Read Hmong Njua Yelemis 28 Bible Online

Yelemis 28 - Hmong Njua bible

Yelemis 28

¹Thaus lub tsib hlis ntuj kws yog xyoo plaub kws Xedekiyas ua vaajntxwv, Axules tug tub Hananiyas kws yog tug cevlug nyob huv lub nroog Nkinpe-oos has rua kuv huv lub Tuamtsev taabmeeg cov povthawj hab cov pejxeem has tas,

²Tug TSWV kws yog cov Yixalayees tug Vaajtswv kws muaj Fwjchim Luj kawg nkaus has tas, “Kuv tub rhuav tug vaajntxwv kws kaav tebchaws Npanpiloos lub fwjchim lawm.

³Tshuav le ob xyoos lawm xwb, kuv yuav coj tug TSWV lub Tuamtsev tej khoom muaj nqes kws Vaajntxwv Nenpukajnexales muab coj moog rua tim tebchaws Npanpiloos lawm, rov lug ca rua huv qhov chaw nuav dlua.

⁴Kuv tseem yuav coj cov Yudas tug Vaajntxwv Yehauyakhees kws yog Yehauyakees tug tub hab cov Yudas kws raug nteg moog rua tebchaws Npanpiloos lawm rov lug huv tuabsi. Kuv yuav rhuav tug vaajntxwv kws kaav tebchaws Npanpiloos lub fwjchim. Kuv yog tug TSWV kws has le ntawd.”

⁵Kuv has rua Hananiyas taabmeeg cov povthawj hab cov pejxeem kws nyob huv lub Tuamtsev tas,

⁶“Zoo kawg le lawm! Kuv ca sab has tas tug TSWV yeej yuav ua lawv le ntawd! Kuv ca sab has tas, nwg yuav ua kuas tej lug kws koj has tav, hab coj tug TSWV lub Tuamtsev tej khoom muaj nqes hab cov Yudas kws raug nteg moog rov lug.

⁷Tabsis koj ua tuab zoo noog tej lug kws kuv has rua koj hab cov pejxeem suavdlawg.

⁸Cov cevlug kws nyob ua ntej koj hab kuv tam tau has tas, yuav muaj kev tsuv kev rog, kev tshaib kev nqhes hab kev mob kev nkeeg lug raug ntau lub tebchaws hab ntau tsaav tuabneeg kws muaj fwjchim.

⁹Tabsis tug cevlug kws qha tshwm has tas, yuav muaj kev thaajyeeb, ces txawm muaj le nwg has, tug cevlug ntawd txhaj yog tug kws tug TSWV khaiv lug.”

¹⁰Ces Hananiyas txawm hle tug quabtwg ntawm kuv cejdlaab hab muab tsoo luv ua ob peb yaa,

¹¹hab nwg has taabmeeg suavdlawg tas, “Ob xyoos sau nuav, tug TSWV yuav muab tug quabtwg kws Vaajntxwv Nenpukajnexales muab khuam rua ntau tsaav tuabneeg cejdlaab tsoo kuas luv taag le nuav.” Ces kuv txawm ncaim moog lawm.

¹²Tom qaab ntawd tsi ntev, tug TSWV kuas kuv

¹³moog has rua Hananiyas has tas, “Koj muaj cuabkaav tsoo tug quabtwg ntoo nuav luv, tabsis nwg yuav muab tug quabtwg hlau lug hloov.

¹⁴Tug TSWV kws yog cov Yixalayees tug Vaajtswv kws muaj Fwjchim Luj kawg nkaus has tas, nwg yuav muab tug quabtwg hlau khuam rua sau txhua tsaav tuabneeg cejdlaab, hab kuas puab moog ua Vaajntxwv Nenpukajnexales kws kaav tebchaws Npanpiloos qhev. Tug TSWV has tas, txawm yog tej tsaj qus los yuav ua Vaajntxwv Nenpukajnexales qhev.”

¹⁵Yelemis has rua Hananiyas has tas, “Koj ca le noog kuv has! Tug TSWV tsi tau khaiv koj tuaj. Koj ntxag cov tuabneeg nuav ntseeg koj tej lug dlaag.

¹⁶Yog le ntawd tug TSWV has tas, nwg yuav tshem koj tawm huv nplajteb nuav. Koj yuav tuag ua ntej lub xyoo nuav taag, vim koj ntxag cov tuabneeg nuav ntxeev sab rua tug TSWV.”

¹⁷Ces Xyoo ntawd thaus lub xyaa hli ntuj, Hananiyas txawm tuag lawm.