Read Hmong Njua Yelemis 30 Bible Online

Yelemis 30 - Hmong Njua bible

Yelemis 30

¹Tug TSWV kws yog cov Yixalayees tug Vaajtswv has rua kuv tas,

²“Yelemis, koj ca le sau tej lug kws kuv has rua koj huv tuabsi rua ib phoo ntawv,

³rua qhov thaus txug sijhawm lawm, kuv yuav pub kuas cov Yixalayees hab cov Yudas kws yog kuv tsaav tuabneeg rov vaammeej ib yaam le qub. Kuv yuav coj puab rov lug rua huv lub tebchaws kws kuv muab rua puab cov yawmkoob, puab txhaj yuav rov tau lub tebchaws nuav ua puab tug. Kuv yog tug TSWV kws has le ntawd.”

⁴Tug TSWV has rua cov Yixalayees hab cov Yudas has tas,

⁵“Kuv nov ib lub suab quaj kws txaus ntshai heev, yog lub suab quaj txomnyem, tsi yog lub suab luag zoo sab.

⁶Nwgnuav mej ca le ua tuab zoo xaav saib! Tej txivneej puas yug tau mivnyuas? Ua caag kuv pum txhua tug txivneej nyag pus rawv nyag lub plaab ib yaam le tug quaspuj kws mob plaab yuav yug mivnyuas? Vim le caag puab tej plhu thumxem taag le?

⁷Muaj ib nub suavdlawg yuav raug kev txhawj kev ntshai; tsi muaj ib nub kws yuav ntshai npaum le nub ntawd, yog lub sijhawm kws kuv tsaav tuabneeg ntxhuv sab heev, tabsis puab yuav dlim.”

⁸Tug TSWV kws muaj Fwjchim Luj kawg nkaus has tas, “Thaus txug nub ntawd, kuv yuav txu tug quabtwg kws khuam puab cejdlaab hab dlaws tej saw hlau kws khi puab povtseg, puab txhaj tsi tau moog ua lwm tsaav tuabneeg qhev ntxiv lawm.

⁹Tabsis puab yuav ua kuv kws yog tug TSWV puab tug Vaajtswv teg num, hab ua Daviv tug xeebntxwv kws kuv yuav tsaa ua puab tug Vaajntxwv teg num.

¹⁰‘Kuv tsaav tuabneeg, mej tsi xob ntshai; cov Yixalayees, mej tsi xob poob sab. Kuv yuav paab kuas mej dlim huv lub tebchaws kws dleb heev rov lug; mej yuav tau rov lug nyob huv mej lub tebchaws kaaj sab lug. Mej yuav tau rov lug nyob tso sab plhuav hab tsi muaj leejtwg ua rua mej ntshai le lawm.

¹¹Kuv yuav nrug nraim mej hab cawm mej; kuv yuav rhuav tej tebchaws kws kuv ntab mej moog nyob ntawd, tabsis kuv yuav tsi ua rua mej puamtsuaj. kuv yuav rau txim rua mej, tabsis kuv tsuas rau lawv le mej tej kev txhum xwb; kuv yog tug TSWV kws has le ntawd.’ ”

¹²Tug TSWV has rua nwg tsaav tuabneeg tas, “Yuav tsi muaj leejtwg khu tau mej tej qhov txhaab; yuav tsi muaj leejtwg khu tau mej tej nqaj kws to kuas zoo.

¹³Yuav tsi muaj leejtwg tu mej; tsi muaj tshuaj qhwv mej tej qhov txhaab, hab yuav tsi muaj leejtwg khu tau mej.

¹⁴Cov tuabneeg kws hlub mej tub tso mej tseg lawm; puab tsi quavntsej mej. Kuv tawmtsaam mej ib yaam le kuv yog mej tug yeebncuab, kuv rau txim rua mej, rua qhov mej ua kev txhum ntau hab ua kev phem kev qas heev.

¹⁵Mej tsi xob nroo txug mej tej mob, yeej tsi muaj leejtwg khu tau. Tej nuav tub yog kuv rau txim rua mej ntaag! Rua qhov mej ua kev txhum ntau hab ua kev phem kev qas heev.

¹⁶Cov tuabneeg kws nwgnuav ntxo mej noj puab yuav raug luas ntxo ib yaam nkaus. Mej tej yeebncuab yuav raug luas nteg coj moog ua qhev huv tuabsi. Tej tuabneeg kws tsimtxom mej yuav raug luas tsimtxom, hab tej tuabneeg kws tuaj fuab mej, luas yuav tuaj fuab puab hab.

¹⁷Txawm yog mej cov yeebncuab thuam mej has tas, ‘Luas tub tso lub nroog Xi-oos tseg, tsi muaj tuabneeg quavntsej nwg los xij.’ Kuv yuav ua kuas mej rov noj qaab nyob zoo, kuv yuav khu mej tej qhov txhaab kuas nqawm. Kuv yog tug TSWV kws has le ntawd.”

¹⁸Tug TSWV has tas, “Kuv yuav coj kuv tsaav tuabneeg rov lug nyob huv puab lub tebchaws, hab kuv yuav taabncuab txhua tsev tuabneeg huv tuabsi; puab yuav rov txhim khu lub nroog Yeluxalees dlua tshab, hab khu vaajntxwv lub loog kuas rov zoo le qub.

¹⁹Tej tuabneeg kws nyob huv lub nroog yuav hu nkauj ua tsaug; hab puab yuav qw zoo sab kawg le. Kuv yuav foom koob moov kuas puab fuamvaam coob, hab kuv yuav ua kuas puab tau ntsejmuag.

²⁰Kuv yuav pub kuas tsaav tuabneeg nuav muaj fwjchim ib yaam le yaav thaus u, kuv yuav tsaa puab lub neej kuas nyob ruaj khov; hab kuv yuav rau txim rua txhua tug kws tsimtxom puab.

²¹Tug kws yuav kaav puab yog sawv huv puab tsaav tuabneeg lug, tug kws yuav ua puab tug vaajntxwv yog puab caajceg; thaus kuv hu nwg, nwg yuav lug cuag kuv, yog kuv tsi hu, leejtwg yuav muaj cuabkaav lug cuag kuv? Puab yuav ua kuv tsaav tuabneeg, hab kuv yuav ua puab tug Vaajtswv, kuv yog tug TSWV kws has le ntawd.”

²³Tug TSWV txujkev chim yog nthwv cua dlaaj cua dlub, nthwv cua nuav yuav ntsawj cov tuabneeg sab phem taubhau. Tug TSWV yuav chim moog txug thaus nwg ua ib puas tsaav yaam tav lawv le nwg npaaj tseg lawm. Muaj ib nub tug TSWV tsaav tuabneeg yuav paub tseeb zaaj nuav lub ntsab.