Read Hmong Njua Yelemis 4 Bible Online

Yelemis 4 - Hmong Njua bible

Yelemis 4

¹Tug TSWV has tas, “Cov Yixalayees, yog mej xaav rov lug cuag kuv, mej ca le tig hlo rov lug. Yog mej tso tej mlom kws kuv ntxub tseg hab muab sab npuab kuv,

²kuv yuav pub mej tuav kuv lub npe nrug lwm tug sis coglug. Thaus ntawd txhua tsaav tuabneeg yuav thov kuv foom koob moov rua puab hab puab yuav ua kuv tsaug.”

³Tug TSWV has rua cov Yudas hab cov tuabneeg kws nyob huv lub nroog Yeluxalees has tas, “Mej ca le laij mej tej laj tej teb kws tsi tau laij; tsi xob muab mej tej noob nplej moog tseb rua huv haav xuavpaug.

⁴Cov Yudas hab cov tuabneeg kws nyob huv lub nroog Yeluxalees, mej yuavtsum ua lawv le mej tau coglug rua kuv kws yog mej tug TSWV, hab muab mej lub sab tso rua kuv kaav. Yog mej tsi ua le ntawd, kuv txujkev chim yuav kub cuag suavtawg, vim mej tej kev phem kev qas. Tsi muaj leejtwg yuav cheem tau kuv txujkev chim le.”

⁵Mej ca le tshuab raaj tshuab xyu nrov nroo ntwg moog thoob tebchaws; ca le has nrov nrov rua cov Yudas hab cov tuabneeg kws nyob huv Yeluxalees, kuas suavdlawg ca le tsiv moog rua huv tej nroog kws muaj ntsaa yeej thaiv.

⁶Ceebtoom kuas suavdlawg moog rua huv lub nroog Xi-oos; ca le tsiv tag kuas dlim, tsi xob ua sab nyaav! Tug TSWV yuav tso kev nruj kev tsiv hab kev puamtsuaj luj kawg nkaus tuaj saab qaumteb tuaj.

⁷Tug kws ua rua txhua tsaav tuabneeg puamtsuaj tub sawv kev tuaj ib yaam le tug tsuv ntxhuav tawm huv haav zoov lug. Nwg yuav tuaj ua kuas cov Yudas puamtsuaj; tej nroog luj huv tebchaws Yudas yuav puamtsuaj taag, hab tej nroog yuav nphob xuav tsi muaj tuabneeg nyob.

⁸Suavdlawg ca le naav ntaub tsaaj quaj ntsuag hab nyuaj sab, rua qhov tug TSWV txujkev chim tseem tsi tau tshem ntawm cov Yudas moog.

⁹Tug TSWV has tas, “Thaus txug nub ntawd, cov vaajntxwv hab cov numtswv txhua tug yuav qaug zug; cov povthawj yuav ceeb hab cov cev kuv lug yuav xaav tsi thoob le.”

¹⁰Kuv has tas, “Tug TSWV kws kaav ib puas tsaav yaam, koj tau dlaag cov tuabneeg kws nyob huv lub nroog Yeluxalees! Koj has tas, yuav muaj kev thaajyeeb lug rua huv, tabsis nav ntaaj nav rag tub hlais puab cejdlaab lawm!”

¹¹Lub sijhawm ntawd yuav muaj tug moog has rua cov tuabneeg kws nyob huv lub nroog Yeluxalees has tas, cua dlaaj cua dlub taabtom ntsawj tom taj suabpuam tuaj rua puab. Tsi yog tej cua kws ntsawj tej npluag nplej xwb,

¹²tabsis yog tej cua muaj zug heev kws tug TSWV tso tuaj. Qhov ntawd yog tug TSWV txav txim rua nwg tsaav tuabneeg.

¹³Mej saib, yeebncuab tuaj ib yaam le tej twv fuab dlub. Nwg tej tsheb neeg dlha tuaj ib yaam le nthwv cua dlaaj cua dlub ntsawj, hab nwg tej neeg dlha ceev dlua dlaav yaa. Peb swb lawm! Peb puamtsuaj lawm!

¹⁴Yeluxalees, ca le ntxuav tej kev phem huv koj lub sab kuas huv, koj txhaj yuav dlim koj lub txim. Koj tseem yuav xaav txug tej kev txhum ntawd moog txug thaus twg?

¹⁵Muaj tuabneeg xaa xuv tsi zoo huv lub nroog Daas hab sau Efalayees TEJ ROOB tuaj.

¹⁶Puab tuaj ceebtoom rua txhua tsaav tuabneeg hab Yeluxalees has tas yeebncuab taabtom tuaj ntawm lub tebchaws dleb heev tuaj. Cov yeebncuab ntawd yuav tuaj qw tawmtsaam cov Yudas tej nroog,

¹⁷hab yuav vij lub nroog Yeluxalees ib yaam le cov tuabneeg zuv teb, rua qhov cov tuabneeg huv Yeluxalees ntxeev sab rua tug TSWV. Tug TSWV has le ntawd.

¹⁸Yudas, koj coj kev puamtsuaj rov lug raug koj, rua qhov koj ua koj lub neej hab koj teg num lawv le koj sab nyam xwb. Tub yog koj tej kev txhum ua rua koj raug kev txomnyem ntaag; txujkev txomnyem ntawd yuav ua rua koj qhuav sab qhawv.

¹⁹Tug mob! Kuv nyaj tsi taug kuv tug mob lawm! Kuv lub sab! Kuv lub sab puag taag lawm! Kuv nov tej suab xyu hab tej suab sis ntaus sis tua nrov, ua rua kuv nyob tsi tswm le.

²⁰Kev puamtsuaj ib yaam taag ib yaam tuaj, ua rua lub tebchaws puag ntsoog taag. Tuab ntsais muag xwb peb tej tsev ntaub puamtsuaj taag; hab tej ntaub qhovrais ndluag taag ua tej dlaim.

²¹Kuv tseem yuav pum tej chij kws kwv ntaus rog, hab nov tej suab xyu hab suab raaj nrov moog txug thaus twg?

²²Tug TSWV has tas, “Kuv tsaav tuabneeg ruag kawg nkaus; puab tsi paub kuv. Puab zoo ib yaam le tej mivnyuas kws ruag; puab tsi totaub le. Puab tsuas txawj moog ua kev phem kev qas xwb, tabsis puab tsi paub ua qhov zoo.”

²³Kuv saib lub nplajteb, mas nwg nyob qhuav nkuag ca; hab saib rua sau nruab ntug tsi pum qhov kaaj le.

²⁴Kuv tsaa muag saib sau tej roob, pum tej roob ua zug koog, hab tej pov roob los nyob tsi tug.

²⁵Kuv saib tsi pum muaj tuabneeg le; txawm yog tej noog los yaa tsiv taag.

²⁶Lub tebchaws kws aav rog hab zoo qoob los ua suabpuam taag, tej nroog huv lub tebchaws los puamtsuaj taag vim tug TSWV txujkev chim.

²⁷(Tug TSWV has tas lub tebchaws yuav nyob qhuav nkuag ca, tabsis nwg yuav tsi ua kuas puamtsuaj taagnrho.)

²⁸Lub nplajteb yuav quaj ntsuag, hab lub ntuj yuav tsaus nti. Tug TSWV has le caag, nwg yeej tsi hloov le; nwg txav txim sab le caag, nwg yeej tsi thim le.

²⁹Thaus nov tej suab neeg dlha hab tej suab neevnti nrov, txhua tug yuav tsiv tawm; ibtxha yuav tsiv moog rua huv haav zoov, ibtxha yuav nce moog rua sau tej roob zeb. txhua lub nroog yuav nyob qhuav nkuag ca hab yuav tsi muaj tuabneeg nyob huv ntxiv le lawm.

³⁰Yeluxalees, koj raug puamtsuaj lawm! Vim le caag koj naav tej rig tsho lab, vim le caag koj coj saw nyaj saw kub hab zaas qhovmuag? Koj tseev zaam kuas koj zoo nkauj, tabsis tsi muaj qaabhau! Koj tej hluas nraug tso koj tseg hab puab xaav muab koj tua povtseg lawm xwb.

³¹Kuv nov koj lub suab quaj ib yaam le tug quaspuj kws yug mivnyuas, hab qw ib yaam le tug quaspuj kws yug thawj tug mivnyuas, lub suab ntawd yog Yeluxalees lub suab quaj fuas sav, nwg xyaab nwg txhais teg hab has tas, “Kuv puamtsuaj lawm! Puab taabtom tuaj muab kuv tua povtseg!”