Read Hmong Njua Yelemis 37 Bible Online

Yelemis 37 - Hmong Njua bible

Yelemis 37

¹Vaajntxwv Nenpukajnexales kws kaav tebchaws Npanpiloos tsaa Yauxiyas tug tub Xedekiyas ua vaajntxwv kaav tebchaws Yudas hloov Yehauyakees tug tub Yehauyakhees.

²Tabsis Xedekiyas cov numtswv lossis cov pejxeem tsi noog tej lug kws tug TSWV kuas kuv has rua puab le.

³Vaajntxwv Xedekiyas khaiv Selemiyas tug tub Yehukales hab Ma-axeyas tug tub Xefaniyas kws ua povthawj tuaj kuas kuv thov tug TSWV kws yog peb tug Vaajtswv paab peb tsaav tuabneeg.

⁴Thaus ntawd luas tseem tsi tau coj kuv moog kaw. Kuv tseem nyob ywjpheej hab moog lug ib yaam le suavdlawg.

⁵Thaus cov tubrog Npanpiloos taabtom vij lub nroog Yeluxalees, puab nov has tas cov tubrog Iziv tub hlaa Iziv tug nrimteb tuaj lawm, ces cov tubrog Npanpiloos txawm ca le thim rov qaab.

⁶Tom qaab ntawd tug TSWV kws yog cov Yixalayees tug Vaajtswv kuas kuv

⁷has rua Xedekiyas has tas, “Iziv cov tubrog kws tuaj paab mej, puab yuav rov moog tsev.

⁸Ces cov tubrog Npanpiloos yuav rov tuaj tua, txeeb lub nroog hab muab hlawv povtseg.

⁹Kuv kws yog tug TSWV has rua mej tas, mej tsi xob tso sab has tas cov Npanpiloos yuav tsi rov tuaj tua mej lawm. Puab yeej yuav rov tuaj xwb.

¹⁰Txawm yog mej tua cov tubrog Npanpiloos swb lawm los tshuav puab cov tubrog kws raug mob pw huv tej tsevntaub tseem yuav sawv lug hlawv lub nroog povtseg.”

¹¹Cov tubrog Npanpiloos thim ntawm lub nroog Yeluxalees moog, rua qhov cov tubrog Iziv tuaj ze lawm.

¹²Yog le ntawd, kuv txhaj sawv kev tawm huv lub nroog Yeluxalees moog rua peg xeem Npeenyamees cheebtsaam aav, moog saws kuv tsev tuabneeg thaaj aav ua kuv tug.

¹³Tabsis thaus kuv moog txug ntawm lub Roojvaag Npeenyamees, Selemiyas tug tub Iliyas kws yog Hanayas tug xeebntxwv, hab yog tug thawj saib cov tubrog zuv roojvaag, txawm thaiv kuv kev hab has rua kuv tas, “Koj yuav moog thawj cov Npanpiloos puas yog?”

¹⁴Kuv teb has tas, “Tsi yog le koj has. Tsi yog kuv moog thawj puab.” Tabsis Iliyas tsi ntseeg kuv, nwg ca le nteg kuv moog cuag cov numtswv.

¹⁵Cov numtswv npautawg heev rua kuv, puab txhaj kuas luas nplawm kuv hab coj kuv moog kaw rua huv Yaunathaas kws yog ib tug teev ntawv lub tsev, luas muab lub tsev ntawd ua tsev lojcuj.

¹⁶Puab muab kuv kaw rua txheej huv aav, kuv nyob rua huv tau ntev loo.

¹⁷Tom qaab ntawd, Vaajntxwv Xedekiyas khaiv tuabneeg tuaj tso kuv tawm lug. Vaajntxwv nug kuv tuabywv huv nwg lub loog has tas, “Tug TSWV puas muaj dlaabtsi has rua koj?” Kuv teb has tas, “Muaj, tug TSWV has tas, nwg yuav muab koj cob rua tug vaajntxwv kws kaav tebchaws Npanpiloos.”

¹⁸Kuv nug Xedekiyas has tas, “Kuv ua txhum dlaabtsi rua koj hab koj cov numtswv lossis koj cov pejxeem, koj txhaj nteg kuv moog kaw rua huv tsev lojcuj?

¹⁹Koj cov cevlug kws has rua koj tas, tug vaajntxwv kws kaav tebchaws Npanpiloos yuav tsi tuaj tua koj lossis lub tebchaws nuav dlua twg taag lawm?

²⁰Vaajntxwv, thov koj noog hab ua lawv le tej lug kws kuv thov koj. Thov koj tsi xob xaa kuv rov moog kaw rua huv Yaunathaas lub tsev lawm. Yog koj ua le ntawd, kuv yeej yuav tuag rua tod xwb.”

²¹Yog le ntawd, Vaajntxwv Xedekiyas txhaj kuas luas muab kuv kaw rua huv nwg lub loog ib chaav kws muaj tubrog zuv, hab nwg kuas cov tuabneeg cub ncuav ntawm ntug kev nqaa ncuav tuaj rua kuv noj txhua nub nyob qhov ntawd moog txug thaus tsi muaj ncuav nyob huv lub nroog le lawm.