Read Hmong Njua Yelemis 17 Bible Online

Yelemis 17 - Hmong Njua bible

Yelemis 17

¹Tug TSWV has tas, cov Yudas, luas muab cwjmem hlau sau mej tej kev txhum ca, muab raab txaug kws yog pobzeb muaj nqes txaug rua huv mej lub sab, hab muab suam rua ntawm mej tej ceg kaum thaaj lawm.

²Mej cov tuabneeg pheej moog pe tug mlom Aselas tej thaaj hab tej ncej kws teeb rua huv tej qaab ntoos, sau tej ncov roob,

³hab sau tej roob tom tej taj nraag. Kuv yuav ca mej tej yeebncuab tuaj txeeb mej tej nyaj tej kub, hab qhov txhua chaw, vim tej kev txhum kws mej ua thoob plawg lub tebchaws.

⁴Mej yuav tau tso lub tebchaws kws kuv muab rua mej lawm tseg hab kuv yuav kuas mej moog ua mej cov yeebncuab qhev rua lub tebchaws kws mej yeej tsi tau paub dlua le, rua qhov kuv txujkev chim zoo ib yaam le lub cubtawg kws cig tsi paub tuag le.

⁵Tug TSWV has tas, “Kuv yuav rau txim rua tug tuabneeg kws tsiv tawm ntawm kuv moog, ca sab rua tuabneeg tug zug hab ca sab rua tej tuabneeg kws txawj tuag.

⁶Nwg zoo ib yaam le tsob ntoo kws tuaj tom taj suabpuam kws luj hlub huv tej mojsaab qhua ntawm thaaj aav qaab ntsev kws tsi muaj dlaabtsi tuaj le. Tsi muaj ib yaam dlaabtsi zoo rua nwg le.

⁷“Tabsis kuv yuav foom koob moov rua tug kws ca sab rua kuv.

⁸Nwg zoo ib yaam le tsob ntoo kws tuaj ntawm ntug dlej hab nrhau caag moog rua huv dlej. Txawm yog tshaav ntuj kub los nwg yeej tsi ntshai, rua qhov nwg tej nplooj tsi qhuav tsi ntsws le; txawm yog tsi muaj naag los nwg yeej tsi txhawj; hab nwg yeej tawg paaj txi txiv lawv caij lawv nyoog.

⁹“Leejtwg txhaj paub tau tuabneeg lub sab? Tsi muaj ib yaam dlaabtsi kws txawj dlaag ntxag le tuabneeg lub sab; lub sab ntawd mob luj hab khu tsi zoo le.

¹⁰“Kuv yog tug TSWV kws paub tuabneeg txujkev xaav hab sim tuabneeg lub sab, kuv pub rua txhua tug lawv le nwg lub neej, hab lawv le tej num kws nwg ua.”

¹¹Tug tuabneeg kws tau nyaj lug ntawm kev ua tsi ncaaj, zoo ib yaam le tug noog kws puag tej qai kws tsi yog nwg nteg, thaus nwg ib nraab neej nwg kev npluanuj yuav pluj moog taag, hab thaus kawg nwg yuav yog tug kws ruag tshaaj plawg.

¹²Peb lub Tuamtsev zoo ib yaam le lub zwmtxwv kws ci ntsaa ab nyob sau lub roob sab thaus chivkeeb lug lawm.

¹³Tug TSWV, cov Yixalayees ca sab rua koj nkaus xwb; txhua tug kws tso koj tseg lawm yuav raug kev txaajmuag; puab yuav pluj taag ib yaam le tej npe ntawv kws sau rua ntawm tej moov aav; rua qhov puab tso koj kws yog tug TSWV kws yog lub qhovdlej txhawv tseg lawm.

¹⁴Tug TSWV, thov koj khu kuv, kuv txhaj yuav zoo. Thov cawm kuv, kuv txhaj yuav dlim. Kuv qhuas koj tuab leeg xwb!

¹⁵Tej tuabneeg has rua kuv tas, “Tug TSWV Txujlug nyob qhov twg? Ca le ua kuas tav!”

¹⁶Tabsis tug TSWV, kuv tsi tau txhib kuas koj tso kev puamtsuaj lug raug puab. Kuv tsi tau xaav has tas ib nub twg kuas muaj kev txomnyem lug raug puab. Tug Tswv, koj yeej paub tej nuav; koj paub tej lug kws kuv has.

¹⁷Thov koj tsi xob ua nruj ua tsiv rua kuv; thaus kuv raug kev txhawjxeeb koj yog kuv lub chaw vaamkhom.

¹⁸Tug TSWV, thov koj ua kuas cov tuabneeg kws tsimtxom kuv raug txaajmuag, tabsis thov koj paab cawm kuv. Thov koj ua nruj ua tsiv rua puab, tabsis tsi xob ua rua kuv! Koj ca le tso kev puamtsuaj lug raug puab kuas puab puamtsuaj taag!

¹⁹Tug TSWV has rua kuv tas, “Yelemis, koj ca le moog rua ntawm lub Roojvaag Tuabneeg kws cov Yudas cov vaajntxwv moog rua huv lub nroog hab tawm lug; hab moog rua ntawm tej roojvaag huv lub nroog Yeluxalees qha kuv tej lug rua puab,

²⁰koj qha rua cov vaajntxwv, cov Yudas hab tej tuabneeg txhua tug kws nyob huv lub nroog Yeluxalees kws moog hab lug ntawm tej roojvaag kuas puab ca le noog kuv tej lug.

²¹Koj has rua puab tas, yog puab xaav muaj txujsa nyob, nub Xanpataus kuas puab tsi xob nqaa ib yaam dlaabtsi moog hab lug; puab yuavtsum tsi xob nqaa ib yaam dlaabtsi ntawm lub nroog Yeluxalees tej roojvaag saab nrau lug rua saab huv,

²²lossis nub Xanpataus tsi xob nqaa ib yaam dlaabtsi huv puab tej tsev moog rua saab nrau. Puab yuavtsum tsi xob ua num nub Xanpataus. Puab yuavtsum ceev nub Xanpataus ua nub tseemceeb lawv le kuv tau saamfwm rua puab cov yawmkoob lawm.

²³Puab cov yawmkoob tsi noog kuv lug lossis tsi quavntsej kuv le. Tsi yog le ntawd xwb, puab tseem tawv ncauj; puab tsi noog kuv lug lossis tsi ua lawv le kuv tej lug qha.

²⁴“Koj qha rua puab kuas puab yuavtsum noog kuv tej lug saamfwm. Nub Xanpataus puab tsi xob nqaa ib yaam dlaabtsi tawm ntawm cov roojvaag huv lub nroog moog rua saab nrau. Puab yuavtsum saib nub Xanpataus ua nub tseemceeb, nub ntawd puab tsi xob ua ib yaam num dlaabtsi le.

²⁵Yudas cov vaajntxwv hab cov numtswv yuav moog hab lug ntawm lub nroog Yeluxalees tej roojvaag, muaj meejmom hab fwjchim ib yaam le Vaajntxwv Daviv, hab taagnrho cov pejxeem Yudas hab cov tuabneeg huv Yeluxalees yuav caij neeg, hab tsheb neeg lug puv nkaus huv lub nroog Yeluxalees.

²⁶Tuabneeg yuav tuaj huv cov Yudas tej nroog hab huv tej zog kws nyob puagncig lub nroog Yeluxalees, huv xeem Npeenyamees cheebtsaam aav, tim tej taw roob, sau tej roob sab hab huv tebchaws Yudas saab qaabteb tuaj. Puab yuav coj tej khoom hlawv fij theej txhoj, tej qoobloo, tej tshuaj tsw qaab hab tej khoom fij ua tsaug tuaj rua kuv huv lub Tuamtsev.

²⁷Tabsis puab yuavtsum noog kuv lug hab saib nub Xanpataus ua nub tseemceeb. Nub Xanpataus puab yuavtsum tsi xob nqaa ib yaam dlaabtsi tawm huv lub nroog Yeluxalees tej roojvaag moog rua saab nrau, yog has tas puab tsi noog kuv lug, kuv yuav tso suavtawg hlawv lub nroog Yeluxalees tej roojvaag. Suavtawg yuav kub lub nroog Yeluxalees tej loog hab yuav tsi muaj leejtwg tua tau le.”