Read Hmong Njua Yelemis 19 Bible Online

Yelemis 19 - Hmong Njua bible

Yelemis 19

¹Tug TSWV kuas kuv moog yuav ib lub hub. Nwg kuas kuv coj cov txwjlaug hab cov povthawj laug qee leej tawm ntawm lub Roojvaag Txhais Laujkaub moog rua tom lub Haav Hinoos hab qha tug TSWV tej lug rua puab.

²Tug TSWV kuas kuv has rua cov Yudas cov vaajntxwv hab cov tuabneeg kws nyob huv lub nroog Yeluxalees has tas, “Mej ca le noog kuv kws yog tug TSWV, cov Yixalayees tug Vaajtswv kws muaj Fwjchim Luj kawg nkaus tej lug. Kuv yuav tso kev puamtsuaj lug rua ntawm thaaj chaw nuav, kuas tej tuabneeg kws nov zaaj nuav xaav tsi thoob.

⁴Kuv yuav ua le nuav, rua qhov suavdlawg tso kuv tseg hab moog tua tsaj hlawv fij rua luas tej vaajtswv ua rua qhov chaw nuav tsi huv lawm. Tej vaajtswv ntawd yog tej kws puab, puab cov yawmkoob hab puab cov vaajntxwv tsi tau paub dlua le. Puab tua tej tuabneeg kws tsi muaj txim ntau leej rua ntawm thaaj chaw nuav,

⁵hab puab teeb ntau lub thaaj rua puab tua puab tej mivnyuas hlawv fij rua Npa-aas. Kuv tsi tau saamfwm kuas puab ua, kuv tsi tau xaav txug tej ntawd le.

⁶Tug TSWV has tas, vim puab ua le ntawd, muaj ib nub twg luas yuav tsi hu thaaj chaw ntawd ua Taufes lossis lub Haav Hinoos lawm, tabsis luas yuav hu ua lub Haav Tua Tuabneeg.

⁷Kuv yuav rhuav cov Yudas hab cov tuabneeg kws nyob huv lub nroog Yeluxalees tej tswvyim rua ntawm thaaj chaw nuav. Kuv yuav ca puab cov yeebncuab kovyeej puab hab muab puab tua tuag taag rua huv tshaav rog. Kuv ca tej noog hab tej tsaj nruab nraag noj puab.

⁸Kuv yuav tso kev puamtsuaj lug rua huv lub nroog nuav. Txhua tug tuabneeg kws dlua kev tuaj pum tej xwm nuav puab yuav poob sab hab xaav tsi thoob le.

⁹Yeebncuab yuav tuaj vij lub nroog hab nrhav kev tua cov tuabneeg kws nyob huv. Vim yeebncuab vij lub nroog, luas zuv nruj heev, ua rua cov tuabneeg nyob huv muaj kev tshaib nqhes hab txomnyem kawg, puab ib leeg yuav tua ib leeg noj hab tua puab tej mivnyuas noj.”

¹⁰Tom qaab ntawd tug TSWV kuas kuv tsoo lub hub taabmeeg cov tuabneeg kws nrug kuv moog ntawd,

¹¹hab kuas kuv qha tug TSWV kws muaj Fwjchim Luj kawg nkaus tej lug rua puab has tas, “Kuv yuav ntaus cov tuabneeg nuav hab rhuav lub nroog nuav ib yaam le muab lub hub nuav tsoo tawg taag, tsi muaj leejtwg yuav muab lub hub nuav rov sis lu tau. Luas yuav coj tej tuabneeg tuag moog log rua huv Taufes, rua qhov tsi muaj lwm thaaj chaw log tuag lawm.

¹²Kuv has rua mej tas, kuv yuav ua rua lub nroog nuav hab cov tuabneeg kws nyob huv ib yaam le ua rua Taufes ntaag.

¹³Tej tsev huv lub nroog Yeluxalees, cov Yudas cov vaajntxwv tej tsev hab sau tej ruv tsev kws cov tuabneeg moog hlawv moov tshuaj tsw qaab fij rua tej nubqub hab laub cawv fij rua luas tej vaajtswv, puavleej tsi huv ib yaam le Taufes.”

¹⁴Tom qaab ntawd kuv txawm tawm huv Taufes, qhov chaw kws tug TSWV khaiv kuv moog qha nwg tej lug lug. Kuv moog sawv ntawm lub tshaav puam kws nyob saab nrau lub Tuamtsev hab qha rua suavdlawg has tas,

¹⁵tug TSWV kws yog cov Yixalayees tug Vaajtswv kws muaj Fwjchim Luj kawg nkaus has tas, “Kuv yuav rau txim rua lub nroog nuav hab tej zog kws nyob ibncig ze nuav lawv le kws kuv tub has tseg lawm, rua qhov mej tawv ncauj hab tsi noog kuv lug.”