Read Hmong Njua Yelemis 38 Bible Online

Yelemis 38 - Hmong Njua bible

Yelemis 38

¹Mathaas tug tub Sefatiyas, Pasehus tug tub Nkedaliyas, Selemiyas tug tub Yehukales hab Makhiyas tug tub Pasehus nov tug TSWV tej lug kws kuv qha puab

²has tas, “Yog leejtwg nyob huv lub nroog nuav yuav tuag taag rua nav ntaaj nav rag lossis kev tshaib kev nqhes lossis kaab mob kev nkeeg. Tabsis yog leejtwg moog thawj cov Npanpiloos, nwg yuav dlim txujsa tsi raug luas tua.”

³Kuv has rua puab tas, tug TSWV has le nuav: “Kuv yuav muab lub nroog nuav cob rua tug vaajntxwv kws kaav tebchaws Npanpiloos tej tubrog, hab puab yuav txeeb tau lub nroog.”

⁴Cov numtswv txhaj moog has rua vaajntxwv has tas, “Tsimnyog muab tug txivneej nuav tua povtseg, rua qhov nwg has tej lug nuav ua rua cov tubrog kws nyob huv lub nroog poob sab, hab nwg has ib yaam le ntawd rua cov tuabneeg kws tseem nyob huv lub nroog. Nwg tsi nrhav kev paab suavdlawg, nwg tsuas xaav kuas suavdlawg ntxhuv sab xwb.”

⁵Vaajntxwv Xedekiyas teb has tas, “ca le ua lawv le mej has! Mej yuav ua le caag rua nwg los nyob ntawm mej; kuv tsi txwv mej le.”

⁶Yog le ntawd, cov numtswv txhaj tuaj coj kuv moog hab muab hlua dlauv kuv rua huv vaajntxwv tug tub Makhiyas lub qhov tshij kws nyob huv lub tshaav puam ntawm vaajntxwv lub loog. Lub qhov tshij ntawd tsi muaj dlej, tsuas muaj aav nkus xwb, kuv txhaj nyob tsau tsawv cov aav nkus ntawd.

⁷Enpemelej kws yog tuabneeg Sudaas ua num nyob huv vaajntxwv lub loog nov has tas, puab coj kuv moog tso rua huv lub qhov tshij qhuav lawm. Thaus ntawd vaajntxwv tseem nrug nwg cov numtswv saablaaj ntawm lub Roojvaag Npeenyamees.

⁸Yog le ntawd, Enpemelej txhaj moog qha rua vaajntxwv has tas,

⁹“Vaajntxwv, tej kws cov tuabneeg nuav ua rua Yelemis, puab ua tsi yog lawm, puab coj nwg moog kaw rua huv lub qhov tshij qhuav, ces nwg yeej yuav tuag tshaib xwb, rua qhov tsi muaj mov nyob huv lub nroog nuav le lawm.”

¹⁰Thaus vaajntxwv nov le ntawd, nwg kuas Enpemelej coj peb tug tuabneeg nrug nwg tuaj nqug kuv tawm huv lub qhov tshij ntawd lug ua ntej kuv tuag.

¹¹Enpemelej txhaj coj cov txivneej ntawd nrug nwg moog huv chaav tsev rau khoom huv vaajntxwv lub loog hab muab tej qub rig tsho ua hlua dlauv lug rua kuv.

¹²Nwg has kuas kuv muab tej qub rig tsho ntawd xab kuv ob lub qhovtsus, txuj hlua txhaj tsi zawm kuv. Kuv txhaj ua le ntawd,

¹³puab txhaj muab hlua nqug kuv tawm huv lub qhov tshij qhuav lug. Puab coj kuv rov lug nyob huv chaav kws muaj tubrog zuv huv vaajntxwv lub loog.

¹⁴Vaajntxwv Xedekiyas kuas tuabneeg tuaj coj kuv moog cuag nwg ntawm lub Tuamtsev lub qhovrooj peb. Vaajntxwv has rua kuv tas, “Kuv yuav nug koj ib lus, koj ca le qha ncaaj rua kuv tsi xob zais le.”

¹⁵Kuv teb nwg has tas, “Yog kuv qha tseeb rua koj, koj yuav muab kuv tua povtseg, hab yog kuv paab koj tuavxaam los koj yuav tsi noog kuv tej lug.”

¹⁶Vaajntxwv Xedekiyas coglug tuabywv rua kuv has tas, “Vaajtswv yog tug muaj sa nyob, nwg pub peb muaj sa, nwg nyob sau pum, kuv yuav tsi tua koj lossis muab koj cob rua cov tuabneeg kws xaav muab koj tua povtseg.”

¹⁷Kuv has rua Xedekiyas has tas, “Tug TSWV kws yog cov Yixalayees tug Vaajtswv kws muaj Fwjchim Luj kawg nkaus has le nuav: yog koj yeem moog thawj tug vaajntxwv kws kaav tebchaws Npanpiloos tej tubrog, luas yuav tsi tua koj hab tsi hlawv lub nroog nuav. Koj hab koj tsev tuabneeg yuav muaj sa nyob,

¹⁸tabsis yog koj tsi yeem moog thawj luas, ces kuv yuav muab lub nroog nuav cob rua tug vaajntxwv kws kaav tebchaws Npanpiloos cov tubrog, puab yuav muab lub nroog nuav hlawv hab koj yuav tsiv tsi dlim ntawm puab le.”

¹⁹Tabsis Vaajntxwv Xedekiyas teb has tas, “Kuv ntshai nyob tsaam cov Npanpiloos muab kuv cob rua peb cov tuabneeg Yudas kws tub tsiv moog thawj puab lawm tsimtxom xwb.”

²⁰Kuv has rua vaajntxwv has tas, “Yuav tsi muaj leejtwg muab koj cob rua cov tuabneeg ntawd. Kuv thov kuas koj ua lawv le tug TSWV tej lug kws kuv qha rua koj nuav, koj txhaj tsi raug luas tua hab nyob tso sab plhuav.

²¹Tabsis yog koj tsi yeem moog thawj cov tubrog Npanpiloos, ces yuav muaj lawv le tug TSWV ua rua kuv ua ywgtoog pum lawm.

²²Huv zaaj ywgtoog ntawd, kuv pum tej quaspuj kws seem nyob huv tug vaajntxwv kws kaav tebchaws Yudas lub loog raug luas coj moog cob rua tug vaajntxwv kws kaav tebchaws Npanpiloos tej tubrog. Koj ca le noog tej lug kws cov quaspuj sis thaam thaus puab taug kev has tas: ‘Vaajntxwv tej phoojywg tau dlaag ntxag nwg, puab yuam nwg ua lawv le puab sab xaav. Nwgnuav nwg ob txhais kutaw zum paag aav lawm, nwg tej phoojywg tsiv taag hab tso nwg tseg.’ ”

²³Tom qaab ntawd kuv has tas, “Luas yuav coj koj tej quaspuj tubse moog cob rua cov Npanpiloos, txawm yog koj los yuav tsi dlim le. Tug vaajntxwv kws kaav tebchaws Npanpiloos yuav nteg koj hab muab lub nroog nuav hlawv povtseg.”

²⁴Vaajntxwv Xedekiyas teb has tas, “Koj tsi xob qha tej nuav rua leejtwg paub, luas txhaj tsi tua koj.

²⁵Yog cov numtswv paub has tas kuv tuaj nrug koj thaam, puab yuav nug koj saib wb tau sis thaam dlaabtsi. Puab yuav has tas, yog koj qha tej nuav rua puab, puab yuav tsi tua koj povtseg.

²⁶Koj ca le has rua puab tas, yog koj tuaj thov kuas kuv tsi xob xaa koj rov moog kaw kuas tuag rua tom tsev lojcuj xwb.”

²⁷Tom qaab ntawd cov numtswv txawm tuaj nrhav kuv hab nug kuv. Kuv qha rua puab lawv le kws vaajntxwv has rua kuv, ces puab txawm tsi nug kuv ntxiv lawm, rua qhov tsi muaj leejtwg nov zaaj kws wb sis thaam ntawd le.

²⁸Luas kaav kuv nruj nyob rua huv chaav kws muaj tubrog zuv huv vaajntxwv lub loog moog txug nub kws luas txeeb tau lub nroog Yeluxalees lawm.