Read Hmong Njua Yelemis 24 Bible Online

Yelemis 24 - Hmong Njua bible

Yelemis 24

¹Tug TSWV qha ob tawb txiv ncuav pas kws txawb rua ntawm hauv ntej lub Tuamtsev rua kuv. (Qhov nuav yog tom qaab kws Vaajntxwv Nenpukajnexales kws kaav tebchaws Npanpiloos tuaj nteg tau Yehauyakees tug tub Yehauyakhees kws ua vaajntxwv kaav tebchaws Yudas hab cov Yudas cov numtswv, tej tuabneeg ntaus hlau hab tej tuabneeg kws paub ua num kws nyob huv lub nroog Yeluxalees coj moog rua tim tebchaws Npanpiloos lawm).

²Thawj lub tawb ntim cov txiv ncuav pas kws zoo hab yog cov kws xub sav; muaj ib lub tawb ntim cov txiv ncuav pas phem kws tsi zoo noj le.

³Tug TSWV nug kuv has tas, “Yelemis, koj pum dlaabtsi?” Kuv teb has tas, “Kuv pum txiv ncuav pas. Cov txiv zoo, mas zoo heev, tabsis cov txiv phem, mas phem heev tsi zoo noj le.”

⁴Yog le ntawd tug TSWV has rua kuv tas,

⁵“Kuv yog tug TSWV kws yog cov Yixalayees tug Vaajtswv has tas, cov tuabneeg kws raug nteg moog rua tebchaws Npanpiloos zoo ib yaam le cov txiv ncuav pas kws zoo hab kuv yuav ua zoo rua puab.

⁶Kuv yuav tsomkwm puab hab coj puab rov lug rua huv lub tebchaws nuav. Kuv yuav txhim khu kuas puab rov vaammeej, hab tsi muab puab rhuav povtseg; kuv yuav muab puab cog hab tsi dlob puab povtseg lawm.

⁷Kuv yuav ua kuas puab paub has tas, kuv yog tug TSWV, puab yuav ua kuv tsaav tuabneeg hab kuv yuav ua puab tug Vaajtswv, rua qhov puab yuav muaj lub sab dlawb paug rov lug cuag kuv.

⁸“Vaajntxwv Xedekiyas kws kaav tebchaws Yudas, nwg cov numtswv tswj tebchaws, hab cov pejxeem kws seem huv lub nroog Yeluxalees kws nyob huv lub tebchaws nuav lossis cov kws tsiv moog nyob rua nraag tebchaws Iziv lawm, kuv kws yog tug TSWV yuav ua kuas puab zoo ib yaam le tawb txiv ncuav pas phem kws tsi zoo noj.

⁹Kuv yuav tso kev puamtsuaj lug raug puab kuas txhua tsaav tuabneeg kws nyob thoob nplajteb ntshai. Tej tuabneeg yuav luag puab plig, muab puab has tso dlaaj tso luag, txobthuam hab luas yuav tuav puab lub npe foom tsi zoo rua txhua qhov chaw kws kuv ntab puab moog nyob.

¹⁰Kuv yuav tso kev tsuv kev rog, kev tshaib kev nqhes hab kev mob kev nkeeg lug rua puab, kuas puab tuag taag tsi tshuav ib tug seem nyob huv lub tebchaws kws kuv muab rua puab hab puab cov yawmkoob.”