Read Hmong Njua Yelemis 16 Bible Online

Yelemis 16 - Hmong Njua bible

Yelemis 16

¹Tug TSWV rov has rua kuv tas,

²“Koj tsi xob yuav quaspuj lossis yug mivnyuas rua huv thaaj chaw kws zoo le nuav.

³Kuv yuav qha kuas koj paub tej xwm kws yuav muaj lug raug cov mivnyuas kws yug rua ntawm thaaj chaw nuav hab puab nam puab txiv.

⁴Puab yuav raug tej mob phem tuag taag, hab yuav tsi muaj leejtwg nyav lossis log puab. Puab tej cev tuag yuav lwj ua tej pawg le tej quav nyuj rua sau npoo aav. Puab yuav raug nav ntaaj nav rag tuag lossis tuag tshaib tuag nqhes. Tej noog hab tej tsaj qus yuav lug noj puab.

⁵“Koj tsi xob moog rua huv lub tsev kws muaj kev quaj kev nyav. Koj tsi xob nyav leejtwg le. Kuv yuav tsi foom koob moov rua kuv tsaav tuabneeg kuas nyob kaaj sab lug lossis hlub hab taabncuab puab le.

⁶Tug npluanuj hab tug pluag los yeej yuav tuag taag rua huv lub tebchaws nuav, yuav tsi muaj leejtwg nyav puab lossis coj puab moog log le. Tsi muaj leejtwg kws nwg yuav muab nwg hlais lossis chais nwg tej plaubhau qha has tas nwg quaj ntsuag.

⁷Tsi muaj leejtwg paab leg kev noj kev haus rua tsev tuabneeg kws muaj kev pluj tuag hab nplig puab sab. Tsi muaj leejtwg hlub tug kws nam txiv tuag taag tso nwg tseg.

⁸“Tsi xob moog rua huv lub tsev kws muaj rooj noj rooj haus. Tsi xob moog nrug puab nyob lossis noj haus le.

⁹Koj ca le noog tug TSWV kws yog cov Yixalayees tug Vaajtswv kws muaj Fwjchim Luj kawg nkaus tej lug. Kuv yuav ua kuas tej suab lomzem zoo sab hab kev noj tshoob haus kug ntsag moog. Cov tuabneeg tam nuav qhovmuag yuav pum ntsoov tej ntawd.

¹⁰“Thaus koj qha tej nuav rua puab taag, puab yuav nug koj has tas, ‘Vim le caag tug TSWV txhaj rau txim nyaav ua luaj rua peb? Peb tej kev txhum yog dlaabtsi? Peb tau ua txhum dlaabtsi tawmtsaam tug TSWV kws yog peb tug Vaajtswv?’

¹¹Koj ca le qha tug TSWV tej lug rua puab has tas, ‘Tub yog vim mej cov yawmkoob tso kuv tseg, moog pe luas tej vaajtswv. Puab tso kuv tseg hab tsi noog kuv tej lug qha.

¹²Mej tseem ua phem tshaaj mej cov yawmkoob hab. Mej txhua tug puavleej tawv ncauj, sab phem hab tsi noog kuv lug le.

¹³Yog le ntawd, kuv yuav muab mej ntab tawm huv lub tebchaws nuav moog rua lub tebchaws kws mej lossis mej cov yawmkoob tsi tau paub dlua le. Nyob huv lub tebchaws ntawd mej yuav tau pe luas tej vaajtswv nruab nub mo ntuj, hab kuv yuav tsi taabncuab mej le.’ ”

¹⁴Tug TSWV has tas, “Tub txug lub sijhawm kws tuabneeg tsi tuav kuv lub npe coglug has tas, Vaajtswv tug kws muaj sa nyob tau coj cov Yixalayees tawm nraag tebchaws Iziv lug,

¹⁵tabsis puab yuav tuav kuv lub npe coglug has tas Vaajtswv tug kws muaj sa nyob tau coj cov Yixalayees kws nyob saab qaumteb hab huv tej tebchaws kws kuv ntab puab moog nyob ntawd rov lug. Kuv yuav coj puab lug moog nyob huv puab lub tebchaws, yog lub tebchaws kws kuv muab rua puab cov yawmkoob lawm. Kuv yog tug TSWV kws has le ntawd.”

¹⁶Tug TSWV has tas, “Kuv yuav tso tej tuabneeg cuab ntseg coob heev tuaj nteg cov tuabneeg nuav. Kuv yuav tso tej tuabneeg tua nqaj tuaj caum puab tua sau tej roob, tej pov roob hab huv tej qhov tsua.

¹⁷Kuv pum txhua yaam kws puab ua, tsi muaj ib yaam kws kuv tsi pum le. Tsi muaj ib yaam dlaabtsi roog tau puab tej kev txhum kuas kuv tsi pum le.

¹⁸Kuv yuav rau txim ob npaug rua puab tej kev txhum hab kev phem kev qas, rua qhov puab txua tej mlom kws tsi muaj sa hab coj tej mlom ntawd lug tso puv tebchaws ua rua kuv lub tebchaws tsi huv lawm.”

¹⁹Tug TSWV, koj yog tug tsomkwm hab txhawb kuv tug zug; thaus kuv raug kev txomnyem nyuaj sab koj paab kuv. Txhua tsaav tuabneeg thoob qaab ntuj yuav tuaj cuag koj hab has tas, “Peb cov yawmkoob tsi muaj dlaabtsi le, tsuas yog tej vaajtswv cuav hab tej mlom kws tsi muaj nqes xwb.

²⁰Tuabneeg tseem tsim tau vaajtswv rua tuabneeg pe hab los? Tej kws tuabneeg txhais teg ua yeej tsi yog Vaajtswv le.”

²¹Tug TSWV has tas, “Yog le ntawd, kuv yuav ua tuab zag ua kuas txhua tsaav tuabneeg pum kuv tug zug hab lub fwjchim, puab txhaj paub has tas kuv yog tug TSWV.”