Read Hmong Njua Yelemis 31 Bible Online

Yelemis 31 - Hmong Njua bible

Yelemis 31

¹Tug TSWV has tas, “Muaj ib nub kuv yuav ua cov Yixalayees txhua xeem tug Vaajtswv hab puab yuav ua kuv tsaav tuabneeg.

²Kuv hlub cov Yixalayees kws seem tuag ntawm taj suabpuam. Thaus cov Yixalayees xaav su,

³kuv tuaj dleb dleb tshwm rua puab pum. Cov Yixalayees, kuv yeej ibtxwm hlub mej, kuv yuav hlub mej moog ibtxhis.

⁴Kuv yuav muab mej hloov dlua tshab, mej yuav rov tau npuaj mej tej nruag seev cev hab zoo sab luag quas ntxhi.

⁵Mej yuav rov tau xov vaaj cog txiv maab rua sau tej roob huv tebchaws Xamalis, hab cov tuabneeg kws cog tej txiv maab yuav tau noj tej txiv maab kws puab cog.

⁶Muaj ib nub cov tub faajxwm yuav tuaj sau Efalayees tej roob hu has tas, ‘Peb ca le moog cuag tug TSWV kws yog peb tug Vaajtswv sau lub Roob Xi-oos.’ ”

⁷Tug TSWV has tas, “Ca le hu nkauj zoo sab rua tsaav tuabneeg Yixalayees kws yog tsaav tuabneeg tseemceeb dlua lwm tsaav tuabneeg. Ca le hu mej tej nkauj qhuas has tas, ‘Tug TSWV cawm nwg tsaav tuabneeg. Nwg cawm cov tuabneeg kws seem txhua tug.’

⁸Kuv yuav sau puab saab qaumteb hab tim qaab ntuj kawg rov lug, tsi has tej tuabneeg tuag teg tuag taw hab tej tuabneeg dligmuag lossis tej quaspuj suab mivnyuas hab tej kws tub yuav txug caij yug, puavleej yuav lug huv tuabsi, puab yuav lug sis sau ua ib tsaav tuabneeg.

⁹Thaus kuv coj kuv tsaav tuabneeg rov lug puab yuav quaj hab thov kuv. Kuv yuav coj puab lug txug ndlua tej dlej cag kws ntshab si puab taug kev taj kev tug, puab yuav tsi qaug. Kuv yog cov Yixalayees leej Txiv, hab Efalayees yog kuv tug tub hlub.”

¹⁰Tug TSWV has tas, “Txhua tsaav tuabneeg, mej ca le noog kuv has, hab qha kuv txujlug rua tej tebchaws dleb kws nyob lawv ntug havtxwv. Kuv ua rua kuv tsaav tuabneeg tawg tsiv moog nyob ua saab ua sua, tabsis kuv yuav sau puab rov lug nyob ua ke hab kuv yuav tsomkwm puab ib yaam le tug tswv yug yaaj zuv nwg paab yaaj.

¹¹Kuv tso cov Yixalayees nyob thaajyeeb lug; kuv cawm puab dlim ntawm tsaav tuabneeg kws muaj fwjchim txhais teg.

¹²Puab yuav lug hu nkauj luag ntxhi sau lub roob Xi-oos; kuv pub puab muaj qoobloo hab muaj cawv txiv maab, muaj roj txiv ntoo, muaj yaaj, muaj tshis muaj nyuj hab muaj neeg. Puab yuav zoo ib yaam le lub vaaj kws luas ywg dlej quas ntshis, puab yuav muaj txhij muaj txhua lawv le puab xaav yuav xaav tau.

¹³Thaus ntawd tej ntxhais yuav seev cev luag ntxhi; cov txivneej, tsi has laug hab hluas yuav zoo sab kawg nkaus; kuv yuav nplig puab sab, muab puab tej kev quaj ntsuag hloov ua kev lomzem, hab muab puab tej kev nyuaj sab hloov ua kev zoo sab.

¹⁴Kuv yuav pub cov povthawj muaj noj muaj haus nplua mag, hab kuv yuav pub kuv tsaav tuabneeg muaj txhua yaam txaus puab sab. Kuv yog tug TSWV kws has le ntawd.”

¹⁵Tug TSWV has tas, “Suavdlawg yuav nov suab quaj suab nyav huv lub nroog Lamas, yog lub suab quaj kws tu sab kawg le. Laxees yuav quaj ntsuag rua nwg tej mivnyuas; tsi muaj leejtwg yuav nplig tau nwg sab; rua qhov nwg tej mivnyuas tuag taag lawm.

¹⁶Mej tsi xob quaj, ca le so kua muag. Txhua yaam kws mej ua yuav tawg paaj txi txiv, mej cov mivnyuas yuav rov huv yeebncuab tej tebchaws lug.

¹⁷Mej tseem muaj kev ca sab, rua qhov mej tej tubki yuav tau rov lug. Kuv yog tug TSWV kws has le ntawd.

¹⁸“Kuv nov tsaav tuabneeg Yixalayees seev has tas, ‘Tug TSWV, peb zoo ib yaam le tug tsaj kws tsi muaj tswv cob; tabsis koj cob qha peb kuas noog koj lug. Thov koj coj peb rov lug, peb zoo sab tig rov lug cuag tug TSWV kws yog peb tug Vaajtswv.

¹⁹Peb tsiv ntawm koj moog lawm, tabsis tsi ntev peb xaav rov lug cuag koj. Thaus koj rau txim rua peb lawm, peb nyuaj sab heev. Peb poob ntsejmuag hab txaajmuag kawg le, rua qhov thaus peb tseem hluas peb tau ua txhum lawm.’

²⁰“Yixalayees, koj yog kuv tug tub kws kuv hlub heev, koj yog tug mivnyuas kws kuv hlub tshaaj plawg. Thaus twg kuv has txug koj lub npe, kuv hlub hab ncu txug koj. Kuv ncu ntsoov koj rua nruab sab, hab kuv yuav hlub koj.

²¹Koj ca le tsuam nplooj rua txujkev kws koj moog, hab ca le taug koj txuj qub lw rov lug. Yixalayees, koj ca le rov qaab lug nyob huv tej qub zej qub zog.

²²Mej cov kws tsi muab lub sab npuab kuv, tseem yuav ua xyem xyaav moog txug thaus twg? Kuv tub tsim ib yaam tshab kws txawv dlua lwm yaam rua huv nplajteb nuav lawm: yaam ntawd txawv npaum nkaus le tug quaspuj ua tug tsomkwm tug txivneej.”

²³Tug TSWV kws yog cov Yixalayees tug Vaajtswv kws muaj Fwjchim Luj kawg nkaus has tas, “Thaus kuv coj puab rov lug nyob rua huv puab lub tebchaws, cov kws nyob huv tej nroog huv tebchaws Yudas yuav rov has tas, “ ‘Thov tug TSWV foom koob moov rua lub roob dlawbhuv kws yog tug TSWV lub chaw nyob huv lub nroog Yeluxalees.’

²⁴Tuabneeg yuav nyob huv tebchaws Yudas hab txhua lub nroog, puab yuav ua laj ua teb, hab yug yaaj yug tshis ua npoj ntwg.

²⁵Kuv yuav txhawb tej tuabneeg qaug zug kuas rov muaj zug, hab kuv yuav pub tej tuabneeg kws tshaib nqhes kuas muaj noj muaj haus.

²⁶Thaus ntawd suavdlawg yuav has tas, ‘Kuv tso sab lug pw tsaug zug hab sawv lug muaj zug khov kho.’

²⁷“Kuv kws yog tug TSWV has rua mej tas, tub txug nub kws kuv pub kuas lub tebchaws Yixalayees hab Yudas muaj tuabneeg nyob txhua qhov hab muaj tsaj txhu ua npoj ntwg lawm.

²⁸Yaav taag lug, kuv rhuav puab lub neej, tshem puab tawm, chua puab kutaw kuas puab qaug, ua rua puab puamtsuaj hab tso kev pluj kev tuag lug raug puab. Tabsis nwgnuav kuv yuav tsaa puab, txhim khu puab hab txhawb puab lub neej.

²⁹Thaus txug lub sijhawm ntawd, suavdlawg yuav tsi has ib zag ntxiv has tas, ‘Nam hab txiv noj txiv qaub ua rua mivnyuas lug quavncaug.’

³⁰Tug kws noj txiv qaub tsuas qaub ntawm nwg lub ncauj xwb; txhua tug kws ua txhum, nyag tuag rua nyag txujkev txhum xwb.”

³¹Tug TSWV has tas, “Tub yuav txug nub kws kuv coglug tshab rua cov Yixalayees hab cov Yudas.

³²Tej lug cog tseg tshab nuav yuav tsi zoo le tej lug kws kuv cog tseg rua puab cov yawmkoob thaus kuv coj puab tawm nraag tebchaws Iziv lug. Txawm yog kuv zoo ib yaam le puab txiv los puab yeej tsi ua lawv le kuv tej lug cog tseg.

³³Cov lug cog tseg tshab kws kuv cog rua cov Yixalayees yog le nuav: kuv yuav ua kuas puab ncu ntsoov kuv tej kevcai rua nruab sab. Kuv yuav ua puab tug Vaajtswv hab puab yuav ua kuv tsaav tuabneeg.

³⁴Txij nuav moog tsi taag puab yuav qha kuas puab tsaav tuabneeg paub tug TSWV, rua qhov txhua tug tsi has tug hlub tug yau yuav paub kuv zoo. Kuv yuav zaam txim rua puab hab kuv yuav tsi cim ntsoov puab tej kev txhum le lawm. Kuv yog tug TSWV kws has le ntawd.”

³⁵Tug TSWV ua lub nub ci pum kev rua nruab nub, ua lub hli hab tej nubqub ci pum kev rua mo ntuj; nwg dlu dlej havtxwv ndlaas nphau pis nphwv; nwg lub npe hu ua tug TSWV kws muaj Fwjchim Luj kawg nkaus.

³⁶Nwg coglug tseg has tas, lub ntuj lub teb nyob ntev npaum le caag, cov Yixalayees yuav caj ua ib tsaav tuabneeg nyob ntev ib yaam le ntawd.

³⁷Yog leejtwg ntsuag tau sau nruab ntug lossis tshuaj tau nruab tivtxwv ces kuv txhaj tso tau cov Yixalayees tseg, txawm yog puab ua txhum los kuv yuav tsi tso puab tseg. Kuv yog tug TSWV kws has le ntawd.

³⁸Tug TSWV has tas, “Tub yuav txug nub kws kuv txhim khu lub nroog Yeluxalees dlua tshab, txij ndlua ntawm lub chaw Tsomfaaj Hananees saab nubpoob moog txug ndlua ntawm lub Roojvaag Ceg kaum.

³⁹Lub nroog tug nrim saab nubpoob pib qhov ntawd moog txug rua sau lub roob Nkalej hab nkhaus moog cob rua ntawm Nkau-as.

⁴⁰Thoob plawg lub haav kws luas log tuag hab pov lamsim, hab tej teb kws nyob lawv ntug Haav Kiloos moog txug rua ntawm lub Roojvaag Neeg moog rua saab nubtuaj, yuav yog kuv qhov chaw tseemceeb. Yuav tsi muaj leejtwg rhuav lossis ua kuas lub nroog nuav puamtsuaj le lawm.”