Read Hmong Njua Yelemis 36 Bible Online

Yelemis 36 - Hmong Njua bible

Yelemis 36

¹Thaus Yauxiyas tug tub Yehauyakees ua vaajntxwv kaav tebchaws Yudas tau plaub xyoos, tug TSWV has rua kuv tas,

²“Koj moog muab ib thooj ntawv lug sau tej kws kuv qha rua koj txug cov Yixalayees, cov Yudas hab txhua tsaav tuabneeg. Ca le sau txhua yaam kws kuv qha rua koj, txij thaus Yauxiyas ua vaajntxwv kaav tebchaws Yudas lug txug naj nub nua.

³Thaus cov Yudas nov has tas, kuv yuav ua kuas puab puamtsuaj, tej zag puab yuav tseg tsi ua kev phem kev qas lawm. Kuv yuav zaam puab lub txim hab tej kev phem kev qas kws puab ua.”

⁴Kuv txawm hu Neliyas tug tub Npalus tuaj hab kuv pav txhua yaam kws tug TSWV qha rua kuv lawm, rua Npalus sau rua huv ib thooj ntawv.

⁵Tom qaab ntawd, kuv has rua Npalus has tas, “Luas txwv tsi pub kuv moog rua huv lub Tuamtsev.

⁶Yog le ntawd, nub kws suavdlawg tuaj yoo mov huv lub Tuamtsev lawv le kevcai, kuv xaav kuas koj moog rua tod, hab nyeem thooj ntawv kws tug TSWV kuas kuv pav rua koj sau rua suavdlawg noog, puab txhaj nov txhua yaam kws tug TSWV has rua kuv. Koj yuavtsum coj moog nyeem rua qhov chaw kws suavdlawg nov, kuas cov Yudas kws tuaj huv puab tej nroog tuaj tau nov txhij txhua.

⁷Tej zag puab yuav thov tug TSWV hab tso puab tej kev txhum tseg, rua qhov tug TSWV qha has tas, nwg yuav rau txim rua puab, vim nwg chim hab npautawg heev.”

⁸Npalus txhaj moog nyeem tug TSWV tej lug huv lub Tuamtsev rua suavdlawg noog lawv le kuv has.

⁹Thaus Yehauyakees ua vaajntxwv kaav tebchaws Yudas tau tsib xyoos hab cuaj hlis, cov tuabneeg kws nyob huv Yeluxalees hab cov Yudas txawm tuaj rua huv puab tej nroog tuaj yoo mov lawv le kevcai, kuas tug TSWV txaus sab rua puab.

¹⁰Thaus Npalus taabtom nyeem thooj ntawv kws sau tej lug kws tug TSWV qha rua kuv rua suavdlawg noog huv lub Tuamtsev. Npalus sawv huv Safas tug tub Nkemaliyas kws yog tug teev ntawv chaav. Chaav ntawd nyob txheej sau, ze ntawm lub Roojvaag Tshab kws moog rua huv lub Tuamtsev.

¹¹Thaus Nkemaliyas tug tub Mikayas kws yog Safas tug xeebntxwv noog Npalus nyeem tug TSWV txujlug huv thooj ntawv taag lawm,

¹²Mikayas txawm moog rua huv tug teev ntawv chaav tsev ua num huv vaajntxwv lub loog. Muaj cov numtswv ntau leej tuaj nyob huv saablaaj. Cov numtswv ntawd yog tug teev ntawv Elisamas, Semayas tug tub Delayas, Akhenpaus tug tub Enathaas, Safas tug tub Nkemaliyas, Hanayas tug tub Xedekiyas hab cov numtswv ntau leej tuaj nyob huv.

¹³Mikayas txhaj pav tej kws nwg nov Npalus nyeem rua cov pejxeem noog ntawd txhua yaam rua cov numtswv.

¹⁴Thaus ntawd cov numtswv txhaj khaiv Nethaniyas tug tub Yehudis, (Yehudis yawm yog Selemiyas, hab nwg yawmkoob yog Kusis), moog has kuas Npalus coj thooj ntawv kws nwg nyeem rua suavdlawg noog tuaj rua puab saib. Npalus txhaj nqaa thooj ntawv ntawd moog rua puab.

¹⁵Puab has rua Npalus has tas, “Koj ca le nyob quastsawg hab nyeem thooj ntawv rua peb noog” Yog le ntawd, Npalus txhaj nyeem rua puab noog.

¹⁶Thaus nwg nyeem cov lug ntawd taag, puab ntshai heev, ib leeg saib ib leeg hab puab has rua Npalus tas, “Peb yuavtsum moog qha zaaj nuav rua vaajntxwv paub.”

¹⁷Cov numtswv nug Npalus has tas, “Koj ca le qha rua peb saib ua le caag koj txhaj sau tau tej lug nuav? Puas yog Yelemis pav rua koj sau?”

¹⁸Npalus teb has tas, “Yelemis pav tej lug nuav txhua lu rua kuv, kuv txhaj muab cwjmem sau tej lug ntawd rua huv thooj ntawv nuav.”

¹⁹Cov numtswv has rua Npalus has tas, “Koj hab Yelemis ca le tsiv moog nkaum tsi xob pub leejtwg paub has tas meb nyob qhov twg le.”

²⁰Cov numtswv muab thooj ntawv ntawd khaws ca rua huv Elisamas kws yog tug teev ntawv chaav tsev ua num, puab txawm moog rua huv vaajntxwv chaav tsev, hab pav txhua yaam rua vaajntxwv noog.

²¹Vaajntxwv kuas Yehudis moog muab thooj ntawv lug rua nwg. Yehudis txhaj moog rua huv Elisamas chaav tsev ua num hab nqaa thooj ntawv ntawd lug nyeem rua vaajntxwv hab cov numtswv kws sawv puagncig vaajntxwv noog.

²²Thaus ntawd yog lub caij ntuj no, vaajntxwv nyob quastsawg nte tawg huv nwg lub loog chaav kws rauv tawg.

²³Thaus Yehudis nyeem taag peb plaub ntus lawm vaajntxwv txawm muab chais hlais tej ntu kws nyeem taag lawm pov hlawv. Nwg pheej hlais ib ntus quas zug le ntawd pov hlawv moog txug thaus thooj ntawv ntawd taag.

²⁴Tabsis tsi pum vaajntxwv hab nwg cov numtswv ntshai lossis nyuaj sab txug tej kws puab nov ntawd le.

²⁵Txawm yog Enathaas, Delayas hab Nkemaliyas puab thov kuas vaajntxwv tsi xob muab thooj ntawv ntawd hlawv los vaajntxwv tsi noog puab has le.

²⁶Tom qaab ntawd, vaajntxwv kuas Yelamees kws yog vaajntxwv tug tub nrug Aliyees tug tub Selayas hab Anpedees tug tub Selemiyas tuaj nteg kuv hab Npalus kws yog kuv tug teev ntawv. Tabsis tug TSWV muab wb zais lawm.

²⁷Thaus Vaajntxwv Yehauyakees muab thooj ntawv kws kuv pav rua Npalus sau ntawd hlawv taag lawm, tug TSWV kuas kuv

²⁸muab dlua ib thooj ntawv lug sau txhua yaam lawv le sau rua thawj thooj ntawv lawm.

²⁹Tug TSWV kuas kuv sau rua Yehauyakees has tas, “Koj muab thooj ntawv ntawd hlawv, hab koj nug Yelemis has tas, vim le caag nwg txhaj sau has tas, tug vaajntxwv kws kaav tebchaws Npanpiloos yuav tuaj tua lub tebchaws nuav, luas yuav tua tej tuabneeg hab tej tsaj txhu kuas tuag taag.

³⁰Yog le ntawd, nwgnuav kuv kws yog tug TSWV has rua koj kws yog Vaajntxwv Yehauyakees paub has tas, koj cov xeebntxwv yuav tsi muaj ib tug tau nyob sau Daviv lub zwmtxwv kaav tebchaws le lawm. Luas yuav muab koj lub cev tuag pov rua saab nrau. Nruab nub tshaav ntuj yuav zab, hab mo ntuj yuav tsau lwg tsawv.

³¹Kuv yuav rau txim rua koj, koj cov xeebntxwv hab koj cov numtswv, vim tej kev txhum kws mej ua, tsi has koj lossis koj cov pejxeem kws nyob huv lub nroog Yeluxalees hab cov Yudas puavleej tsi noog kuv tej lug ntuag, yog le ntawd, kuv yuav ua kuas mej puamtsuaj lawv le kuv tau has tseg lawm.”

³²Tom qaab ntawd, kuv muab dlua ib thooj ntawv lug rua Npalus kws yog kuv tug teev ntawv, nwg yog Neliyas tug tub kuas nwg sau txhua yaam lawv le kuv pav rua nwg. Nwg sau txhua yaam lawv le cov lug kws kuv pav rua nwg sau rua thawj thooj ntawv lawm.