Read Hmong Njua Yelemis 35 Bible Online

Yelemis 35 - Hmong Njua bible

Yelemis 35

¹Thaus kws Yauxiyas tug tub Yehauyakees ua vaajntxwv kaav tebchaws Yudas, tug TSWV has rua kuv tas,

²“Koj ca le moog ntsib Lekhas cuab kwvtij hab nrug puab thaam. Hab coj puab tuaj rua huv lub Tuamtsev ib chaav hab muab cawv txiv maab rua puab haus.”

³Yog le ntawd, kuv txhaj coj Yaxaniyas kws yog dlua ib tug Yelemis tug tub, (Tug Yelemis nuav yog Hanpaxiniyas tug tub) hab taagnrho Yaxaniyas cov kwvtij hab cov tub kws yog Lekhas cuab kwvtij tuaj

⁴rua huv lub Tuamtsev. Kuv coj puab moog rua huv Idaliyas kws yog tug cevlug tug tub Hanaas cov tub chaav tsev. Chaav tsev nuav nyob txheej sau kws ncaaj ntawm Salumes tug tub Ma-axeyas chaav. Ma-axeyas yog tug zuv lub Tuamtsev tej qhovrooj.

⁵Kuv muab ib cov fwj kws muaj cawv puv nkaus hab ib cov khob lug txawb rua ntawm Lekhas cuab kwvtij xubndlag, hab kuv has rua puab tas, “Suavdlawg haus cawv.”

⁶Tabsis puab teb has tas, “Peb tsi haus cawv. Peb yawmkoob Yaunadas kws yog Lekhas tug tub qha rua peb has tas, kuas peb lossis peb cov xeebntxwv tsi xob haus cawv hlo le.

⁷Nwg tseem qha ntxiv has tas, peb tsi xob ua vaaj ua tsev lossis ua laj ua teb lossis cog txiv maab lossis yuav cawv txiv maab le. Hab nwg saamfwm ntxiv has tas, kuas peb nyob tsevntaub xwb, peb txhaj tau nyob ntev huv lub tebchaws nuav, ib yaam le cov tuabneeg kws tsi muaj tebchaws.

⁸Peb yeej ibtxwm noog peb yawmkoob Yaunadas kws yog Lekhas tug tub tej lug kws nwg ntuag peb. Peb cov nuav ibtxwm tsi haus cawv txiv maab, peb tej quaspuj mivnyuas los yeej tsi haus le.

⁹Peb yeej tsi ua vaaj ua tsev nyob, peb nyob tsevntaub xwb, hab peb tsi muaj vaaj txiv maab, tsi muaj laj teb lossis qoobloo. Peb ua txhua yaam lawv le peb yawmkoob Yaunadas qha rua peb lawm.

¹¹Tabsis thaus Vaajntxwv Nenpukajnexales tuaj tua lub tebchaws nuav, peb txhaj tsiv tuaj rua huv lub nroog Yeluxalees kuas peb dlim ntawm cov Npanpiloos hab cov Xilias tej tubrog xwb. Tub yog vim le ntawd, peb txhaj lug nyob huv lub nroog Yeluxalees nuav.”

¹²Tug TSWV kws yog cov Yixalayees tug Vaajtswv kws muaj Fwjchim Luj kawg nkaus, kuas kuv moog has rua cov Yudas hab cov tuabneeg kws nyob huv lub nroog Yeluxalees has tas, “Kuv yog tug TSWV, kuv nug mej has tas, vim le caag mej tsi noog kuv lug hab tsi ua lawv le kuv has?

¹⁴Yaunadas cov xeebntxwv noog nwg lug, hab puab tsi haus cawv txiv maab lug txug naj nub nua. Kuv qha mej ua ntu zug, tabsis mej tsi noog kuv lug.

¹⁵Kuv khaiv kuv cov tubkhai kws yog cov cevlug tuaj qha mej tsi tu ncua, puab qha kuas mej tso mej tej kev phem kev qas tseg hab ua qhov zoo. Puab ntuag kuas mej tsi xob pe mlom hab teev lwm tsaav tuabneeg tej vaajtswv, mej txhaj yuav tau moog nyob huv lub tebchaws kws kuv muab rua mej cov yawmkoob lawm. Tabsis mej yeej tsi noog hab tsi quavntsej kuv tej lug le.

¹⁶Yaunadas cov xeebntxwv ua lawv le puab yawmkoob tej lug saamfwm, tabsis mej tsi noog kuv lug le.

¹⁷Yog le ntawd, kuv yog tug TSWV kws yog cov Yixalayees tug Vaajtswv kws muaj Fwjchim Luj kawg nkaus yuav tso tej kev puamtsuaj lug raug mej cov Yudas hab cov tuabneeg kws nyob huv lub nroog Yeluxalees lawv le kuv has tseg lawm. Kuv yuav ua le nuav, rua qhov mej tsi noog kuv lug hab mej tsi teb kuv thaus kuv hu mej.”

¹⁸Kuv txhaj has rua Lekhas cuab kwvtij tas, tug TSWV kws yog cov Yixalayees tug Vaajtswv kws muaj Fwjchim Luj kawg nkaus has tas, “Mej noog mej yawmkoob Yaunadas tej lug kws nwg saamfwm rua mej; mej ua lawv le nwg tej lug qha, hab mej ua txhua yaam lawv le nwg saamfwm.

¹⁹Yog le ntawd, kuv yog tug TSWV kws yog cov Yixalayees tug Vaajtswv kws muaj Fwjchim Luj kawg nkaus coglug has tas, Lekhas tug tub Yaunadas yuav muaj xeebntxwv lug ua kuv teg num moog le.”