Read Hmong Njua Yelemis 26 Bible Online

Yelemis 26 - Hmong Njua bible

Yelemis 26

¹Thaus Yauxiyas tug tub Yehauyakees ua vaajntxwv kaav tebchaws Yudas tau tsi ntev,

²Tug TSWV has rua kuv tas, “Koj ca le moog sawv ntawm lub tshaav puam ntawm lub Tuamtsev, qha tej lug kws kuv saamfwm rua koj lawm txhua lu rua cov tuabneeg kws tuaj txhua lub nroog huv tebchaws Yudas tuaj pehawm kuv ntawd. Koj qha tej lug nuav rua suavdlawg tsi xob tseg ib lus le.

³Tej zag puab yuav noog hab tso puab tej kev txhum tseg. Yog puab ua le ntawd, kuv yuav hloov sab tsi tso kev puamtsuaj lug raug puab, vim tej kev txhum kws puab tau ua.”

⁴Tug TSWV kuas kuv has rua suavdlawg tas, “Mej yuavtsum ua lawv le kuv kws yog tug TSWV tej lug kws qha rua mej lawm, txhaj yog mej noog kuv lug,

⁵hab mej yuavtsum muab sab rau noog tej lug kws cov cevlug kws yog kuv cov tubkhai qha rua mej. Kuv khaiv puab tuaj qha mej ua ntu zug, tabsis mej tsi noog puab qha le.

⁶Yog mej tsi ua lawv le kuv tej lug, kuv yuav ua kuas lub Tuamtsev nuav puamtsuaj ib yaam le kuv ua rua lub nroog Silaus, txhua tsaav tuabneeg huv nplajteb yuav tuav lub nroog nuav npe foom tsi zoo.”

⁷Cov povthawj, cov cev Vaajtswv lug hab cov pejxeem puavleej nov kuv has le nuav huv lub Tuamtsev,

⁸thaus kuv qha tug TSWV tej lug rua puab noog taag, puab sau nthwv lug nteg kuv hab has tas, “Koj has tej lug nuav, tsimnyog muab koj tua povtseg lawm!

⁹Ua caag koj laam tuav tug TSWV lub npe has tas, lub Tuamtsev nuav yuav zoo ib yaam le lub nroog Silaus, hab lub nroog nuav yuav puamtsuaj taag tsi muaj tuabneeg nyob huv le lawm?” Ces puab txawm lug vij nkaus kuv.

¹⁰Thaus cov Yudas tej thawjcoj nov tej xwm nuav, puab tawm ceev nrooj huv vaajntxwv lub loog moog rua ntawm lub Tuamtsev hab moog nyob ntawm lub Roojvaag Tshab.

¹¹Cov povthawj hab cov cev Vaajtswv lug has rua cov thawjcoj hab cov pejxeem has tas, “Yeej tsimnyog muab tug txivneej nuav tua povtseg lawm, rua qhov nwg tau foom tsi zoo rua peb lub nroog nuav, lawv le mej tub nov nwg tej lug lawm.”

¹²Ces kuv teb puab has tas, “Yog tug TSWV khaiv kuv tuaj foom tsi zoo rua lub Tuamtsev hab lub nroog nuav, lawv le tej lug kws mej tau nov kuv has lawm.

¹³Mej yuavtsum hloov mej lub sab hab mej teg num dlua tshab tsi xob ua le qub lawm. Mej yuavtsum noog tug TSWV kws yog mej tug Vaajtswv lug, nwg txhaj yuav hloov sab tsi ua rua mej puamtsuaj lawv le nwg tau has rua mej lawm.

¹⁴Nwgnuav kuv nyob rua huv mej txhais teg lawm, mej ca le ua rua kuv lawv le mej pum zoo hab yog kev yog cai.

¹⁵Tabsis kuas mej paub has tas, yog mej tua kuv, mej hab cov tuabneeg kws nyob huv lub nroog nuav puavleej ua txhum vim mej tua ib tug tuabneeg kws tsi muaj txim, rua qhov yog tug TSWV khaiv kuv coj tej lug qhuab ntuag nuav tuaj qha rua mej.”

¹⁶Cov thawjcoj hab cov pejxeem txhaj has rua cov povthawj hab cov cev Vaajtswv lug tas, “Tsi tsimnyog muab tug txivneej nuav tua, rua qhov nwg tuav tug TSWV kws yog peb tug Vaajtswv lub npe qha peb.”

¹⁷Tom qaab ntawd cov thawjcoj qee leej txhaj sawv ntsug hab has rua cov pejxeem kws tuaj saablaaj ntawd has tas,

¹⁸“Lub sijhawm kws Hexekiyas ua vaajntxwv kaav tebchaws Yudas, Mikhas kws yog tug cev Vaajtswv kws nyob huv lub nroog Mauleses, qha rua suavdlawg has tas, tug Tswv kws muaj Fwjchim Luj kawg nkaus has le nuav: ‘Luas yuav laij lub nroog Xi-oos ib yaam le laij teb, lub nroog Yeluxalees yuav pob puag taag ua ib pawg, hab lub roob kws luas ua lub Tuamtsev rua sau yuav caj haav zoov.’”

¹⁹“Vaajntxwv Hexekiyas hab cov Yudas tub tsi muab Mikhas tua, tabsis Hexekiyas fwm tug TSWV hab nwg ua lawv le tug TSWV lub sab nyam. Tug TSWV txhaj hloov sab, tsi ua rua puab puamtsuaj lawv le nwg has tseg lawm. Nwgnuav peb taabtom lob kev puamtsuaj lug rua peb ntaag.”

²⁰(Muaj dlua ib tug txivneej hu ua Uliyas, nwg yog Semayas tug tub kws nyob huv lub nroog Kili-as Ye-alees, nwg tuav tug TSWV lub npe foom tsi zoo rua lub nroog hab lub tebchaws nuav ib yaam le Yelemis foom.

²¹Thaus Vaajntxwv Yehauyakees, nwg cov tubrog hab tej numtswv nov Uliyas has le ntawd, vaajntxwv txawm nrhav Uliyas tua povtseg. Tabsis thaus Uliyas nov le ntawd, nwg ntshai, nwg txawm tsiv moog rua nraag tebchaws Iziv kuas nwg dlim.

²²Vaajntxwv Yehauyakees txawm khaiv Anpaus tug tub Enathaas hab qee leej moog rua nraag tebchaws Iziv hab nteg Uliyas rov lug.

²³Puab moog nteg tau Uliyas hab coj nwg rov lug rua Vaajntxwv Yehauyakees. Vaajntxwv txhaj kuas luas muab Uliyas tua hab coj moog pov rua ntawm lub toj ntxaas kws log tej tuabneeg txomnyem.)

²⁴Tabsis tub yog muaj Safaas tug tub Ahikas cawm kuv, luas txhaj tsi muab kuv rua cov pejxeem tua povtseg.