Read Hmong Njua Yelemis 40 Bible Online

Yelemis 40 - Hmong Njua bible

Yelemis 40

¹Tug TSWV has rua kuv tom qaab Nenpuxaladaas kws yog tug thawj tubrog tso kuv tawm huv Lamas. Luas muab saw hlau khi kuv coj nrug cov tuabneeg huv lub nroog Yeluxalees hab cov Yudas kws raug nteg moog rua tebchaws Npanpiloos.

²Tug thawj tubrog coj kuv moog rua ib caag hab has rua kuv tas, “Tug TSWV kws yog koj tug Vaajtswv ua rua lub tebchaws nuav puamtsuaj taag,

³nwgnuav nwg ua lawv le nwg tau has tseg lawm. Tej nuav tshwmsim tub yog vim koj cov tuabneeg ua txhum rua tug TSWV hab tsi noog nwg lug.

⁴Nwgnuav kuv yuav dlaws txuj saw hlau kws khi koj ob txhais teg hab tso koj. Yog koj xaav nrug kuv moog rua tebchaws Npanpiloos los tau, kuv yuav saib hab tu koj. Tabsis yog koj tsi xaav nrug kuv moog los tau, muab lub tebchaws nuav rua koj xaiv, koj yuav moog nyob qhov twg los tau lawv le koj nyam.”

⁵Thaus kuv tseem tsi tau teb, Nenpuxaladaas has rua kuv tas, “Koj ca le moog nrug Ahikas tug tub Nkedaliyas kws yog Safaas tug xeebntxwv nyob, tug vaajntxwv kws kaav tebchaws Npanpiloos tsaa nwg ua tswv xeev saib tej nroog huv tebchaws Yudas. Koj ca le moog nrug nwg hab cov pejxeem nyob lossis koj xaav moog nyob qhov twg los nyob ntawm koj sab nyam.” Nwg muab ib qhov khoom hab zaub mov noj rua kuv, hab tso kuv rov lug lawm.

⁶Kuv txhaj moog nrug Nkedaliyas hab cov pejxeem kws seem nyob huv lub nroog Mixepas huv lub tebchaws.

⁷Cov Yudas cov numtswv hab cov tubrog qee leej kws tsi kaam moog thawj cov Npanpiloos nov has tas, tug vaajntxwv kws kaav tebchaws Npanpiloos tsaa Nkedaliyas kws yog Ahikas tug tub ua tswv xeev kaav lub tebchaws hab kaav cov tuabneeg txomnyem kws tsi raug nteg coj moog rua tim tebchaws Npanpiloos, puab txhaj tsi kaam zwm rua cov tuabneeg Npanpiloos.

⁸Yog le ntawd, Nethaniyas tug tub Yisamayees, Kaleyas tug tub Yauhanaas, Tahumes tug tub Xelayas, Efayis cov tub kws nyob huv lub nroog Netaufas hab Yexaniyas kws nyob huv Ma-akas, nrug puab cov tuabneeg moog cuag Nkedaliyas huv lub nroog Mixepas.

⁹Nkedaliyas has rua puab tas, “Mej ca le lug thawj cov Npanpiloos, tsi xob ntshai. Mej ca le nyob huv lub tebchaws nuav hab zwm rua tug vaajntxwv kws kaav tebchaws Npanpiloos, mej txhaj yuav tau nyob kaaj sab lug.

¹⁰Kuv yuav nyob huv Mixepas nuav, hab thaus cov Npanpiloos tuaj, kuv yuav ua tug sawv cev mej suavdlawg. Mej ca le rov moog nyob huv mej tej zog, sau tej cawv txiv maab, tej txiv maab txiv ntoo hab roj txiv ntoo lug ca rua huv txhaab hab ntim rua huv hub.”

¹¹Thaus cov Yudas kws nyob huv tebchaws Mau-am, Amoos, Edoos hab cov kws nyob lwm tebchaws nov has tas, tug vaajntxwv kws kaav tebchaws Npanpiloos tso cai rua cov Yudas ibtxha nyob huv tebchaws Yudas, hab nwg tsaa Nkedaliyas ua tug tswv xeev kaav puab.

¹²Yog le ntawd, puab txhaj rov huv tej tebchaws kws puab raug ntab moog nyob rov lug rua huv tebchaws Yudas. Puab moog cuag Nkedaliyas huv Mixepas. Puab sau tau cawv txiv maab hab txiv maab txiv ntoo ntau kawg le.

¹³Tom qaab ntawd, Yauhanaas hab cov thawj tubrog kws tsi kaam moog thawj cov Npanpiloos tuaj cuag Nkedaliyas huv Mixepas,

¹⁴puab has rua nwg tas, “Koj puas paub has tas, Vaajntxwv Npalis kws kaav tebchaws Amoos khaiv Yisamayees tuaj tua koj?” Tabsis Nkedaliyas tsi ntseeg tej lug kws puab has.

¹⁵Yauhanaas moog has tuabywv rua Nkedaliyas has tas, “Thov ca kuv moog muab Yisamayees tua povtseg, tsi pub kuas leejtwg paub. Vim le caag yuav ca nwg tuaj tua koj? Yog ua le ntawd yuav ua rua cov Yudas kws lug nrug koj nyob tawg moog nyob ua saab ua sua, hab yuav ua rua cov tuabneeg kws seem nyob huv tebchaws Yudas raug kev puamtsuaj.”

¹⁶Tabsis Nkedaliyas teb has tas, “Koj tsi xob ua le ntawd, tej kws koj has txug Yisamayees ntawd tsi muaj tseeb.”