywgtoog kws puab has ntawd tsi yog lug ntawm kuv; tej kws puab qha tshwm ntawd tsi muaj qaabhau, yog puab xaav xwb.

¹⁵Kuv kws yog tug TSWV yuav qha rua koj paub tej kws kuv yuav ua rua cov cevlug kws kuv tsi tau khaiv puab moog, puab ca le tuav kuv lub npe qha rua suavdlawg has tas, yuav tsi muaj kev tsuv kev rog hab kev tshaib kev nqhes lug raug lub tebchaws nuav ib zag le lawm. Kuv yuav tso kev tsuv kev rog hab kev tshaib kev nqhes lug raug cov tuabneeg ntawd.

¹⁶Cov tuabneeg kws nov cov cevlug ntawd qha, yuav tuag taag rua kev tsuv kev rog hab kev tshaib kev nqhes ib yaam nkaus. Luas yuav muab puab tej cev tuag pov rua ntawm tej ntug kev huv lub nroog Yeluxalees, hab yuav tsi muaj tuabneeg muab puab log. Tej xwm nuav yuav lug raug puab hab puab tej quaspuj mivnyuas huv tuabsi. Kuv yuav ua kuas puab tau ris tej kev phem kev qas kws puab tau ua taag lug lawm.”

¹⁷Tug TSWV kuas kuv pav kuv tej kev ntxhuv sab rua suavdlawg noog has tas: “Ca kuv quaj taag moog le, ca kuv lub kua muag lug taag nub taag mo; rua qhov kuv tsaav tuabneeg mob txomnyem ntsuav hab puab raug luas tsimtxom lwj sab kawg le.

¹⁸Thaus kuv tawm moog rua tom tej nraag laj, kuv pum tej tuabneeg kws raug luas tua tuag pawg lug. Thaus kuv moog rua huv tej nroog, kuv pum tej tuabneeg tuag tshaib pawg lug. Cov povthawj hab cov cevlug rau sab ntso ua num, tabsis puab tsi paub has tas puab ua dlaabtsi.”

¹⁹Tug TSWV, koj tso cov Yudas tseg lawm tag los? Puas yog koj ntxub cov tuabneeg kws nyob huv Xi-oos? Ua caag koj yuav ntaus peb saab ua luaj, tsi muaj nub khu tau le? Peb nrhav kev thaajyeeb, tabsis tsi tau qhov zoo le; peb ca sab has tas peb tej mob yuav zoo, tabsis yimfuab txhawj ntshai.

²⁰Tug TSWV, peb tau ua txhum rua koj lawm tag; peb leeg peb hab peb cov yawmkoob tej kev txhum rua koj.

²¹Thov ncu ntsoov koj tej lug cog tseg hab tsi xob ntxub peb. Thov koj tsi xob ca luas ua saib tsi taug lub nroog Yeluxalees, lub nroog ntawd yog koj lub zwmtxwv kws ci ntsaa ab. Thov koj tsi xob rhuav tej lug kws koj cog tseg rua peb lawm.

²²Lwm tsaav tuabneeg tej mlom ua tsi tau kuas naag lug; lub ntuj los yeej ua tsi tau kuas naag lug. Tug TSWV kws yog peb tug Vaajtswv, peb ca sab rua koj xwb, Tsuas yog koj tuab leeg txhaj yog tug kws ua tau tej nuav.