Read Hmong Njua Yelemis 32 Bible Online

Yelemis 32 - Hmong Njua bible

Yelemis 32

¹Tug TSWV has rua kuv thaus kws Xedekiyas ua vaajntxwv kaav tebchaws Yudas tau kaum xyoo, hab Nenpukajnexales ua vaajntxwv kaav tebchaws Npanpiloos tau kaum yim xyoo.

²Thaus lub sijhawm kws tug vaajntxwv kws kaav tebchaws Npanpiloos cov tubrog tuaj tua lub nroog Yeluxalees, kuv raug nteg moog kaw rua huv vaajntxwv lub loog ib chaav.

³Vaajntxwv Xedekiyas yog tug kws nteg kuv moog kaw hab nwg kom kuv has tas, “Vim le cag koj cevlug has tas, tug TSWV yuav ca tug vaajntxwv kws kaav tebchaws Npanpiloos tuaj txeeb lub nroog Yeluxalees,

⁴hab Vaajntxwv Xedekiyas yuav tsiv tsi dlim. Nwg yuav raug Vaajntxwv Nenpukajnexales nteg moog hab nrug nwg thaam tim ntsej tim muag.

⁵Xedekiyas yuav raug coj moog rua tebchaws Npanpiloos, nwg yuav nyob tim moog txug nub kws kuv nrug nwg has taag. Txawm yog nwg yuav tawmtsaam cov Npanpiloos los nwg yuav kov tsi yeej. Kuv yog tug TSWV kws has le ntawd.”

⁶Tug TSWV has rua kuv tas

⁷kuv tug txiv ntxawm Salumes tug tub Hanamees yuav tuaj cuag kuv hab kuas kuv yuav nwg thaaj teb kws nyob huv Anathaus, huv xeem Npeenyamees cheebtsaam aav, rua qhov kuv yog tug kws txheeb ze nwg tshaaj hab yog tug kws muaj cai yuav tau nwg thaaj teb ntawd lug ua kuv tug.

⁸Ces txawm muaj lawv le tug TSWV has rua kuv. Hanamees tuaj ntsib kuv ntawm lub tshaav puam, kuas kuv yuav nwg thaaj teb. Yog le ntawd, kuv txhaj paub has tas, yog tug TSWV has rua kuv tag.

⁹Kuv txawm yuav Hanamees thaaj teb, tug nqe yog kaum xyaa dlaim nyaj, kuv txhaj muab nyaj lug luj rua nwg.

¹⁰Kuv suam npe rua dlaim ntawv nas homthawj taabmeeg suavdlawg, hab kuv muab teev lug luj nyaj rua nwg.

¹¹Kuv muab dlaim ntawv yuav teb kws teev tej lug cog tseg hab nas homthawj rua, hab dlaim ntawv kws tsi nas homthawj,

¹²cob rua Npalus kws yog Neliyas tug tub hab yog Maxeyas tug xeebntxwv taabmeeg Hanamees, cov timkhawv kws nrug suam npe rua ob dlaim ntawv yuav teb hab cov tuabneeg kws tuaj nyob huv lub tshaav puam ntawd.

¹³Kuv has rua Npalus taabmeeg suavdlawg tas,

¹⁴“Tug TSWV kws yog cov Yixalayees tug Vaajtswv kws muaj Fwjchim Luj kawg nkaus, saamfwm kuas koj ca le txais ob dlaim ntawv nuav: dlaim ntawv yuav teb kws teev tej lug cog tseg hab nas homthawj rua hab dlaim ntawv kws tsi nas homthawj coj moog ntsaws rua huv ib lub hub ca, txhaj yuav nyob ntev moog yaav tom ntej.

¹⁵Tug TSWV kws yog cov Yixalayees tug Vaajtswv kws muaj Fwjchim Luj kawg nkaus has tas, tseem yuav muaj tuabneeg yuav vaaj yuav tsev, yuav laj yuav teb hab yuav vaaj txiv maab nyob huv lub tebchaws nuav moog ntxiv.”

¹⁶Tom qaab kws kuv muab dlaim ntawv yuav teb rua Npalus lawm, kuv thov Vaajtswv has tas,

¹⁷“Tug TSWV kws kaav ib puas tsaav yaam, koj lub fwjchim hab tug zug luj zug nchaav tsim lub nplajteb hab lub ntuj; tsi muaj ib yaam dlaabtsi nyuaj rua koj ua tsi tau le.

¹⁸Koj qha koj txujkev hlub kws tsi paub kawg rua ntau txheeb tam tuabneeg, tabsis koj rau txim rua tuabneeg, vim puab nam puab txiv tej kev txhum. Koj yog Vaajtswv tug kws muaj Fwjchim Luj; koj yog tug TSWV kws muaj Fwjchim Luj kawg nkaus.

¹⁹Koj muaj tswvyim npaaj homphaj hab koj teg num luj kawg nkaus. Koj pum txhua yaam kws tuabneeg ua hab koj muab nqe zug rua puab lawv le puab teg num.

²⁰Ntau xyoo dlhau lug koj ua tej txujci tseemceeb nraag tebchaws Iziv hab koj tseem ua tej txujci ntawd rua cov Yixalayees hab lwm tsaav tuabneeg pum lug txug naj nub nua, yog le ntawd, koj lub npe txhaj nrov nchaa moo lug moog rua txhua qhov.

²¹Tub yog koj ua tej txujci tseemceeb rua peb cov yeebncuab pum, puab txhaj ntshai heev, koj tug zug hab koj lub fwjchim coj koj tsaav tuabneeg Yixalayees nraag tebchaws Iziv lug.

²²Koj muab lub tebchaws kws aav rog hab zoo qoob rua koj tsaav tuabneeg lawv le koj tub tau coglug rua puab cov yawmkoob lawm.

²³Tabsis thaus puab lug nyob huv lub tebchaws lawm, puab tsi noog koj tej lug saamfwm lossis ua lawv le koj tej lug qha, puab tsi ua lawv le koj kuas puab ua. Vim le ntawd, koj txhaj tso tej kev puamtsuaj lug raug puab.

²⁴“Cov tubrog Npanpiloos tub tuaj vij hab meem ntswg thoob plawg kuas tua tau lub nroog. Kev sis ntaus sis tua, kev tshaib kev nqhes hab kev mob kev nkeeg txhaj ua rua lub nroog poob rua cov yeebncuab teg. Tej kws koj has txhaj tshwm rua koj pum lawm tag.

²⁵Tug TSWV kws kaav ib puas tsaav yaam, koj kuas kuv yuav thaaj teb taabmeeg cov tuabneeg kws tuaj ua timkhawv, tabsis nwgnuav lub nroog yuav poob rua cov tuabneeg Npanpiloos teg.”

²⁶Tug TSWV has rua kuv tas,

²⁷“Kuv yog tug TSWV kws yog tuabneeg nplajteb tug Vaajtswv. Tsi muaj ib yaam dlaabtsi kws nyuaj rua kuv ua tsi tau le.

²⁸Kuv yuav muab lub nroog nuav cob rua Vaajntxwv Nenpukajnexales kws kaav tebchaws Npanpiloos hab nwg cov tubrog; puab yuav txeeb lub nroog,

²⁹hab tis suavtawg hlawv lub nroog. Suavtawg yuav kub lub nroog hab tej tsev kws puab moog hlawv khoom sau ruv tsev fij rua Npa-aas hab laub cawv txiv maab fij rua luas tej vaajtswv, txhaj ua rua kuv chim.

³⁰Cov Yixalayees hab cov Yudas yeej ibtxwm tsi ua lawv le kuv sab nyam hab tej kws puab ua, ua rua kuv chim.

³¹Cov tuabneeg kws nyob huv lub nroog nuav, ua rua kuv chim hab npautawg, txij nub kws puab pib rhawv lub nroog lug lawm. Kuv tub txav txim sab yuav muab lub nroog rhuav povtseg,

³²rua qhov cov Yudas hab cov tuabneeg kws nyob huv lub nroog Yeluxalees, cov vaajntxwv, cov thawjcoj, cov povthawj hab cov cevlug tau ua kev phem kev qas.

³³Txawm yog kuv qha puab taag rov qha dlua los puab tsi noog hab tsi xyum ua zoo; tabsis puab tig nrausqaum rua kuv.

³⁴Puab coj puab tej mlom kws phem qas lug tso rua huv lub Tuamtsev kws yog qhov chaw tuabneeg tuaj pehawm kuv hab ua rua kuv lub Tuamtsev tsi huv lawm.

³⁵Puab ua ib lub thaaj rua Npa-aas huv lub Haav Hinoos, coj puab tej tub tej ntxhais moog tua hlawv fij rua tug vaajtswv Maulej. Kuv tsi tau has kuas puab ua tej ntawd, hab kuv tsi tau xaav has tas, puab yuav ua tej ntawd kuas cov Yudas ua txhum.”

³⁶Tug TSWV kws yog cov Yixalayees tug Vaajtswv has rua kuv tas, “Yelemis, tej tuabneeg has tas kev tsuv kev rog, kev tshaib kev nqhes hab kev mob kev nkeeg yuav ua rua lub nroog nuav poob rua tug vaajntxwv kws kaav tebchaws Npanpiloos teg. Koj ca le noog, kuv yuav has dlua lwm yaam ntxiv hab.

³⁷Kuv yuav sau puab huv cov tebchaws kws kuv ntab puab moog nyob, thaus kuv chim hab npautawg rua puab, kuv yuav coj puab rov lug nyob qhov chaw nuav hab ca puab nyob kaaj sab lug.

³⁸Puab yuav ua kuv tsaav tuabneeg hab kuv yuav ua puab tug Vaajtswv.

³⁹Kuv xaav pub puab ua ib lub sab hab taug ib txujkev, kuas puab fwm kuv txhua lub sijhawm, puab hab puab tej xeebntxwv txhaj tau lub neej zoo.

⁴⁰Kuv yuav coglug rua puab kuas nyob moog ibtxhis. Kuv yuav ua zoo rua puab moog le, hab kuv yuav ua kuas puab fwm kuv kawg sab kawg ntsws, puab txhaj tsi tso kuv tseg.

⁴¹Kuv yuav txaus sab ua txhua yaam zoo rua puab hab pub kuas puab nyob ruaj rua huv lub tebchaws nuav moog le.

⁴²“Kuv tau tso kev txomnyem lug rua tsaav tuabneeg nuav npaum le caag, kuv yuav pub tej kws zoo rua puab npaum le ntawd, lawv le kuv tau coglug tseg lawm.

⁴³Tej tuabneeg has tas, lub tebchaws nuav yuav ua suabpuam, tsi muaj tuabneeg lossis tsaj nyob hab yuav muab cob rua cov Npanpiloos. Tabsis tseem muaj tuabneeg yuav laj yuav teb huv lub tebchaws nuav dlua ib zag ntxiv.

⁴⁴Yuav muaj tuabneeg yuav laj yuav teb, ua ntawv suam npe, nas homthawj rua hab kuas tuabneeg tuaj ua timkhawv. Puab yuav ua le nuav nyob rua huv xeem Npeenyamees cheebtsaam aav, huv tej zog kws nyob ibncig lub nroog Yeluxalees, huv cov Yudas tej nroog, cov nroog kws nyob sau tej laaj roob, nyob lawv tej taw roob hab huv tebchaws Yudas saab qaabteb. Kuv yuav coj puab rov lug nyob huv puab lub tebchaws. Kuv yog tug TSWV kws has le ntawd.”