Read Hmong Njua Yelemis 33 Bible Online

Yelemis 33 - Hmong Njua bible

Yelemis 33

¹Thaus kws kuv tseem raug kaw nyob huv chaav kws cov tub faajxwm zuv, tug TSWV rov has rua kuv dlua.

²Tug TSWV kws tsim lub nplajteb, rhawv lub nplajteb hab muab txawb nyob muaj chaw, nwg lub npe hu ua tug TSWV, yog tug kws has rua kuv tas,

³“Koj ca le thov kuv, kuv yuav teb koj; kuv yuav qha tej txujci tseemceeb kws koj tsi tau paub rua koj.

⁴Kuv yog tug TSWV kws yog cov Yixalayees tug Vaajtswv has tas, luas yuav tuaj vij lub nroog Yeluxalees muab tej tsev kws nyob huv lub nroog hab cov Yudas tug vaajntxwv lub loog rhuav kuas puamtsuaj taag.

⁵Cov Yudas ibtxha yuav sawv tawmtsaam cov Npanpiloos, tabsis vim kuv txujkev chim hab npautawg, kuv yuav muab puab tua kuas tuag pawg lug rua txhua qhov. Kuv tso lub nroog nuav tseg, vim cov tuabneeg kws nyob huv ua phem ua qas.

⁶Tabsis kuv yuav khu lub nroog hab nwg cov tuabneeg kuas noj qaab nyob zoo. Kuv yuav pub kuas puab nyob tso sab lug tsi ntshai dlaabtsi.

⁷Kuv yuav pub kuas cov Yudas hab cov Yixalayees muaj kev vaammeej, hab kuv yuav txhim khu puab lub neej ib yaam le yaav thaus u.

⁸Txawm yog puab ntxeev sab hab ua txhum tawmtsaam kuv los kuv yuav zaam puab lub txim hab ntxuav puab tej kev txhum.

⁹Yeluxalees yuav ua qhov chaw rua kuv zoo sab, tau koob meej hab tau ntsejmuag, txhua tsaav tuabneeg thoob nplajteb yuav ntshai ua ib ce tshee nyo thaus puab nov tej txujci tseemceeb kws kuv ua rua cov tuabneeg kws nyob huv Yeluxalees hab tej kev vaammeej kws kuv pub rua lub nroog ntawd.”

¹⁰Tug TSWV has tas, “Tej tuabneeg sis thaam has tas, qhov chaw nuav zoo ib yaam le lub taj suabpuam kws tsi muaj tuabneeg lossis tsaj nyob. Yeej yog le puab has tag; cov Yudas tej nroog yuav tsi muaj tuabneeg lossis tsaj nyob hab tej kev huv lub nroog Yeluxalees yuav tsi muaj tuabneeg taug le. Tabsis mej yuav nov has tas qhov chaw ntawd

¹¹rov muaj suab zoo sab hab suab noj tshoob haus kug. Mej yuav nov suab hu nkauj zoo sab hab coj khoom ua tsaug tuaj fij rua kuv huv lub Tuamtsev; puab yuav has tas, “ ‘Ca le ua tug TSWV kws muaj Fwjchim Luj kawg nkaus tsaug, rua qhov nwg yog tug muaj sab dlawb sab zoo hab nwg txujkev hlub nyob moog ibtxhis.’ Kuv yuav ua kuas lub tebchaws nuav rov vaammeej ib yaam le thaus u. Kuv yog tug TSWV kws has le ntawd.”

¹²Tug TSWV kws muaj Fwjchim Luj kawg nkaus has tas, “Lub tebchaws nuav zoo ib yaam le lub taj suabpuam, tsi muaj tuabneeg lossis tsaj nyob, tabsis yuav rov ua tshaav zaub rua cov tub yug yaaj coj puab tej yaaj moog noj zaub.

¹³Cov tub yug yaaj yuav txheeb puab tej yaaj nyob huv tej nroog, sau tej laaj roob, ntawm tej taw roob, huv tebchaws Yudas saab qaabteb, huv xeem Npeenyamees cheebtsaam aav, huv tej zog kws nyob ibncig lub nroog Yeluxalees hab huv cov Yudas tej nroog. Kuv yog tug TSWV kws has le ntawd.”

¹⁴Tug TSWV has tas, “Tub yuav txug lub sijhawm kws kuv ua kuas txhua yaam tav lawv le kuv tej lug cog tseg rua cov Yudas hab cov Yixalayees.

¹⁵Thaus txug lub sijhawm ntawd kuv yuav xaiv Daviv ib tug xeebntxwv kws ncaaj nceeg lug ua vaajntxwv. Tug vaajntxwv ntawd yuav kaav lub tebchaws ncaaj nceeg.

¹⁶Kuv yuav cawm cov Yudas hab cov tuabneeg huv lub nroog Yeluxalees kuas dlim hab nyob kaaj sab lug. Luas yuav hu lub nroog has tas, ‘Tug TSWV kws Yog Peb Txujkev Cawm Dlim.’

¹⁷Tug TSWV has tas, Daviv yuav muaj xeebntxwv lug ua vaajntxwv kaav cov Yixalayees tsi tu ncua,

¹⁸hab xeem Levis yuav tau ua povthawj ua kuv teg num kws yog muab tsaj, qoobloo hab tej khoom theej txhoj hlawv fij tsi tu ncua rua kuv.”

¹⁹Tug TSWV has rua kuv tas,

²⁰“Kuv coglug rua nruab nub hab mo ntuj, kuas nyag moog lawv le nyag lub caij; lu lug cog tseg ntawd tsi muaj leejtwg rhuav tau le.

²¹Kuv tau coglug tseg rua kuv tug tubkhai Daviv ib yaam le ntawd has tas, nwg caajceg yuav tau ua vaajntxwv tsi tu ncua, hab cov povthawj kws yog xeem Levis los yuav tau ua kuv teg num moog le; tej lug cog tseg nuav los tsi pub leejtwg rhuav tau le.

²²Kuv yuav pub kuas kuv tug tubkhai Daviv cov xeebntxwv hab cov povthawj kws yog xeem Levis fuamvaam coob ib yaam le tej nubqub sau nruab ntug hab tej xuabzeb ntawm ntug havtxwv kws tsi muaj leejtwg suav txheeb.”

²³Tug TSWV has rua kuv tas,

²⁴“Koj puas nov tej tuabneeg has tas, kuv tub muab ob tsev tuabneeg kws yog cov Yudas hab cov Yixalayees kws kuv xaiv ntawd tso tseg lawm? Vim le ntawd, luas txhaj saib tsi taug kuv tsaav tuabneeg hab tsi suav has tas puab yog ib tsaav tuabneeg le.

²⁵Tabsis kuv kws yog tug TSWV, kuv tub coglug rua nruab nub hab mo ntuj, hab ua kuas muaj kevcai tswj lub nplajteb hab lub ntuj.

²⁶Yeej yuav muaj tseeb lawv le kuv tej lug cog tseg nuav, yog le ntawd, kuv yuav tsi hloov tej lug kws kuv cog tseg rua Yakhauj cov xeebntxwv hab kuv tug tubkhai Daviv. Kuv yuav xaiv Daviv cov xeebntxwv ib tug lug ua thawjcoj kaav Anplahaas, Ixaj hab Yakhauj cov xeebntxwv. Kuv yuav taabncuab kuv tsaav tuabneeg hab pub kuas puab rov vaammeej dlua.”