Read Hmong Njua Yelemis 20 Bible Online

Yelemis 20 - Hmong Njua bible

Yelemis 20

¹Thaus Imes tug tub Pasehus ua povthawj hab ua tug thawj saib num huv lub Tuamtsev nov kuv has tej lug nuav,

²nwg txawm kuas luas nplawm kuv hab muab saw hlau xauv kuv kutaw ze rua ntawm lub Roojvaag Npeenyamees theem sab ntawm lub Tuamtsev.

³Nub tom qaab thaus sawv ntxuv kws Pasehus tuaj tso kuv, kuv has rua nwg tas, “Tug TSWV tsi tis koj npe hu ua Pasehus. Nwg tis koj npe hu ua ‘Kev Kub Ntxhuv Txhua Qhov.’

⁴Tug TSWV has tas, ‘Kuv yuav ua kuas koj rov ua kev ntxhuv rua koj hab koj tej phoojywg, hab koj yuav pum yeebncuab rhu ntaaj tua koj tej phoojywg txhua tug povtseg. Kuv yuav muab cov Yudas txhua tug cob rua tug vaajntxwv kws kaav tebchaws Npanpiloos teg; nwg yuav coj ibtxha moog rua tim nwg lub tebchaws hab muab ibtxha tua povtseg.

⁵Kuv yuav ca yeebncuab tuaj fuab puab tej nyaj hab tej qhov txhua chaw kws muaj nqes huv lub nroog moog. Txawm yog cov Yudas cov vaajntxwv tej nyaj hab tej qhov txhua chaw los luas yuav coj moog rua tim tebchaws Npanpiloos.

⁶Pasehus, luas yuav nteg koj hab koj tsev tuabneeg moog rua tim tebchaws Npanpiloos hab. Koj yuav tuag hab luas yuav muab koj log nrug koj tej phoojywg kws koj tau dlaag ntxag.’ ”

⁷Tug TSWV, koj tau dlaag kuv, kuv txhaj raug luas dlaag ntxag. Koj muaj zug hab muaj fwjchim tshaaj kuv. Txhua tug saib tsi taug kuv hab luag kuv plig taag nub le.

⁸Thaus twg kuv has lug, kuv yuavtsum tau quaj hab qw has tas, “Kev nruj tsiv! Kev puamtsuaj!” Tug TSWV, luas txobthuam kuv hab muab kuv tso dlaaj tso luag txhua lub sijhawm, vim kuv qha koj txujlug.

⁹Tabsis thaus kuv has tas, “Ca kuv tsi xob xaav txug tug TSWV hab has txug nwg lub npe ntxiv lawm!” Thaus ntawd koj txujlug kub ib yaam le suavtawg huv kuv lub sab tuaj. Kuv ua tag nyaj, tabsis kuv tiv tsi taug ntxiv lawm.

¹⁰Kuv nov suavdlawg sis ntxhi has tas, “Muaj kev kub ntxhuv nyob rua txhua qhov; Peb ca le moog has qha rua tug TSWV kws muaj Fwjchim Luj!” Txawm yog kuv tej phoojywg zoo los puab tog nrhw nkaug kuv. Puab sis thaam has tas, “Tej zag peb yuav ntxag hab nteg tau nwg lug ua pauj tej kws nwg ua rua peb.”

¹¹Tabsis tug TSWV, koj yog tug kws tuaj kuv tog, koj yog tug muaj zug hab muaj fwjchim, cov kws tsimtxom kuv yuav qaug. Puab yuav poob ntsejmuag moog ibtxhis, rua qhov puab nteg tsi tau kuv; puab yuav ncu ntsoov puab txujkev poob ntsejmuag moog ibtxhis.

¹²Tabsis tug TSWV kws muaj Fwjchim Luj kawg nkaus, koj sim tej tuabneeg ncaaj nceeg, koj paub tuabneeg lub sab xaav. Yog le ntawd, kuv muab kuv rooj plaub tso rua koj, thov ca kuv pum koj ua pauj rua kuv cov yeebncuab.

¹³Ca le hu nkauj qhuas tug TSWV! Ca le ua tug TSWV tsaug! Nwg cawm tug kws raug luas tsimtxom dlim ntawm cov tuabneeg sab phem.

¹⁴Ca le foom tsi zoo rua nub kws yug kuv! Tsi xob ncu txug nub kws kuv nam yug kuv!

¹⁵Ca le foom tsi zoo rua tug txivneej kws coj xuv zoo lug qha rua kuv txiv has tas, “Koj tau ib tug tub lawm!” Ua rua kuv txiv zoo sab heev.

¹⁶Ca kuas nwg zoo ib yaam le tej nroog kws tug TSWV muab rhuav puamtsuaj taag tsi taabncuab le. Ca nwg nov tej suab quaj hab suab ntsaaj thaus sawv ntxuv; hab tej suab txhij tubrog sis ntaus sis tua thaus taav su,

¹⁷rua qhov nwg tsi muab kuv tua thaus kuv tseem nyob huv nam plaab. Ca kuv nam lub plaab ua kuv lub ntxaa moog ibtxhis le.

¹⁸Vim le caag ca kuv yug lug raug tej kev txomnyem nyuaj sab, hab ua neej poob ntsejmuag taag moog le xwb?