Read Hmong Njua Yelemis 23 Bible Online

Yelemis 23 - Hmong Njua bible

Yelemis 23

¹Tug TSWV yuav rau txim rua cov numtswv kws tua nwg tsaav tuabneeg hab ua rua puab tawg ua saab ua sua lawm.

²Ntawm nuav yog tej lug kws tug TSWV kws yog cov Yixalayees tug Vaajtswv has rua cov numtswv kws saib tug TSWV tsaav tuabneeg has tas, “Mej tsi saib kuv tsaav tuabneeg; mej ntab puab tawm, puab txhaj moog nyob ua saab ua sua. Nwgnuav kuv yuav rau txim rua mej vim mej ua phem ua qas.

³Kuv yuav sau kuv tsaav tuabneeg kws tseem nyob huv tej tebchaws kws kuv ntab puab moog nyob rov qaab lug nyob huv puab tej zej zog. Puab yuav muaj tub muaj ki fuamvaam coob heev.

⁴Kuv yuav tsaa kuas muaj numtswv saib kuv tsaav tuabneeg. Puab yuav tsi txhawj tsi ntshai, hab kuv yuav tsi rau txim rua puab ntxiv lawm. Kuv yog tug TSWV kws has le ntawd.”

⁵Tug TSWV has tas, “Muaj ib nub kuv yuav xaiv Daviv cov xeebntxwv ib tug kws ncaaj nceeg ua vaajntxwv. Tug vaajntxwv nuav yuav kaav pejxeem ntse ntsuav, hab nwg yuav ua ncaaj ua nceeg rua suavdlawg thoob plawg lub tebchaws.

⁶Thaus tug vaajntxwv nuav lug kaav lawm, cov Yudas yuav nyob tso sab lug hab cov Yixalayees yuav muaj kev thaajyeeb. Luas yuav hu nwg has tas, ‘Tug TSWV kws yog peb Txujkev Cawm Dlim.’

⁷“Tug TSWV has tas, ‘Muaj ib nub suavdlawg yuav tsi tuav nwg lub npe coglug has tas, Vaajtswv tug kws muaj sa nyob coj peb cov Yixalayees tawm nraag tebchaws Iziv lug,

⁸tabsis puab yuav tuav kuv lub npe coglug has tas, Vaajtswv tug kws muaj sa nyob yog tug coj peb cov Yixalayees tawm huv lub tebchaws kws nyob saab qaumteb hab huv tej tebchaws kws peb raug nteg moog rov qaab lug. Thaus ntawd puab yuav nyob huv puab lub tebchaws.’ ”

⁹Kuv sab ntsws puag taag hab kuv ib ce tshee nyo. Kuv zoo ib yaam le tug tuabneeg kws qaug cawv, zoo ib yaam le tug tuabneeg kws haus cawv txiv maab ntau dlhau lawm.

¹⁰Vim tug TSWV hab nwg tej lug kws dlawbhuv cov tuabneeg kws nyob huv lub tebchaws ua kev nkauj kev nraug tsi muaj ib tug muab sab npuab tug TSWV le; tug TSWV txhaj foom tsi zoo rua lub tebchaws, tej tshaav zaub huv tej taj nraag txhaj qhuav taag, vim puab siv puab lub fwjchim ua kev tsi ncaaj nceeg.

¹¹Tug TSWV has tas, “Cov cevlug hab cov povthawj puavleej tsi ncaaj; kuv pum puab ua kev phem kev qas nyob huv lub Tuamtsev.

¹²Puab taug txujkev nplua hab tsaus ntuj nti; kuv yuav ua kuas puab dlawm qaug. Kuv yuav tso kev puamtsuaj lug raug puab; lub sijhawm kws rau txim rua puab lug txug lawm. Kuv yog tug TSWV kws has le ntawd.

¹³Kuv pum Xamalis cov cevlug tej kev txhum: puab tuav Npa-aas lub npe cevlug rua suavdlawg, hab puab coj kuv tsaav tuabneeg Yixalayees yuam kev lawm.

¹⁴Tabsis kuv pum cov cevlug kws nyob huv lub nroog Yeluxalees, tseem ua kev phem kev qas heev tshaaj; puab ua nkauj ua nraug hab has lug dlaag; puab coj tuabneeg ua kev txhum; vim le ntawd, txhaj tsi muaj ib tug tso kev phem kev qas tseg. Kuv saib puab txhua tug puavleej ua kev phem kev qas, ib yaam le cov tuabneeg kws nyob huv lub nroog Xaudoos hab lub nroog Kaumaulas.

¹⁵“Yog le ntawd, tug TSWV kws muaj Fwjchim Luj kawg nkaus txhaj has rua cov cevlug kws nyob huv lub nroog Yeluxalees le nuav tas: Kuv yuav muab tej nroj kws ab heev rua puab noj hab muab tej tshuaj lom rua puab haus, rua qhov puab tau ua kev phem kev qas thoob plawg lub tebchaws.”

¹⁶Tug TSWV kws muaj Fwjchim Luj kawg nkaus has rua cov tuabneeg kws nyob huv Yeluxalees has tas “Mej tsi xob noog cov cevlug cuav has, puab tsuas qha tej kev ca sab tsi tseeb rua mej hab qha lawv le puab xaav xwb, tsi yog kuv kuas puab qha.

¹⁷Cov cevlug cuav has rua cov tuabneeg kws tsi kaam noog kuv tej lug tas, ‘Mej yuav tau nyob kaaj sab lug.’ Hab has rua txhua tug tuabneeg tawv ncauj tas, yuav tsi muaj kev puamtsuaj lug raug mej le.”

¹⁸Kuv has rua mej tas “Cov cevlug cuav ntawd tsi muaj ib tug paub tej kws tug TSWV xaav. Puab cov ntawd tsi muaj ib tug tau nov lossis totaub tug TSWV tej lug lossis puab tsi noog hab tsi quavntsej tej lug kws nwg has le.

¹⁹Tug TSWV txujkev chim yog nthwv naag xub naag cua hab yog cua dlaaj cua dlub kws lug qhwv nkaus cov tuabneeg sab phem taubhau,

²⁰hab cov cua ntawd yuav tsi tu moog txug thaus tug TSWV ua tav lawv le nwg npaaj tseg lawm. Muaj ib nub nwg tsaav tuabneeg yuav paub txug tej kws nwg ua nuav.”

²¹Tug TSWV has tas, “Kuv tsi tau tso cov cevlug cuav ntawd tuaj, tabsis puab tuaj puab xwb, kuv tsi tau has rua puab, tabsis puab tuav kuv lub npe cevlug.

²²Yog puab paub tej kws kuv xaav, ces puab yeej yuav moog cev kuv tej lug rua kuv tsaav tuabneeg, hab ua kuas kuv tsaav tuabneeg tso puab tej kev txhum tseg.

²³“Kuv yog tug Vaajtswv kws nyob tau txhua qhov, tsi yog nyob tuab qhov xwb.

²⁴Tsi muaj leejtwg yuav tsiv nraim rua ib qhov twg kws kuv tsi pum le. Mej puas paub has tas kuv nyob tau txhua qhov, tsi has sau ntuj lossis huv nplajteb nuav?

²⁵Kuv paub tej kws cov cevlug cuav ntawd has, puab tuav kuv lub npe dlaag has tas, yog puab ua ywgtoog pum kuv has rua puab.

²⁶Cov cevlug cuav ntawd tseem yuav has lug dlaag hab coj kuv tsaav tuabneeg yuam kev moog txug thaus twg?

²⁷Puab xaav has tas tej ywgtoog kws puab qha ntawd yuav ua rua kuv tsaav tuabneeg tso kuv tseg ib yaam le puab cov yawmkoob tso kuv tseg moog teev Npa-aas lawm.

²⁸Tug cevlug kws ua npau suav, tsuas pav nwg zaaj npau suav nkaus xwb, tabsis tug cevlug kws nov kuv tej lug, nwg yeej ua tuab zoo qha tej lug ntawd. Yog muab quavnyaab pev rua naab nplej, yaam twg yuav zoo dlua?

²⁹Kuv txujlug zoo ib yaam le suavtawg hab zoo ib yaam le raab rauj kws tsoo tau tej pobzeb tawg ntsoog ntxawg.

³⁰Kuv yuav tawmtsaam cov cevlug cuav kws muab lwm tug tej lug qha rua suavdlawg has tas, yog kuv tej lug.

³¹Kuv yuav tawmtsaam cov cevlug cuav kws puab has puab tej lug xwb los puab tseem khaav has tas yog kuv has.

³²Mej ca le noog kuv kws yog tug TSWV has! Kuv yuav tawmtsaam cov cevlug cuav kws muab puab tej npau suav dlaag pav rua suavdlawg noog. Puab pav hab khaav puab tej npau suav dlaag kuv tsaav tuabneeg yuam kev. Kuv tsi tau has rua puab hab xaa puab moog. Puab ua tsi tau dlaabtsi paab suavdlawg le. Kuv yog tug TSWV kws has le ntawd.”

³³Tug TSWV has rua kuv has tas, “Yelemis, thaus twg kuv cov tuabneeg ib tug lossis ib tug cevlug lossis ib tug povthawj twg tuaj nug koj has tas, ‘Tug TSWV txujlug has le caag?’ Koj yuavtsum teb puab has tas, ‘Mej ua rua tug TSWV nyuaj sab, hab nwg yuav muab mej ntab tawm moog.’

³⁴Yog cov tuabneeg nuav lossis ib tug cevlug lossis ib tug povthawj twg has tas, ‘Tug TSWV nyuaj sab.’ Kuv yuav rau txim rua tug ntawd hab nwg tsev tuabneeg huv tuabsi.

³⁵Tsimnyog puab nyag nug nyag tug phoojywg hab tug kwvtij has tas, ‘Tug TSWV teb le caag?’ lossis ‘Tug TSWV has le caag?’

³⁶Yog le ntawd, puab txhaj tsi has lu lug kws has tas, ‘Tug TSWV nyuaj sab.’ Yog leejtwg has lu lug ntawd, kuv yuav muab kuv txujlug ua kuas tug ntawd nyuaj sab, rua qhov cov tuabneeg ntawd tau hloov tug TSWV kws yog Vaajtswv tug muaj sa nyob hab muaj Fwjchim Luj kawg nkaus tej lug lawm.

³⁷Yelemis, koj ca le nug cov cevlug ntawd has tas, ‘Tug TSWV teb le caag rua mej? Tug TSWV has le caag rua mej?’

³⁸Yog puab tsi noog kuv lug, puab pheej has lu lug kws has tas ‘Tug TSWV nyuaj sab.’ Ces koj has rua puab tas,

³⁹Kuv yuav muab puab tshem tawm moog povtseg kuas nrug dleb ntawm kuv, tsi has puab hab lub nroog kws kuv muab rua puab cov yawmkoob lawm.

⁴⁰Kuv yuav ua kuas puab txaajmuag moog ibtxhis hab poob ntsejmuag taag moog le.”