Read Hmong Njua Yelemis 27 Bible Online

Yelemis 27 - Hmong Njua bible

Yelemis 27

¹Thaus Xedekiyas tug tub Yauxiyas ua vaajntxwv kaav tebchaws Yudas tau tsi ntev, tug TSWV has rua kuv

²kuas kuv muab ntoo txua ua ib tug quabtwg hab muab ib pluaj hlua tawv khi rua hab muab khuam rua ntawm kuv cejdlaab.

³Tug TSWV kuas kuv xaa xuv moog rua cov Edoos tug vaajntxwv, cov Mau-am tug vaajntxwv, cov Amoos tug vaajntxwv, tug vaajntxwv kws kaav lub nroog Tiles, hab cov Xidoos tug vaajntxwv hab cov sawv cev kws tuaj cuag Vaajntxwv Xedekiyas huv lub nroog Yeluxalees,

⁴Tug TSWV kws yog cov Yixalayees tug Vaajtswv kws muaj Fwjchim Luj kawg nkaus, kuas kuv moog has rua puab, kuas puab coj tug TSWV tej lug moog has rua puab cov vaajntxwv has tas,

⁵“Kuv lub fwjchim hab tug zug luj zug nchaav tsim lub nplajteb, tsim tuabneeg hab txhua yaam tsaj kws nyob huv lub nplajteb nuav; kuv yuav pub lub fwjchim ntawd rua tug kws kuv pum zoo.

⁶Kuv yog tug kws muab txhua tsaav tuabneeg cob rua kuv tug tubkhai Nenpukajnexales kws ua vaajntxwv kaav tebchaws Npanpiloos. Txawm yog tej tsaj qus los kuv kuas ua nwg qhev huv tuabsi.

⁷Txhua tsaav tuabneeg yuav ua nwg qhev, hab puab yuav ua nwg tug tub hab nwg tug xeebntxwv qhev moog txug lub sijhawm kws nwg lub tebchaws poob. Lwm tsaav tuabneeg hab tej vaajntxwv kws muaj fwjchim yuav kaav nwg lub tebchaws hab nwg yuav ua puab qhev.

⁸“Tabsis yog muaj ib tsaav tuabneeg twg lossis lub tebchaws twg tsi ua lawv le nwg txuj kevcai tswjfwm, kuv yuav rau txim rua tsaav tuabneeg ntawd, puab yuav raug nav ntaaj nav rag tuag, raug kaab mob kev nkeeg tuag, hab tuag rua kev tshaib kev nqhes, moog txug nub kws kuv tso Vaajntxwv Nenpukajnexales tuaj tua puab kuas puamtsuaj taag.

⁹Mej tsi xob noog mej cov cevlug lossis tug kws khaav has tas, nwg paub tej kws yuav muaj lug yaav tom ntej, tsi has ua npau suav lossis txheev tej tuabneeg kws tuag lawm tej plig lossis ua khawvkoob. Puab yuav kuas mej tsi xob moog ua vaajntxwv Npanpiloos qhev.

¹⁰Puab yuav cevlug dlaag ntxag mej kuas mej raug luas coj moog dleb ntawm mej lub tebchaws. Kuv yuav ntab mej tawm moog, kuas mej raug kev puamtsuaj.

¹¹Tabsis yog tsaav tuabneeg twg txaus sab zwm rua tug vaajntxwv kws kaav tebchaws Npanpiloos hab ua nwg qhev, kuv yuav ca puab nyob huv puab lub tebchaws, puab yuav tau ua puab tej laj tej teb. Kuv yog tug TSWV kws has le ntawd.”

¹²Kuv has ib yaam le ntawd rua Vaajntxwv Xedekiyas kws kaav tebchaws Yudas has tas, “Koj ca le zwm rua tug vaajntxwv kws kaav tebchaws Npanpiloos, ua nwg hab nwg cov pejxeem qhev, koj txhaj yuav muaj sa nyob.

¹³Vim le caag koj hab koj cov pejxeem yuav tuag rua nav ntaaj nav rag lossis tuag rua kev tshaib kev nqhes lossis tuag rua kaab mob kev nkeeg? Tej nuav yog tej kws tug TSWV has tas, yuav lug raug tsaav tuabneeg kws tsi txaus sab zwm rua tug vaajntxwv kws kaav tebchaws Npanpiloos.

¹⁴Mej tsi xob noog cov cevlug kws has rua mej tas, tsi xob moog thawj tug vaajntxwv kws kaav tebchaws Npanpiloos. Puab dlaag mej xwb.

¹⁵Tug TSWV has tas, nwg tsi tau khaiv puab tuaj, puab tuav nwg lub npe dlaag mej xwb, yog le ntawd tug TSWV yuav ntab mej tawm moog, mej hab cov cevlug kws dlaag mej yuav raug tua tuag taag.”

¹⁶Kuv txhaj has rua cov povthawj hab cov pejxeem lawv le tug TSWV tej lug kws has tas, “Mej tsi xob noog cov cevlug kws has tas, tshuav tsi ntev luas yuav coj tej khoom muaj nqes huv tug TSWV lub Tuamtsev rov tim tebchaws Npanpiloos lug, puab dlaag mej xwb.

¹⁷Mej tsi xob noog puab tej lug! Ca le zwm rua tug vaajntxwv kws kaav tebchaws Npanpiloos, mej txhaj yuav muaj sa nyob! Vim le caag yuav ca lub nroog nuav pob puag taag ua ib pawg?

¹⁸Yog has tas puab yog cov cevlug tseeb, hab yog kuv has rua puab tag, puab ca le thov kuv kws yog tug TSWV kws muaj Fwjchim Luj kawg nkaus, kuas luas tsi xob coj tej khoom muaj nqes huv lub Tuamtsev hab huv cov Yudas tug vaajntxwv lub loog moog rua tebchaws Npanpiloos.”

¹⁹(Thaus Vaajntxwv Nenpukajnexales tuaj nteg tau cov Yudas tug Vaajntxwv Yehauyakhees kws yog Yehauyakees tug tub hab tej thawjcoj huv tebchaws Yudas hab huv lub nroog Yeluxalees moog rua tebchaws Npanpiloos lawm, Nenpukajnexales tseg tej ncej, lub rhawv tooj, cov tsheb txawb hab lub Tuamtsev qee yaam khoom muaj nqes ca xwb.)

²¹“Mej ca le noog tug TSWV kws yog cov Yixalayees tug Vaajtswv kws muaj Fwjchim Luj kawg nkaus has txug tej khoom muaj nqes kws tseem tshuav huv lub Tuamtsev hab huv cov Yudas tug vaajntxwv lub loog kws nyob huv lub nroog Yeluxalees:

²²Luas yuav coj tej ntawd moog rua tebchaws Npanpiloos hab yuav nyob tim moog txug nub kws kuv pum has tas tsimnyog coj tej ntawd rov lug ca rua huv qhov chaw nuav dlua. Kuv yog tug TSWV kws has le ntawd.”