Read Hmong Njua Yelemis 39 Bible Online

Yelemis 39 - Hmong Njua bible

Yelemis 39

¹Thaus Xedekiyas ua vaajntxwv kaav tebchaws Yudas tau cuaj xyoos, lub kaum hli ntuj, Vaajntxwv Nenpukajnexales kws kaav tebchaws Npanpiloos coj taagnrho nwg cov tubrog tuaj tua lub nroog Yeluxalees.

²Thaus Xedekiyas ua vaajntxwv kaav tebchaws Yudas tau kaum ib xyoos, nub xab cuag lub plaub hlis ntuj, luas tuaj tsoo tug ntsaa yeej moog rua huv lub nroog.

³(Thaus luas txeeb tau lub nroog Yeluxalees lawm, tug vaajntxwv kws kaav tebchaws Npanpiloos cov numtswv txawm lug teeb chaw ua num rua ntawm lub Roojvaag Nruab Nraab. Cov numtswv ntawd yog: Nenkas Salexes, Xaankas Nenpaus, Xaxekhimes, hab muaj dlua ib tug Nenkas Salexes.)

⁴Thaus Vaajntxwv Xedekiyas hab nwg cov tubrog pum tej xwm nuav, puab tawm tsiv thaus ib taag mo hlaa vaajntxwv lub vaaj moog rua ntawm lub roojvaag kws nyob kem nruab nraab ntawm ob txheej ntsaa yeej moog rua tom lub Haav Yauladees lawm.

⁵Tabsis cov tubrog Npanpiloos caum puab qaab moog nteg tau Vaajntxwv Xedekiyas ntawm lub taj nraag kws nyob ze lub nroog Yelikaus. Puab coj nwg moog cob rua Vaajntxwv Nenpukajnexales ntawm lub nroog Lilas kws nyob huv cheebtsaam Hamas, hab Nenpukajnexales txav txim rua Xedekiyas qhov ntawd.

⁶Nenpukajnexales muab Xedekiyas cov tub tua taabmeeg Xedekiyas huv lub nroog Lilas, hab nwg kuas luas muab cov Yudas tej numtswv tua huv tuabsi.

⁷Tom qaab ntawd nwg muab Xedekiyas ob lub qhovmuag kaus povtseg hab muab saw hlau khi Xedekiyas caab moog rua tebchaws Npanpiloos lawm.

⁸Thaus ntawd cov tubrog Npanpiloos hlawv Xedekiyas lub loog hab cov pejxeem tej vaaj tse kub nyab taag, hab tsoo lub nroog Yeluxalees tug ntsaa yeej pob taag.

⁹Thaus kawg, Nenpuxaladaas kws yog tug thawj tubrog txawm nteg cov tuabneeg kws seem nyob huv lub nroog hab cov tuabneeg kws lug thawj nwg, coj moog rua tebchaws Npanpiloos lawm.

¹⁰Nwg tseg cov tuabneeg txomnyem kws tsi muaj laj teb nyob huv tebchaws Yudas, nwg muab tej vaaj txiv maab hab tej laj teb faib rua puab.

¹¹Vaajntxwv Nenpukajnexales kuas Nenpuxaladaas kws yog nwg tug thawj tubrog, has rua cov tubrog has tas,

¹²“Mej ca le moog nrhav kuas tau Yelemis hab ua zoo tu nwg. Mej tsi xob ua phem rua nwg. Yog nwg xaav tau dlaabtsi, mej ca le muab rua nwg.”

¹³Yog le ntawd, Nenpuxaladaas kws yog tug thawj tubrog txhaj nrug Nenpusanpas kws yog tug numtswv luj, Nenkas Xalexes hab lwm tug kws yog cov Npanpiloos tug vaajntxwv cov numtswv

¹⁴tuaj tso kuv tawm huv chaav kws muaj tubrog zuv huv vaajntxwv lub loog lug. Puab tso kuv rua Ahikas tug tub Nkedaliyas kws yog Safaas tug xeebntxwv coj kuv moog kuas txug tsev. Yog le ntawd kuv txhaj tau nrug kuv cov tuabneeg nyob ua ke.

¹⁵Thaus kuv tseem raug kaw rua huv chaav kws muaj tubrog zuv huv vaajntxwv lub loog, tug TSWV kuas kuv

¹⁶moog has rua Enpemelej kws yog tuabneeg Sudaas has tas, tug TSWV kws yog cov Yixalayees tug Vaajtswv kws muaj Fwjchim Luj kawg nkaus has le nuav tas: “Kuv yuav ua kuas lub nroog nuav puamtsuaj lawv le kuv tau has tseg lawm, tsi yog ua kuas vaammeej, koj yuav pum ntsoov lub nroog nuav puamtsuaj.

¹⁷Tabsis nub ntawd, kuv kws yog tug TSWV yuav cawm koj, hab yuav tsi muab koj cob rua cov tuabneeg kws koj ntshai.

¹⁸Kuv yuav cawm koj kuas dlim, koj yuav tsi raug nav ntaaj nav rag tuag, tabsis koj yuav muaj sa ua neej nyob, rua qhov koj tso sab rua kuv. Kuv yog tug TSWV kws has le ntawd.”