Read Hmong Njua Yelemis 41 Bible Online

Yelemis 41 - Hmong Njua bible

Yelemis 41

¹Xyoo ntawd thaus lub xyaa hli ntuj, Nethaniyas tug tub Yisamayees kws yog Elisamas tug xeebntxwv, nwg yog caajceg vaajntxwv hab yog vaajntxwv ib tug numtswv luj, nwg txawm coj kaum leej tubrog tuaj cuag Nkedaliyas huv Mixepas. Thaus puab taabtom noj mov ua ke,

²Yisamayees hab nwg kaum leej tubrog txawm rhu puab tej ntaaj tua Nkedaliyas tuag.

³Yisamayees tseem tua cov Yixalayees txhua tug kws nrug Nkedaliyas nyob huv Mixepas hab cov tubrog Npanpiloos kws tuaj nyob huv tuag taag huv tuabsi.

⁴Nub tom qaab, thaus kws tsi tau muaj tuabneeg paub has tas, Nkedaliyas raug tua tuag,

⁵muaj yim caum leej txivneej tuaj huv Sekhees, Silaus, hab Xamalis tuaj txug. Puab chais puab tej fwjtxwv, dlua puab tej rig tsho hab puab rov hlais puab lub cev. Puab coj qoobloo hab moov tshuaj tsw qaab moog fij huv lub Tuamtsev.

⁶Ces Yisamayees txawm ua txuj tsaa suab hlo quaj tawm huv Mixepas tuaj tog puab, thaus nwg pum dlheev puab nwg has rua puab tas, “Thov mej lug saib Nkedaliyas.”

⁷Thaus puab moog txug huv lub nroog lawm, Yisamayees hab nwg cov tubrog txawm muab puab tua hab coj moog pov rua huv qhov tshij.

⁸Tabsis puab paab ntawd muaj kaum leej has rua Yisamayees has tas, “Thov koj tsi xob tua peb, peb muaj qeb, nplej, roj txiv ntoo hab zib ntaab nyob huv peb tej teb.” Yog le ntawd, nwg txhaj tsi tua puab.

⁹Lub qhov tshij kws Yisamayees muab cov tuabneeg kws nwg tua pov rua huv mas luj heev kws yog Vaajntxwv Axas khawb thaus lub sijhawm cov Yixalayees tug Vaajntxwv Npasaas tuaj tua nwg. Yisamayees muab cov tuabneeg kws nwg tua pov puv nkaus rua huv lub qhov tshij ntawd.

¹⁰Yisamayees nteg vaajntxwv cov ntxhais hab taagnrho cov pejxeem kws tug thawj tubrog Nenpuxaladaas tseg rua Nkedaliyas saib nyob huv Mixepas. Yisamayees coj cov tuabneeg kws nwg nteg ntawd moog rua tebchaws Amoos lawm.

¹¹Thaus Yauhanaas hab cov thawj tubrog kws nrug nwg nov tej xwm kws Yisamayees tua tuabneeg ntawd,

¹²puab txawm coj puab cov tubrog moog caum cuag Yisamayees rua ntawm lub paag dlej luj huv Nkinpe-oos.

¹³Thaus cov tuabneeg kws Yisamayees nteg pum Yauhanaas hab cov thawj tubrog kws nrug nwg moog ntawd, puab zoo sab heev,

¹⁴hab puab dlha moog rua ntawm Yauhanaas.

¹⁵Tabsis Yisamayees hab nwg yim leej tubrog tsiv dlim moog rua tebchaws Amoos lawm, Yauhanaas nteg tsi tau le.

¹⁶Yauhanaas hab cov thawj tubrog kws nrug nwg moog txhaj coj cov tuabneeg kws Yisamayees nteg huv Mixepas moog tom qaab kws Nkedaliyas raug tua tuag lawm, tsi has cov tubrog, cov quaspuj mivnyuas hab cov kws ua num huv vaajntxwv lub loog rov qaab huv Nkinpe-oos lug.

¹⁷Puab ntshai cov Npanpiloos heev rua qhov Yisamayees muab Nkedaliyas tug kws cov Npanpiloos tug vaajntxwv tsaa ua tswv xeev kaav lub tebchaws Yudas tua tuag lawm. Yog le ntawd, puab txhaj tsiv moog rua nraag tebchaws Iziv, kuas dlim ntawm cov Npanpiloos. Thaus puab taug kev moog, puab moog su rua ntawm Khihas kws nyob ze lub nroog Npelehees.