Read Hmong Njua Yelemis 22 Bible Online

Yelemis 22 - Hmong Njua bible

Yelemis 22

¹Tug TSWV kuas kuv moog rua huv lub loog hab has rua cov Yudas tug vaajntxwv kws yog Daviv tug xeebntxwv, nwg cov numtswv hab cov pejxeem kws nyob huv lub nroog Yeluxalees, kuas noog tug TSWV tej lug kws has tas,

³“Kuv kws yog tug TSWV, kuv saamfwm kuas mej yuavtsum ua zoo hab ua ncaaj. Mej yuavtsum paab tug kws raug luas dlaag ntxag. Tsi xob quab yuam lossis tsimtxom cov tuabneeg txawv tebchaws, cov mivnyuas ntsuag lossis tej puj ntsuag; hab tsi xob tua cov tuabneeg kws tsi muaj txim rua ntawm qhov chaw dlawbhuv nuav.

⁴Yog mej muab sab rau ua lawv le kuv tej lug nuav, ces Daviv cov xeebntxwv yuav tau ua vaajntxwv kaav tebchaws moog le. Puab, puab cov numtswv hab puab tej pejxeem yuav tau caij neeg hab caij tsheb neeg moog hab lug ntawm lub loog nuav tej roojvaag.

⁵Tabsis yog mej tsi noog kuv tej lug saamfwm, ces kuv qha rua mej has tas, kuv yuav ua kuas lub loog nuav pob puag taag. Kuv yog tug TSWV kws has le ntawd.”

⁶“Kuv saib cov Yudas tug vaajntxwv lub loog zoo nkauj ib yaam le cheebtsaam Nkile-as hab ib yaam le tej Roob Lenpanoos; tabsis kuv yuav ua kuas lub loog nyob qhuav nkuag ca tsi muaj tuabneeg nyob.

⁷Kuv yuav tso tuabneeg tuaj rhuav lub loog kuas puamtsuaj. Puab yuav nqaa taus tuaj ntuv tej ncej cab kws zoo nkauj hab muab hlawv kuas kub nyab taag.

⁸“Tom qaab ntawd tej tuabneeg txawv tebchaws kws dlua kev tuaj yuav sis nug has tas, vim le caag kuv kws yog tug TSWV yuav ua le ntawd rua lub nroog luj nuav?

⁹Ces puab yuav teb has tas, tub yog vim cov Yudas tsi ua lawv le tug TSWV kws yog puab tug Vaajtswv tej lug cog tseg, hab puab moog pe luas tej vaajtswv lawm.”

¹⁰Cov Yudas, mej tsi xob quaj Vaajntxwv Yauxiyas! Thaus nwg tuag mej tsi xob nyav; tabsis mej ca le quaj ntsuag rua Yau-ahas kws yog Yauxiyas tug tub; luas tub nteg nwg coj moog lawm, nwg yuav tsi rov lug pum lub tebchaws kws nwg nam yug nwg ib zag le lawm.

¹¹Tug TSWV has txug Yauxiyas tug tub Yau-ahas kws ua vaajntxwv kaav tebchaws Yudas hloov nwg txiv chaw has tas, “Nwg tawm ntawm nuav moog lawm, yuav tsi tau rov lug le.

¹²Nwg yuav tuag rua huv lub tebchaws kws luas coj nwg moog, hab yuav tsi tau rov lug rua huv lub tebchaws nuav le.”

¹³Tug kws ua nwg lub tsev ntawm lub sab tsi ncaaj, hab txuas nwg lub tsev kuas dlaav ntawm lub sab nkhaus hab nwg yuam tej tub zug ua num tsi them nqe zug rua puab, tug ntawd yuav raug puamtsuaj.

¹⁴Tug kws has tas, “Kuv yuav ua ib lub loog luj rua kuv kuas muaj tej chaav dlaav heev rua tshooj sau.” Yog le ntawd, nwg txhaj ua qhovrais rua nwg lub tsev, muab txag ntoo cab lug xov hab vuam kob lab rua, tug ntawd yuav puamtsuaj.

¹⁵Koj muab ntoo cab lug ua tsev rua koj nyob, koj txawm tau ua tug vaajntxwv kws zoo tshaaj lwm tug nua los? Koj txiv ibtxwm txaus sab rua nwg lub neej; nwg ibtxwm ua ncaaj hab ua zoo hab txhua yaam kws nwg ua puavleej vaammeej.

¹⁶Nwg txav txim ncaaj rua tug txomnyem txhua yaam kws nwg ua puavleej zoo; tug kws ua le nuav txhaj yog tug kws paub Vaajtswv.

¹⁷Tabsis koj tsuas pum koj txhaj yog tug zoo xwb; koj tua cov tuabneeg kws tsi muaj txim hab quab yuam koj tej pejxeem. Tug TSWV yog tug kws has le ntawd.

¹⁸Yog le ntawd, tug TSWV txhaj has txug Yauxiyas tug tub Yehauyakees kws ua vaajntxwv kaav tebchaws Yudas has tas, “Thaus nwg tuag tsi muaj leejtwg nyav lossis has rua nwg tas, ‘Ua caag koj tuag txomnyem ua luaj, kuv tug phoojywg, ua caag koj yuav tuag txomnyem ua luaj le!’ Yuav tsi muaj leejtwg lug kua muag rua nwg lossis quaj has tas, ‘Kuv tug tswv! Kuv tug vaajntxwv!’

¹⁹Luas yuav coj nwg moog log ib yaam le luas hai tug neeg luav moog pov rua saab nrau lub nroog Yeluxalees tej roojvaag.”

²⁰Cov tuabneeg huv lub nroog Yeluxalees, mej ca le moog rua peg tebchaws Lenpanoos hab qw nrov nrov, ca le moog rua huv tebchaws Npasaas hab tsaa suab hlo quaj; ca le moog qw nrov nrov sau tej roob huv tebchaws Mau-am, rua qhov cov kws tuaj mej tog raug puamtsuaj taag lawm.

²¹Tug TSWV has rua koj thaus kws koj tseem vaammeej, tabsis koj tsi noog nwg lug, koj ibtxwm ua koj lub neej le ntawd; koj yeej tsi noog tug TSWV lug le.

²²Cua yuav ntsawj koj tej thawjcoj moog taag, cov kws tuaj koj tog yuav raug luas nteg coj moog; koj yuav poob ntsejmuag hab txaajmuag heev, vim tej kev phem kev qas kws koj tau ua taag lug lawm.

²³Koj tau zoo hab nyob kaaj sab lug huv tej tsev kws muab tej ntoo cab peg tebchaws Lenpanoos lug ua; tabsis koj yuav quaj ntsaaj quas lawg thaus kev mob lug raug koj, ib yaam le tug quaspuj kws mob plaab yug mivnyuas.

²⁴Tug TSWV has rua Vaajntxwv Yehauyakhees kws yog Vaajntxwv Yehauyakees tug tub kws ua vaajntxwv kaav tebchaws Yudas has tas, “Kuv kws yog Vaajtswv tug muaj sa nyob, txawm yog koj yog lub nplhaib homthawj ntawm kuv saab teg xis los kuv yuav muab hle,

²⁵hab muab cob rua cov tuabneeg kws koj ntshai hab xaav muab koj tua povtseg. Kuv yuav muab koj cob rua Vaajntxwv Nenpukajnexales kws kaav tebchaws Npanpiloos hab nwg cov tubrog.

²⁶Kuv yuav ca luas nteg koj hab koj nam kws yug koj moog rua lwm lub tebchaws. Koj yuav moog rua lub tebchaws kws tsi yog qhov chaw yug koj, hab meb yuav tuag rua qhov ntawd.

²⁷Meb yuav xaav rov lug rua lub tebchaws nuav heev, tabsis meb yuav tsi tau rov lug lawm.”

²⁸Kuv has tas, “Puas yog Vaajntxwv Yehauyakhees zoo ib yaam le lub hub tawg kws luas muab povtseg tsi muaj leejtwg xaav yuav le? Tub yog vim le ntawd, nwg hab nwg cov mivnyuas txhaj raug nteg coj moog rua lub tebchaws kws puab tsi tau paub dlua le.”

²⁹Lub tebchaws, lub tebchaws, lub tebchaws! Ca le noog tej lug kws tug TSWV has:

³⁰“Tug txivneej nuav yeej raug foom tsi zoo kuas nwg cov mivnyuas pluj taag, ua ib tug txivneej kws ua dlaabtsi los ua tsi tau le. Nwg yuav tsi muaj xeebntxwv lug kaav lub tebchaws Yudas ib yaam le Daviv muaj xeebntxwv lug hloov nwg chaw. Kuv yog tug TSWV kws has le ntawd.”