Read Hmong Njua Yelemis 18 Bible Online

Yelemis 18 - Hmong Njua bible

Yelemis 18

¹Tug TSWV has rua kuv tas,

²“Koj ca le moog rua nraag tug puab laujkaub aav lub tsev. Kuv muaj lug yuav has rua koj.”

³Yog le ntawd, kuv txhaj moog rua nraag tug puab laujkaub aav lub tsev, kuv pum nwg taabtom puab laujkaub.

⁴Thaus nwg puab ib lub laujkaub twg tsi zoo, nwg txawm rov muab cov aav zuaj puab ua dlua lwm yaam.

⁵Thaus ntawd tug TSWV has rua kuv tas,

⁶“Mej cov Yixalayees, mej xaav has tas kuv tsi muaj cai ua rua mej ib yaam le tug puab laujkaub aav ua rua cov aav nplaum ntawd nua los? Cov aav nplaum nyob huv tug puab laujkaub txhais teg le caag, mej nyob huv kuv txhais teg ib yaam le ntawd.

⁷Yog thaus twg kuv has tas kuv yuav rhu, yuav rhuav lossis yuav ua kuas ib tsaav tuabneeg lossis ib lub tebchaws twg puamtsuaj moog,

⁸tabsis yog tsaav tuabneeg ntawd tso puab tej kev phem kev qas tseg, kuv yuav hloov sab tsi ua lawv le tej lug kws kuv tub has tseg lawm.

⁹Yog kuv has rua ib tsaav tuabneeg lossis ib lub tebchaws twg tas, kuv yuav txhim khu tsaav tuabneeg lossis lub tebchaws ntawd kuas vaammeej,

¹⁰tabsis yog tsaav tuabneeg ntawd ua kev phem kev qas tsi noog kuv lug, kuv yuav hloov sab tsi ua lawv le tej lug kws kuv has.

¹¹Yog le ntawd, koj ca le qha rua cov Yudas hab cov tuabneeg kws nyob huv lub nroog Yeluxalees has tas, kuv taabtom npaaj tawmtsaam hab yuav rau txim rua puab. Koj has kuas puab ca le tso puab tej kev txhum tseg, tig rov lug ua qhov zoo hab xyum ua lub neej tshab.

¹²Puab yuav teb koj has tas, ‘Peb tsi ua le ntawd! Peb yuav tawv ncauj hab ua phem ua qas lawv le peb lub sab nyam.’ ”

¹³Tug TSWV has tas, “Ca le nug txhua tsaav tuabneeg saib puas muaj tuabneeg nov dlua tej xwm nuav los tsi muaj? Cov Yixalayees ua txhum luj kawg le lawm.

¹⁴Puas yog tej hauv roob sab huv tebchaws Lenpanoos yeej ibtxwm muaj dlaus? Puas yog tej dlej kws txhawv txag zag sau tej roob yeej ndlwg tsi tu le?

¹⁵Tabsis kuv tsaav tuabneeg tso kuv tseg; puab moog hlawv tshuaj tsw qaab fij rua tej mlom, puab taug kev moog qhov twg los dlawm puab kutaw; puab tsi ua lawv le tej kevcai thaus u lawm; puab tsi taug kev, puab plos haav faab xwb.

¹⁶Puab ua rua lub tebchaws nuav lamsim taag, luas yuav saib tsi taug lub tebchaws nuav moog ibtxhis; tej tuabneeg kws dlua kev yuav xaav tsi thoob hab cu hau nyo.

¹⁷Kuv yuav ua rua kuv tsaav tuabneeg tawg tsiv ri sua taabmeeg puab tej yeebncuab ib yaam le tej moov aav kws cov cua saab nubtuaj tuaj ntsawj. kuv yuav tig nrausqaum rua puab, thaus puab raug kev puamtsuaj, kuv yuav tsi paab puab.”

¹⁸Thaus ntawd suavdlawg has tas, “Peb ca le tuavhuv tawmtsaam Yelemis. Peb yeej muaj cov povthawj qha peb hab muaj cov tuabneeg kws muaj tswvyim qha tau peb, hab muaj cov cev Vaajtswv lug kws yuav cev Vaajtswv lug rua peb. Peb ca le nrhav lug kom Yelemis, peb tsi xob noog nwg tej lug.”

¹⁹Yog le ntawd, kuv txhaj thov tug TSWV has tas, “Tug TSWV, thov koj noog kuv tej lug thov hab noog tej lug kws cov yeebncuab txobthuam kuv.

²⁰Puab muab kev phem pauj kev zoo los? Puab khawb qhov tog kuv kev. Koj ncu ntsoov has tas, kuv tau tsaa ncauj thov koj kuas txu koj tej kev chim tsi xob rau txim rua puab.

²¹Tug TSWV, nwgnuav thov ca kuas puab tej mivnyuas tuag tshaib tuag nqhes, hab tuag rua nav ntaaj nav rag, ca tej quaspuj nyob ua puj ntsuag tsi muaj quasyawg hab tsi muaj mivnyuas; ca tej quasyawg tuag mob tuag ntsaaj, hab ca tej tub hluas tuag rua huv tshaav rog.

²²Thov koj khaiv ib paab tuabneeg moog fuab puab tej vaaj tse thaus puab tsi nwm kuas puab quaj ntshai tshee nyo. Puab khawb qhov hab cuab muv tog kuv kev.

²³Tug TSWV, koj paub has tas, puab tuavhuv yuav tua kuv povtseg. Thov koj tsi xob tshem puab tej kev txhum lossis zaam txim rua puab le. Thov koj ua kuas puab qaug nrum rug swb hlo, hab rau txim nyaav rua puab thaus koj tseem chim.”