Read Hmong Njua Yelemis 15 Bible Online

Yelemis 15 - Hmong Njua bible

Yelemis 15

¹Tug TSWV has rua kuv tas, “Txawm yog Mauxes hab Xamuyees sawv ntawm nuav thov kuv los kuv yuav tsi hlub cov tuabneeg nuav le. Ca le ntab puab moog; kuv tsi xaav pum puab lawm.

²Thaus puab nug koj has tas, ‘Peb yuav moog qhov twg?’ Koj ca le qha kuv tej lug rua puab has tas, ‘Cov kws yuav tuag mob tuag ntsaaj yeej yuav tuag mob tuag ntsaaj; cov kws yuav tuag rua nav ntaaj nav rag, yeej yuav tuag rua nav ntaaj nav rag; cov kws yuav tuag rua kev tshaib kev nqhes, yeej yuav tuag rua kev tshaib kev nqhes; cov kws yuav raug luas nteg, yeej yuav raug luas nteg.’”

³“Kuv kws yog tug TSWV tau txav txim sab tso plaub yaam kev puamtsuaj lug raug puab: puab yuav tuag rua nav ntaaj nav rag, dlev yuav muab puab hai moog, noog yuav lug noj puab lub cev, hab tej tsaj qus yuav lug khee noj puab tej nqaj kws seem.

⁴Kuv yuav ua kuas txhua tsaav tuabneeg huv nplajteb nuav ntshai puab, vim tej kws Hexekiyas tug tub Manaxes kws ua vaajntxwv kaav tebchaws Yudas ua huv lub nroog Yeluxalees.”

⁵Tug TSWV has tas, “Cov tuabneeg kws nyob huv Yeluxalees, leejtwg txhaj yuav hlub mej, hab leejtwg txhaj yuav nrug mej tu sab? Leejtwg yuav tog taug nug has tas, mej nyob le caag lawm?

⁶Tug TSWV has tas, mej tau tso kuv tseg lawm, mej tig nrausqaum rua kuv. Vim le ntawd kuv txhaj ntaus mej, rua qhov kuv tswj tsi tau kuv txujkev chim lawm!

⁷Kuv yuav muab mej ntab tawm ntawm txhua lub nroog huv lub tebchaws nuav moog; ib yaam le cua ntsawj tej quavnyaab. Kuv yuav ua rua mej kws yog kuv tsaav tuabneeg kuas puamtsuaj, kuv tua mej tej mivnyuas, vim mej tsi tso mej tej kev txhum tseg.

⁸Tej puj ntsuag kws nyob huv mej lub tebchaws tseem ntau tshaaj tej xuabzeb ntawm ntug havtxwv. Kuv tua mej tej tub kws tseem hluas hab ua rua puab nam quaj quas ntsuag. Kuv yuav tso kev siv kev npug hab sub tawg sub ntshaa lug raug puab thaus puab tsi nwm le.

⁹Leej nam kws muaj xyaa tug mivnyuas tuag huv tuabsi lawm nwg yuav ca le tsi ncu qaab hab ua tsi taug paa. Txawm yog nruab nub nrig los yuav tsaus ntuj nti rua nwg; nwg yuav poob ntsejmuag hab mob sab kawg le. Kuv yuav ca mej tej yeebncuab tuaj tua mej cov kws tseem ua neej nyob, Kuv yog tug TSWV kws has le ntawd.”

¹⁰Kuv yog tug tuabneeg kws tsi muaj kev kaaj sab le! Vim le caag kuv nam txhaj yug kuv rua huv lub nplajteb nuav? Kuv txhaj tau nrug txhua tug tuabneeg huv lub tebchaws nuav sis caav sis tshe? Kuv tub tsi tau txais nyaj ntawm leejtwg lossis qev nyaj rua leejtwg; tabsis txhua tug foom tsi zoo rua kuv!

¹¹Tug TSWV, yog has tas kuv tsi ua koj teg num kawg sab kawg ntsws, yog kuv tsi tau thov koj paab kuv tej yeebncuab thaus puab raug kev txomnyem nyuaj sab, ces ca puab tej lug foom tsi zoo raug kuv.

¹²(Tsi muaj leejtwg luv tau cov hlau xyaw tooj kws luas coj saab qaumteb tuaj.)

¹³Tug TSWV has rua kuv tas, “Vim kuv tsaav tuabneeg ua kev txhum thoob tebchaws, kuv txhaj rau txim rua puab kws yog tso yeebncuab tuaj fuab puab tej nyaj tej kub.

¹⁴Kuv yuav ca puab moog ua puab cov yeebncuab qhev nyob rua huv lub tebchaws kws puab tsi tau paub dlua le, rua qhov kuv txujkev chim zoo ib yaam le lub cubtawg hab yuav kub moog ibtxhis.”

¹⁵Kuv teb has tas, “Tug TSWV, koj yeej paub txhua yaam. Thov koj ncu ntsoov kuv hab paab kuv! Thov koj ua pauj rua cov tuabneeg kws tsimtxom kuv. Koj tsi xob ua sab ntev rua puab, nyob tsaam puab tuaj tua tau kuv. Thov ncu ntsoov has tas vim koj teg num, kuv txhaj raug tej kev txomnyem nuav.

¹⁶Tug TSWV kws yog Vaajtswv tug muaj Fwjchim Luj kawg nkaus, kuv yog koj tug, kuv noog tej lug kws koj has rua kuv, koj tej lug nyob huv kuv lub sab, ua rua kuv kaaj sab hab zoo sab kawg.

¹⁷Kuv tsi muaj sijhawm moog nrug luas ua kev lomzem hab tso dlaaj tso luag le, kuv noog koj lug, kuv txhaj moog nyob tuab leeg ua rua kuv chim sab heev.

¹⁸Vim le caag kuv txhaj muaj tej kev nyuaj sab nuav? Vim le caag kuv tej qhov txhaab pheej fuam luj zuj zug? Vim le caag txhaj khu tsi zoo le? Puas yog koj xaav ua kuas kuv zoo le lub haav qhuav kws tsi muaj dlej lub caij ntuj qhua?”

¹⁹Tug TSWV teb has tas, “Yog koj rov lug cuag kuv, kuv yuav pub koj ua kuv tug tubkhai dlua. Yog koj has lug tseeb tsi has lug dlaag, koj yuav rov tau ua kuv tug cevlug dlua. Tej tuabneeg yuav rov tuaj cuag koj, tsi taag koj yuav moog cuag puab.

²⁰Kuv yuav ua kuas koj tawv ib yaam le tug ntsaa yeej tooj thaiv tsaav tuabneeg nuav, txawm yog puab tawmtsaam koj los puab yuav kov tsi yeej. Kuv yuav nrug nraim koj hab tsomkwm koj kuas koj tau nyob kaaj sab lug.

²¹Kuv yuav cawm koj kuas dlim ntawm cov tuabneeg sab phem hab limham lub fwjchim. Kuv yog tug TSWV kws has le ntawd.”