Read Hmong Njua Yelemis 21 Bible Online

Yelemis 21 - Hmong Njua bible

Yelemis 21

¹Vaajntxwv Xedekiyas kws kaav tebchaws Yudas khaiv Pasehus kws yog Makiyas tug tub hab tug povthawj Xefaniyas kws yog Ma-axeyas tug tub tuaj has rua kuv tas,

²“Thov koj paab wb nug tug TSWV, rua qhov Vaajntxwv Nenpukajnexales kws kaav tebchaws Npanpiloos hab nwg cov tubrog tub tuaj vij peb lub nroog lawm, tej zag tug TSWV yuav ua ib yaam txujci paab peb, hab yuav ua kuas Nenpukajnexales thim rov qaab.”

³Tug TSWV kuas kuv has rua ob tug kws tuaj cuag kuv,

⁴kuas rov moog has rua Xedekiyas has tas, tug TSWV kws yog cov Yixalayees tug Vaajtswv has le nuav: “Xedekiyas, kuv yuav ua kuas koj cov tubrog swb thaus mej moog tua tug vaajntxwv kws kaav tebchaws Npanpiloos hab nwg cov tubrog. Kuv yuav sau koj cov tubrog tej cuabyeej ua rog lug ca rua huv plawv nroog.

⁵Kuv tug zug luj zug nchaav, kev chim, kev npautawg hab kev nruj kev tsiv yuav tawmtsaam mej.

⁶Kuv yuav tua txhua tug kws nyob huv lub nroog nuav tej tuabneeg hab tsaj txhu yuav raug tej kaab mob aws mob ntshaa tuag taag.

⁷Tabsis koj, koj cov numtswv hab cov pejxeem kws dlim nav ntaaj nav rag, dlim kev tshaib kev nqhes hab dlim kev mob aws mob ntshaa, kuv yuav muab mej cob rua Vaajntxwv Nenpukajnexales kws yog mej tug yeebncuab kws xaav muab mej tua povtseg. Nenpukajnexales yuav muab mej tua tuag taag, tsi taabncuab lossis tsi tseg mej ib tug le. Kuv yog tug TSWV kws has le ntawd.”

⁸Tug TSWV kuas kuv has rua cov tuabneeg ntawd has tas, “Mej ca le noog kuv has! Kuv yog tug TSWV. Kuv muab ob yaam rua mej xaiv: saib mej xaiv txujsa lossis txujkev tuag.

⁹Yog leejtwg nyob huv nroog yuav tuag rua nav ntaaj nav rag lossis yuav tuag taag rua kev tshaib kev nqhes lossis tuag rua kev mob kev nkeeg. Tabsis yog leejtwg moog thawj cov tubrog Npanpiloos kws tuaj vij lub nroog, tug ntawd yuav dlim tsi raug tua.

¹⁰Kuv txav txim sab lawm has tas, kuv yuav tsi zaam lub nroog nuav, kuv yuav muab rhuav kuas puamtsuaj taag. Kuv yuav muab lub nroog nuav cob rua tug vaajntxwv kws kaav tebchaws Npanpiloos, ces nwg yuav hlawv lub nroog kuas kub nyab taag. Kuv yog tug TSWV kws has le ntawd.”

¹¹Tug TSWV kuas kuv coj nwg cov lug moog has rua cov Yudas tug vaajntxwv tsev tuabneeg kws yog Daviv cov xeebntxwv has tas, “Mej ca le noog tug TSWV tej lug hab naj nub ua ncaaj nceeg. Ca le paab tug kws raug luas dlaag ntxag. Yog mej tsi ua le ntawd, tej kev phem kev qas kws mej ua, yuav ua rua kuv txujkev chim kub cuag suavtawg tsi muaj leejtwg tua tau.

¹³Lub nroog Yeluxalees, koj nyob sab tshaaj tej haav ib yaam le lub roob tsuas kws sab dlua tej taj nraag. Tabsis kuv yuav tawmtsaam koj. Koj khaav has tas tsi muaj leejtwg yuav tuaj tawmtsaam koj lossis tsoo tau koj tej ntsaa yeej lug rua huv koj lub chaw nyob.

¹⁴Tabsis kuv yuav rau txim rua koj, vim tej kws koj ua. Kuv yuav muab suavtawg hlawv koj lub loog, hab suavtawg yuav kub txhua yaam kws nyob ibncig ntawd. Kuv yog tug TSWV kws has le ntawd.”