Read Hmong Njua Yelemis 29 Bible Online

Yelemis 29 - Hmong Njua bible

Yelemis 29

¹Ntawm nuav yog tsaab ntawv kws kuv sau xaa huv Yeluxalees moog rua cov thawjcoj, cov povthawj, cov cevlug hab cov tuabneeg suavdlawg kws raug Nenpukajnexales nteg huv Yeluxalees coj moog rua tebchaws Npanpiloos lawm.

²Kuv sau kuv tsaab ntawv nuav tom qaab kws Vaajntxwv Yehauyakhees, nwg nam, cov numtswv, cov Yudas hab Yeluxalees tej thawjcoj, cov kws tooj kws hlau, hab cov kws txua ntoo kws raug nteg huv Yeluxalees moog lawm.

³Kuv muab tsaab ntawv nuav rua Safas tug tub Elaxas hab Hilekiyas tug tub Nkemaliyas kws yog cov Yudas tug vaajntxwv Xedekiyas khaiv moog cuag Vaajntxwv Nenpukajnexales kws kaav tebchaws Npanpiloos nqaa moog. Tsaab ntawv ntawd has tas:

⁴“Tug TSWV kws yog cov Yixalayees tug Vaajtswv kws muaj Fwjchim Luj kawg nkaus, has le nuav rua cov kws tug TSWV kuas Nenpukajnexales tuaj nteg huv Yeluxalees moog rua tebchaws Npanpiloos has tas:

⁵‘Mej ca le ua vaaj ua tsev nyob, ca le ua laj ua teb cog txiv maab txiv ntoo noj.

⁶Mej ca le yuav quaspuj kuas muaj tub muaj ntxhais; yuav nyaab rua mej tej tub hab qua mej tej ntxhais, mej tej tub tej ntxhais txhaj yuav muaj tub muaj ki fuamvaam coob. Mej yuavtsum fuamvaam kuas coob tsi xob ca tu noob.

⁷Ca le tsim tej nroog kws kuv ca luas nteg mej moog nyob kuas zoo. Mej ca le thov kuv paab tej nroog ntawd, yog tej nroog ntawd vaammeej ces mej yuav vaammeej.

⁸Kuv yog tug TSWV kws yog cov Yixalayees tug Vaajtswv ntuag mej has tas, mej tsi xob ca cov cevlug lossis lwm tug kws nrug mej nyob khaav has tas, puab txawj saib tej kws yuav tshwm lug yaav tom ntej dlaag ntxag mej, hab tsi xob ntseeg puab tej npau suav.

⁹Puab tuav kuv lub npe dlaag ntxag mej xwb. Kuv tsi tau khaiv puab tuaj. Kuv yog tug TSWV kws muaj Fwjchim Luj kawg nkaus has le ntawd.’

¹⁰“Tug TSWV has tas, ‘Thaus mej moog nyob huv Npanpiloos puv xyaa caum xyoo lawm, kuv yuav lug paab mej lawv le kuv coglug tseg has tas, kuv yuav coj mej rov lug nyob huv mej lub tebchaws.

¹¹Kuv tuab leeg txhaj paub tej kws kuv npaaj yuav ua rua mej, kuv yuav paab kuas mej vaammeej, tsi yog ua kuas mej puamtsuaj, mej txhaj muaj kev ca sab rua yaav tom ntej.

¹²Thaus ntawd mej yuav hu kuv, lug cuag kuv hab thov kuv, kuv yuav teb mej.

¹³Yog mej nrhav kuv kawg sab kawg ntsws, mej yuav ntsib kuv.

¹⁴Kuv has rua mej has tas, mej yuav ntsib kuv, hab kuv yuav coj mej tawm huv lub tebchaws kws kuv ntab mej moog nyob rov lug. Kuv yuav sau mej huv txhua lub tebchaws hab txhua qhov chaw kws kuv ca luas nteg mej moog nyob rov lug rua huv mej lub tebchaws. Kuv yog tug TSWV kws has le ntawd.’

¹⁵“Mej has tas, tug TSWV tub pub rua mej muaj cov cev Vaajtswv lug nyob huv tebchaws Npanpiloos lawm.

¹⁶Mej ca le noog tej lug kws tug TSWV has txug tug vaajntxwv kws nyob sau Daviv lub zwmtxwv hab cov tuabneeg kws nyob huv lub nroog nuav, yog mej cov kwvtij kws tsi raug luas nteg nrug mej moog,

¹⁷tug TSWV kws muaj Fwjchim Luj kawg nkaus has tas, ‘Kuv yuav tso kev tsuv kev rog, kev tshaib kev nqhes, hab kaab mob kev nkeeg lug rua puab, hab kuv yuav ua kuas puab zoo le cov txiv ncuav pas lwj kws tsi zoo noj.

¹⁸Kuv yuav tso kev tsuv kev rog, kev tshaib kev nqhes hab kaab mob kev nkeeg caum puab hab txhua tsaav tuabneeg thoob nplajteb yuav pum tej ntawd hab ntshai. Kuv ntab puab moog nyob txug qhov twg los luas yuav ntshai hab ceeb, vim tej xwm kws lug raug puab. Luas yuav luag puab plig hab tuav puab lub npe foom tsi zoo.

¹⁹Tug TSWV has tas, vim puab tsi noog tej lug kws kuv khaiv cov cevlug kws yog kuv cov tubkhai lug qha puab ua ntu zug, tej xwm nuav txhaj lug raug puab. Puab yeej tsi noog kuv lug.

²⁰Mej cov kws kuv ntab tawm huv Yeluxalees moog rua tebchaws Npanpiloos lawm. Mej ca le noog kuv kws yog tug TSWV tej lug.’

²¹“Tug TSWV kws yog cov Yixalayees tug Vaajtswv kws muaj Fwjchim Luj kawg nkaus, has txug Kaulayas tug tub Ahaj hab Ma-axeyas tug tub Xedekiyas kws tuav kuv lub npe cevlug dlaag mej, kuv yuav muab obtug cob rua Vaajntxwv Nenpukajnexales kws kaav tebchaws Npanpiloos, nwg yuav muab obtug tua taabmeeg mej.

²²Thaus cov tuabneeg kws raug nteg huv tebchaws Yudas moog rua tebchaws Npanpiloos lawm, xaav foom tsi zoo rua leejtwg, puab has tas, ‘Thov kuas tug TSWV ua rua koj ib yaam le nwg ua rua Xedekiyas hab Ahaj kws vaajntxwv Npanpiloos muab hlawv caj lawm.’

²³Obtug ua txhum luj kawg le, rua qhov obtug ntxag luas tej quaspuj hab tuav kuv lub npe has lug dlaag, kuv tsi tau kuas obtug has. Kuv paub tej kws obtug ua hab kuv ua timkhawv tawmtsaam obtug Kuv yog tug TSWV kws has le ntawd.”

²⁴Tug TSWV kws yog cov Yixalayees tug Vaajtswv kws muaj Fwjchim Luj kawg nkaus, kuas kuv has rua Semayas kws yog tuabneeg Nehelas sau ib tsaab ntawv suam nwg lub npe xaa moog rua cov pejxeem kws nyob huv lub nroog Yeluxalees hab xaa moog rua tug povthawj Xefaniyas kws yog Ma-axeyas tug tub hab cov povthawj txhua tug has tas:

²⁶“Tug TSWV tsaa koj ua povthawj hloov Yehauyadas chaw, hab nwgnuav koj yog tug thawj kws saib tug TSWV lub Tuamtsev; koj ca le nteg txhua tug tuabneeg vwm kws ua txuj ua tug cev Vaajtswv lug, muab saw hlau khi nwg hab muab cuab hlau cuab nwg cejdlaab.

²⁷Vim le caag koj tseem tsi ua le ntawd rua Yelemis kws nyob huv Anathaus kws pheej cev Vaajtswv lug rua suavdlawg?

²⁸Koj ca le txwv nwg, vim nwg tau sau ntawv xaa tuaj rua cov kws nyob tim tebchaws Npanpiloos nuav has tas, puab yuav nyob tim nuav ntev; kuas puab ca le ua vaaj ua tsev nyob, ua laj ua teb hab cog txiv maab txiv ntoo noj.”

²⁹Tug povthawj Xefaniyas nyeem tsaab ntawv nuav rua kuv noog,

³⁰ces tug TSWV has rua kuv tas,

³¹“Koj ca le sau ib tsaab ntawv xaa moog rua cov pejxeem kws raug nteg moog rua tebchaws Npanpiloos kws tug TSWV has txug Semayas kws yog tuabneeg Nehelas has tas, kuv tsi tau khaiv Semayas tuaj cevlug rua mej, nwg ca le tuaj cevlug le kws nwg yog ib tug cev Vaajtswv lug, kuas mej ntseeg nwg tej lug dlaag. Kuv yuav rau txim rua Semayas hab nwg cov xeebntxwv, nwg yuav tsi tshuav ib tug xeebntxwv ua neej nrug mej nyob, hab nwg yuav tsi pum tej yaam zoo kws kuv ua rua kuv tsaav tuabneeg, rua qhov nwg qha kuas puab ntxeev sab rua kuv. Kuv yog tug TSWV kws has le ntawd.”