Read Hmong Njua Yelemis 25 Bible Online

Yelemis 25 - Hmong Njua bible

Yelemis 25

¹Thaus Yauxiyas tug tub Yehauyakees ua vaajntxwv kaav tebchaws Yudas tau plaub xyoos lawm, tug TSWV has rua kuv txug cov Yudas. (Lub sijhawm ntawd yog thawj xyoo kws Nenpukajnexales ua vaajntxwv kaav tebchaws Npanpiloos.)

²Kuv has rua cov Yudas hab cov tuabneeg kws nyob huv lub nroog Yeluxalees has tas,

³“Tau neeg nkaum peb xyoo lawm, suav txij xyoo kaum peb kws Amoos tug tub Yauxiyas ua vaajntxwv kaav tebchaws Yudas lug txug naj nub nua, tej kws tug TSWV has rua kuv, kuv yeej pav huv tuabsi rua mej, tabsis mej yeej tsi quavntsej tej lug ntawd le.

⁴Tsi yog le ntawd xwb, tug TSWV yeej tso nwg cov tubkhai kws yog cov cevlug qha rua mej ua ntu zug los mej tsi quavntsej le.

⁵Puab kuas mej tso mej lub neej ua phem ua qas hab mej tej kev txhum tseg, mej txhaj yuav tau moog nyob huv lub tebchaws kws kuv muab rua mej hab mej cov yawmkoob moog ibtxhis le.

⁶Puab qha kuas mej tsi xob pe luas tej vaajtswv lossis pe tej mlom kws mej puab ua rua tug TSWV chim. Yog mej noog tug TSWV lug, nwg yuav tsi rau txim rua mej.

⁷Tug TSWV has tas, mej yeej tsi noog nwg lug, mej pheej pe mej tej mlom ua rua tug TSWV chim, nwg txhaj rau txim rua mej.

⁸“Vim mej tsi noog nwg lug le ntawd, tug TSWV kws muaj Fwjchim Luj kawg nkaus has tas,

⁹‘Kuv yuav kuas cov tuabneeg kws nyob saab qaumteb hab kuv tug tubkhai Nenpukajnexales kws ua vaajntxwv kaav tebchaws Npanpiloos tuaj tawmtsaam cov Yudas hab cov tebchaws ibncig kuas raug luas thuam, ntshai, poob ntsejmuag hab puamtsuaj moog taag ibtxhis. Kuv yog tug TSWV kws has le ntawd.

¹⁰Kuv yuav ua kuas puab tej suab qw lomzem zoo sab, hab kev noj tshoob haus kug ntsag moog. Puab yuav tsi nov tuabneeg zum zeb hab tsi muaj leejtwg taws teeb lawm.

¹¹Lub tebchaws nuav yuav puamtsuaj hab nyob qhuav nkuag ca: tej tebchaws kws nyob ibncig ntawd yuav ua tug vaajntxwv kws kaav tebchaws Npanpiloos qhev xyaa caum xyoo.

¹²Tom qaab ntawd kuv yuav rau txim rua cov tuabneeg Npanpiloos hab puab tug vaajntxwv, vim puab tej kev txhum. Kuv yuav rhuav lub tebchaws kuas puamtsuaj taag moog ibtxhis.

¹³Kuv yuav rau txim rua lub tebchaws Npanpiloos, kuas raug puamtsuaj lawv le tej kev puamtsuaj kws kuv ua rua lwm tsaav tuabneeg kws kuv kuas Yelemis sau tseg rua huv phoo ntawv nuav.

¹⁴Kuv yuav ua pauj rua cov Npanpiloos lawv le tej kev phem kws puab tau ua lawm. Puab yuav tau moog ua ntau tsaav tuabneeg hab ntau tug vaajntxwv kws muaj fwjchim qhev.’ ”

¹⁵Tug TSWV kws yog cov Yixalayees tug Vaajtswv has rua kuv tas, “Ntawm nuav yog khob cawv txiv maab kws puv nkaus kuv txujkev chim, koj ca le coj moog rua txhua tsaav tuabneeg haus.

¹⁶Thaus puab haus taag, puab yuav qaug hab tsi meejpem, rua qhov kuv tso kev tsuv kev rog tuaj tawmtsaam puab.”

¹⁷Yog le ntawd, kuv txhaj txais lub khob ntawm tug TSWV txhais teg hab coj moog rua txhua tsaav tuabneeg haus lawv le tug TSWV khaiv kuv moog.

¹⁸Yeluxalees hab taagnrho tej nroog huv tebchaws Yudas, cov vaajntxwv hab tej numtswv yuav tau haus lub khob ntawd, tej nroog yuav ua suabpuam taag, cov vaajntxwv hab tej numtswv yuav raug luas txobthuam, hab luas yuav tuav puab lub npe foom tsi zoo ib yaam le naj nub nua.

¹⁹Cov nuav yog cov kws yuav tau haus lub khob ntawd: Falaus kws kaav tebchaws Iziv, nwg cov numtswv hab cov thawjcoj; taagnrho cov Iziv hab lwm tsaav tuabneeg kws nyob huv tebchaws Iziv, taagnrho cov vaajntxwv kws kaav tebchaws Uxes; taagnrho cov vaajntxwv kws kaav tebchaws Filitees kws nyob huv lub nroog Asekeloos, Nkaxas, Ekiloos hab taagnrho cov tuabneeg kws nyob huv Asedaus; taagnrho cov tuabneeg huv tebchaws Edoos, Mau-am hab cov Amoos; ob tug vaajntxwv kws kaav lub nroog Tiles hab lub nroog Xidoos; taagnrho cov vaajntxwv kws kaav cov tebchaws kws nyob lawv ntug Havtxwv Meditelanees kws nyob huv lub nroog Dedaas, Temas hab Npuxes; taagnrho cov tuabneeg kws txav plaubhau tuab tuab lu; taagnrho cov vaajntxwv kws kaav tebchaws Alanpias; taagnrho cov vaajntxwv kws kaav lwm tsaav tua(...)

²⁷Tug TSWV kws yog cov Yixalayees tug Vaajtswv kws muaj Fwjchim Luj kawg nkaus kuas kuv has rua puab tas, “Puab yuavtsum haus kuas qaug hab ntuav, kuas puab ndlog hab sawv tsi taug, rua qhov kuv tso kev tsuv kev rog tuaj tawmtsaam puab.

²⁸Yog puab tsi kaam txais lub khob ntawm koj teg moog haus, koj has rua puab tas tug TSWV kws muaj Fwjchim Luj kawg nkaus has tas, puab yuavtsum haus lub khob ntawd.

²⁹Kuv yuav tso kev puamtsuaj lug raug kuv lub nroog. Puab xaav has tas puab yuav dlim tsi raug txim nua los? Tsi yog le ntawd, puab yuavtsum raug txim xwb, rua qhov kuv yuav tso kev tsuv kev rog lug rua tej tuabneeg kws nyob huv lub nplajteb nuav! Kuv yog tug TSWV kws muaj Fwjchim Luj kawg nkaus has le ntawd.

³⁰“Yelemis, koj yuavtsum qha kuv tej lug nuav txhua lu rua puab, koj has rua cov tuabneeg ntawd tas, ‘Tug TSWV yuav nyooj lawg sau ntuj, hab nthe nqho sau ntuj kws yog qhov chaw sab tuaj; nwg yuav nyooj lawg tawmtsaam nwg tsaav tuabneeg; nwg yuav qw ib yaam le tug tuabneeg kws tsuj txiv maab qw. Tuabneeg nplajteb txhua tug yuav nov nwg lub suab,

³¹hab nwg lub suab yuav nrov ntxhe moog txug qaab ntuj kawg. Tug TSWV ua plaub tawmtsaam txhua tsaav tuabneeg. Nwg yuav coj txhua tug tuabneeg tuaj rua ntawm lub rooj txav txim, hab yuav muab cov tuabneeg ua phem ua qas tua povtseg; Tug TSWV yog tug kws has le ntawd.’ ”

³²Tug TSWV kws muaj Fwjchim Luj kawg nkaus has tas, kev puamtsuaj yuav lug raug ib tsaav tuabneeg dlhau rua ib tsaav tuabneeg, hab yuav muaj ib nthwv cua dlaaj cua dlub ntsawj tim qaab ntug tuaj.

³³Nub ntawd tej tuabneeg kws tug TSWV tua yuav tuag pawg lug saab ntuj tim nuav moog ti nkaus saab ntuj tim u. Yuav tsi muaj leejtwg quaj nyav hab coj puab moog log le. Puab yuav lwj ua tej pawg rua sau npoo aav ib yaam le tej quav nyuj.

³⁴Mej cov kws yog thawjcoj, mej cov kws saib kuv paab yaaj, mej ca le quaj nrov nrov! Ca le quaj dlaa luam rua huv aav. Rua qhov tub txug lub sijhawm kws muab mej tua lawm, luas yuav muab mej hlais ib yaam le hlais tej laug yaaj.

³⁵Mej yuav tsiv tsi dlim le.

³⁶Mej yuav quaj ntsuag hab nyuaj sab kawg, rua qhov tug TSWV txujkev chim rhuav mej tsaav tuabneeg hab ua rua mej lub tebchaws kws muaj kev thaajyeeb puamtsuaj taag lawm.

³⁸Tug TSWV tub tso nwg tsaav tuabneeg, tseg ib yaam le tug tsuv ntxhuav tsiv tawm ntawm nwg lub qhov moog lawm. Tej kev tsuv kev rog kws txaus ntshai hab tug TSWV txujkev chim ua rua lub tebchaws ua suabpuam taag.