Read Hmong Njua Yelemis 3 Bible Online

Yelemis 3 - Hmong Njua bible

Yelemis 3

¹Tug TSWV has tas, “Yog ib tug txivneej twg nrauj nwg tug quaspuj, hab tug quaspuj ntawd moog yuav dlua lwm tug txivneej lawm, ces tug quasyawg qub moog yuav tsi tau tug quaspuj ntawd rov lug lawm, yog ua le ntawd yuav ua rua lub tebchaws tsi huv. Tabsis Yixalayees, koj moog ntxag ntau tug hluas nraug, nwgnuav koj tseem rov lug cuag kuv dlua hab los?

²Koj ca le tsaa qhovmuag saib sau tej ncov roob! Puas tshuav ib qho chaw twg kws koj tsi tau moog ua namndlav rua sau le? Koj moog sawv ntawm tej ntug kev tog koj tej hluas nraug, ib yaam le cov tuabneeg Alav zuv kev tog tua tej tuabneeg kws dlua kev tom taj suabpuam. Koj ua namndlav, txhaj ua rua lub tebchaws tsi huv lawm.

³Tub yog vim le ntawd, kuv txhaj sau naag rov qaab, hab tsi tso naag lug rua lub caij ntuj naag. Koj zoo ib yaam le tug namndlav kws tsi paub txaajmuag.

⁴“Nwgnuav koj maam le has rua kuv tas, ‘Koj yog kuv txiv, koj yeej ibtxwm hlub kuv thaus kuv tseem yau lug.

⁵Koj yuav tsi npautawg rua kuv txhua lub sijhawm hab koj yuav tsi chim rua kuv moog ibtxhis le.’ Yixalayees, koj yeej has le ntawd tag, tabsis koj tseem ua kev phem kev qas lawv le koj lub sab nyam.”

⁶Thaus Yauxiyas ua vaajntxwv kaav tebchaws, tug TSWV has rua kuv tas, “Koj puas pum Yixalayees ua le tug quaspuj kws tsi noog lug ua? Nwg tso kuv tseg hab moog ua namndlav rua sau txhua lub ncov roob hab huv qaab txhua tsob ntoo kws muaj nplooj ntxoov nyog.

⁷Kuv xaav has tas, thaus nwg ua tej nuav txaus sab lawm, nwg yuav tig rov lug cuag kuv, tabsis nwg tsi rov lug cuag kuv le lawm, hab nwg tug vivncaug Yudas kws sab tsi ncaaj los pum ntsoov tej kws nwg ua.

⁸Yudas tub pum kuv muab Yixalayees nrauj hab xaa nwg moog lawm, rua qhov nwg tso kuv tseg hab moog ua namndlav. Tabsis Yudas kws yog Yixalayees tug vivncaug tsi ntshai le. Yudas los kuj moog ua namndlav

⁹hab tsi paub txaajmuag le. Nwg ua rua lub tebchaws tsi huv. Nwg ua kev nkauj kev nraug nrug tej mlom pobzeb hab tej mlom ntoo.

¹⁰Tom qaab ntawd, Yudas kws yog Yixalayees tug vivncaug kws sab tsi ncaaj ua txuj rov lug cuag kuv; tabsis nwg lub sab yeej tsi npuab kuv le. Kuv yog tug TSWV kws has le ntawd.”

¹¹Tug TSWV has rua kuv tas, “Txawm yog Yixalayees tau tso tug TSWV tseg lawm los nwg tseem zoo tshaaj Yudas tug kws sab tsi ncaaj.”

¹²Tug TSWV kuas kuv has rua Yixalayees has tas, “Yixalayees kws sab tsi ncaaj, koj ca le rov lug cuag kuv. Kuv yog tug kws muaj kev hlub hab yuav tsi chim. Kuv yuav tsi chim rua koj moog ibtxhis.

¹³Koj ca le leeg has tas koj tau ua txhum hab ntxeev sab rua tug TSWV kws yog koj tug Vaajtswv. Hab koj ca le leeg has tas koj tau ua namndlav nrug lwm tsaav tuabneeg tej vaajtswv nyob huv tej qaab ntoos kws muaj nplooj ntxoov nyog hab koj tsi noog kuv tej lug. Kuv yog tug TSWV kws has le ntawd.

¹⁴“Cov tuabneeg kws sab tsi ncaaj, mej ca le rov lug cuag kuv; mej yog kuv tug. Kuv yuav xaiv mej cov ib tug huv ib lub nroog hab ib xeem twg ob leeg, hab kuv yuav coj mej rov moog rua sau lub Roob Xi-oos.

¹⁵Kuv yuav pub kuas mej muaj cov numtswv kws noog kuv lug, puab yuav muaj tswvyim hab kev txawj ntse tswjfwm mej.

¹⁶Thaus mej fuamvaam coob heev nyob huv lub tebchaws ntawd, tej tuabneeg yuav tsi has txug tug TSWV lub Phijxaab lawm. Puab yuav tsi has lossis ncu txug le; puab tsi yuav hab yuav tsi ua dlua ib lub ntxiv lawm.

¹⁷Thaus txug lub sijhawm ntawd luas yuav hu Yeluxalees has tas, ‘Tug TSWV lub zwmtxwv,’ hab txhua tsaav tuabneeg yuav tuaj ua ke pehawm kuv. Puab yuav tsi ua lawv le puab lub sab tawv hab puab lub sab phem yuam puab ua lawm.

¹⁸Yixalayees yuav koom nrug Yudas, hab puab yuav ua ke rov peg lub tebchaws saab qaumteb kws puab raug nteg moog rov lug rua huv lub tebchaws kws kuv tau muab rua puab cov yawmkoob ua puab tug moog ibtxhis.”

¹⁹Tug TSWV has tas, “Yixalayees, kuv txaus sab yuav koj lug ua kuv tub hab yuav muab lub tebchaws kws ntxim sab rua koj, yog lub tebchaws kws zoo tshaaj lwm lub tebchaws huv nplajteb nuav, kuv txaus sab ca koj hu kuv ua txiv, hab tsi xob tso kuv tseg ib zag ntxiv lawm.

²⁰Tabsis koj tsi muab sab npuab kuv ib yaam le tug quaspuj kws sab tsi ncaaj. Kuv yog tug TSWV kws has le ntawd.”

²¹Muaj ib lub suab nrov sau tej ncov roob tuaj: lub suab ntawd yog cov Yixalayees lub suab quaj hab thov, rua qhov puab ua txhum hab tsi ncu qaab tug TSWV kws yog puab tug Vaajtswv lawm.

²²Mej cov kws tso kuv tseg lawm, ca le rov lug cuag kuv kws yog mej tug TSWV; kuv yuav khu mej tej mob kuas zoo hab pub kuas mej muaj lub sab ncaaj. Mej teb has tas, “Peb ca le rov moog cuag tug TSWV, rua qhov nwg yog peb tug Vaajtswv.

²³Peb tej mlom kws peb pe sau tej ncov roob paab tsi tau peb le. Tug TSWV kws yog cov Yixalayees tug Vaajtswv txhaj paab tau peb xwb.

²⁴Tabsis qhov kws peb pe Npa-aas kws yog tug vaajtswv rhuav ntsejmuag ntawd, ua rua peb tej tsaj txhu, tej tub tej ntxhais tuag taag, hab txhua yaam kws peb cov yawmkoob tsim tseg ca puamtsuaj taag.

²⁵Tsimnyog peb txaajmuag hab pw dlaa luam rua huv aav tiv txujkev txaajmuag. Peb hab peb cov yawmkoob tau ua txhum rua tug TSWV kws yog peb tug Vaajtswv; peb yeej tsi fwm hab tsi noog nwg lug tag.”