Read Hmong Njua Yelemis 42 Bible Online

Yelemis 42 - Hmong Njua bible

Yelemis 42

¹Kale-as tug tub Yauhanaas hab Hausaiyas tug tub Axaliyas, hab cov thawj tubrog txhua tug nrug cov pejxeem suavdlawg, tsi has tug hlub tug yau tuaj

²has rua kuv tas, “Thov koj noog peb tej lug thov! Koj ca le thov tug TSWV kws yog peb tug Vaajtswv paab peb cov kws seem nyob ntawm nuav. Yaav taag lug peb muaj coob, tabsis nwgnuav peb tshuav tsawg heev lawv le koj pum nuav lawm xwb.

³Koj thov tug TSWV kws yog peb tug Vaajtswv qha rua peb saib peb yuav moog qhov twg hab peb yuav ua le caag?”

⁴Kuv teb puab has tas, “Kuv pum zoo. Kuv yuav thov tug TSWV kws yog peb tug Vaajtswv lawv le mej tej lug thov, saib nwg teb le caag, kuv maam le qha rua mej paub. Kuv yuav tsi zais ib lus le.”

⁵Puab has rua kuv tas, “Thov tug TSWV ua timkhawv ncaaj hab tseeb rua peb, yog peb tsi ua lawv le tug TSWV kws yog peb tug Vaajtswv tej lug saamfwm rua peb.

⁶Txawm yog tej lug teb kws peb kuas koj thov tug TSWV kws yog peb tug Vaajtswv yuav hum peb sab hab tsi hum los peb yuav noog nwg lug. Yog has tas, peb noog nwg lug, peb yuav noj qaab nyob zoo.”

⁷Kaum nub tom qaab tug TSWV has rua kuv;

⁸yog le ntawd, kuv txhaj hu Yauhanaas hab cov thawj tubrog kws nrug nwg nyob hab cov pejxeem tuaj.

⁹Kuv has rua puab tas, “Tug TSWV kws yog cov Yixalayees tug Vaajtswv kws mej kuas kuv thov, nwg has tas,

¹⁰‘Yog mej txaus sab nyob huv tebchaws nuav, kuv yuav tsi rhuav mej, tabsis kuv yuav paab kuas mej vaammeej; kuv yuav cog mej kuas ruaj hab tsi dlob mej povtseg. Txujkev puamtsuaj kws kuv tso lug raug mej, ua rua kuv tu sab kawg le.

¹¹Mej tsi xob ntshai tug vaajntxwv kws kaav tebchaws Npanpiloos. Kuv yuav nrug nraim mej hab yuav paab mej kuas dlim ntawm nwg lub fwjchim.

¹²Rua qhov kuv yog tug muaj txujkev hlub, kuv yuav ua kuas nwg muaj sab hlub mej hab tso mej rov moog tsev. Kuv yog tug TSWV kws has le ntawd.’

¹³“Tabsis mej cov kws tseem nyob huv tebchaws Yudas, mej yuavtsum noog tug TSWV kws yog mej tug Vaajtswv lug, hab txaus sab nyob huv lub tebchaws nuav. Mej tsi xob has tas, ‘Peb yuav moog nyob nraag tebchaws Iziv, kuas peb tsi pum kev tsuv kev rog lossis tsi nov suab sis ntaus sis tua lossis tsi raug kev tshaib kev nqhes.’ Yog mej has le nuav, tug TSWV kws yog cov Yixalayees tug Vaajtswv kws muaj Fwjchim Luj kawg nkaus has tas, ‘Yog mej txav txim sab moog nyob nraag tebchaws Iziv,

¹⁶tej kev tsuv kev rog kws mej ntshai yuav lug raug mej, hab kev tshaib kev nqhes kws mej txhawj yuav caum tau mej, mej yuav tuag taag rua nraag tebchaws Iziv.

¹⁷Txhua tug kws txav txim sab tsiv moog rua nraag tebchaws Iziv, yuav tuag taag rua nav ntaaj nav rag lossis kev tshaib kev nqhes lossis kaab mob kev nkeeg. Puab yuav tsi muaj ib tug tsiv dlim txujkev puamtsuaj kws kuv tso lug rua puab ntawd le.’

¹⁸“Tug TSWV kws yog cov Yixalayees tug Vaajtswv has tas, ‘Kuv txujkev chim hab npautawg tau phwj tuaj raug cov tuabneeg kws nyob huv lub nroog Yeluxalees le caag, ces kuv txujkev chim hab npautawg yuav phwj lug raug mej thaus mej tsiv moog nyob nraag tebchaws Iziv ib yaam le ntawd, mej yuav raug txobthuam hab luas yuav tuav mej lub npe foom tsi zoo, luas yuav ntshai hab tsi xaav pum mej; hab mej yuav tsi tau rov lug pum lub tebchaws nuav ntxiv le lawm.’ ”

¹⁹Kuv has ntxiv tas, “Tug TSWV kuas mej cov kws seem nyob huv tebchaws Yudas nuav, tsi xob tsiv moog rua nraag tebchaws Iziv. Yog le ntawd, nub nua kuv ntuag mej

²⁰has tas, mej tau ua yuam kev lawm. Mej kuas kuv thov tug TSWV kws yog peb tug Vaajtswv paab mej, hab mej coglug has tas, mej yuav ua txhua yaam lawv le tug TSWV tej lug saamfwm.

²¹Nwgnuav kuv tub qha txhua yaam rua mej lawm, tabsis mej tsi noog tug TSWV kws yog peb tug Vaajtswv tej lug kws nwg khaiv kuv tuaj qha rua mej nuav le.

²²Yog le ntawd kuas mej ncu has tas, mej yuav raug nav ntaaj nav rag, kev tshaib kev nqhes hab kaab mob kev nkeeg tuag taag rua huv lub tebchaws kws mej xaav moog nyob ntawd.”