Read Hmong Njua Yelemis 44 Bible Online

Yelemis 44 - Hmong Njua bible

Yelemis 44

¹Tug TSWV has rua kuv txug cov Yudas kws nyob huv tebchaws Iziv huv lub nroog Midaules, lub nroog Tapahes, lub nroog Meefis hab cov nroog kws nyob rua saab qaabteb huv tebchaws Iziv.

²Tug TSWV kws yog cov Yixalayees tug Vaajtswv kws muaj Fwjchim Luj kawg nkaus has tas, “Mej tub pum tej kev puamtsuaj kws kuv tso lug raug lub nroog Yeluxalees hab tej nroog kws nyob huv tebchaws Yudas lawm. Txawm yog nwgnuav los tseem puag taag hab tsi muaj tuabneeg nyob,

³rua qhov cov tuabneeg kws nyob huv tej nroog ntawd ua kev phem kev qas ua rua kuv chim. Puab tua tsaj hlawv fij rua luas tej vaajtswv hab pe tej vaajtswv kws tsi has puab lossis mej hab mej cov yawmkoob tsi tau pe dlua le.

⁴Kuv yeej tso kuv cov tubkhai kws yog cov cevlug qha mej ua ntu zug, kuas mej tsi xob ua tej kev phem kev qas kws kuv ntxub ntawd.

⁵Tabsis mej tsi quavntsej lossis tsi noog kuv tej lug. Mej tsi tso mej tej kev phem kev qas lossis kev tua tsaj hlawv fij rua luas tej vaajtswv tseg le.

⁶Yog le ntawd, kuv txhaj laub kuv txujkev chim hab npautawg lug rua tej nroog huv tebchaws Yudas hab tej kev huv lub nroog Yeluxalees, hab tso suavtawg hlawv tej ntawd kuas kub nyab taag. Tej nroog ntawd txhaj puamtsuaj taag nyob qhuav nkuag lug txug naj nub nua.

⁷“Yog le ntawd, nwgnuav kuv yog tug TSWV kws yog cov Yixalayees tug Vaajtswv kws muaj Fwjchim Luj kawg nkaus nug mej le nuav: vim le caag mej pheej ua tej kev phem kev qas ntawd. Puas yog mej xaav ca cov txivneej, cov quaspuj, cov hluas hab cov mivnyuas mog raug kev puamtsuaj kuas tsi seem ib tug le?

⁸Vim le caag mej pheej pe mlom hab tua tsaj hlawv fij rua luas tej vaajtswv huv tebchaws Iziv kws mej lug nyob ua rua kuv chim? Puas yog mej ua le nuav kuas mej raug kev puamtsuaj rua txhua tsaav tuabneeg thoob nplajteb txobthuam hab tuav mej lub npe foom tsi zoo?

⁹Mej tsi ncu txug tej kev phem kev qas kws mej cov yawmkoob, cov vaajntxwv kws kaav tebchaws Yudas hab puab cov quaspuj, mej hab mej tej quaspuj tau ua nyob huv tebchaws Yudas hab ntawm tej kev huv lub nroog Yeluxalees lawm los?

¹⁰Tabsis mej yeej tsi txu mej lub fwjchim lug txug naj nub nwgnuav le. Mej tsi fwm kuv lossis ua mej lub neej lawv le tej kevcai kws kuv muab cob rua mej hab mej cov yawmkoob lawm.

¹¹“Yog le ntawd, kuv yog tug TSWV kws yog cov Yixalayees tug Vaajtswv kws muaj Fwjchim Luj kawg nkaus, yuav tawmtsaam mej hab rhuav kuas cov Yudas puamtsuaj.

¹²Kuv yuav ua kuas cov Yudas kws txav txim sab tsiv moog nyob nraag tebchaws Iziv, tsi has tug hlub tug yau raug puamtsuaj taag. Puab yuav tuag rua nav ntaaj nav rag lossis kev tshaib kev nqhes. Luas yuav ntshai puab, txobthuam puab hab tuav puab lub npe foom tsi zoo.

¹³Kuv yuav rau txim rua txhua tug kws lug nyob huv tebchaws Iziv, ib yaam le kuv tso kev tsuv kev rog, kev tshaib kev nqhes hab kaab mob kev nkeeg lug rau txim rua lub nroog Yeluxalees,

¹⁴tsi pub cov Yudas kws seem hab tsiv lug nyob huv tebchaws Iziv tsiv dlim le. Puab yuav tsi muaj ib tug tau rov moog rua tebchaws Yudas kws puab xaav rov moog nyob. Yuav tsi muaj leejtwg tau rov moog nyob, tsuas tshwj cov kws raug luas nteg moog lawm xwb txhaj tau rov moog.”

¹⁵Cov txivneej kws paub has tas, puab cov quaspuj tua tsaj hlawv fij rua luas tej vaajtswv hab cov quaspuj kws sawv ntawd, hab cov quaspuj Yudas kws nyob huv tebchaws Iziv saab qaabteb, ua ib paab coob heev tuaj has rua kuv tas,

¹⁶“Peb tsi leeg paub tej lug kws koj tuav tug TSWV lub npe tuaj has rua peb.

¹⁷Peb yuav ua txhua yaam lawv le peb tau has lawm tas peb yuav ua. Peb yuav tua tsaj hlawv fij rua peb tug vaajtswv kws yog Nam Vaajntxwv Ntuj, hab yuav laub cawv txiv maab fij rua nwg ib yaam le peb cov yawmkoob, peb cov vaajntxwv hab peb cov thawjcoj ibtxwm ua huv cov Yudas tej nroog hab ntawm tej kev huv lub nroog Yeluxalees. Ces peb yuav muaj zaub mov nplua mag. Peb yuav vaammeej hab tsi txomnyem le.

¹⁸Tabsis txij thaus peb tseg tsi tua tsaj hlawv fij rua tug Nam Vaajntxwv Ntuj, hab tsi laub cawv txiv maab fij rua nwg lawm, ces peb tsi muaj dlaabtsi hab peb cov tuabneeg tuag taag rua nav ntaaj nav rag hab kev tshaib kev nqhes lawm.”

¹⁹Cov quaspuj has ntxiv tas, “Thaus peb puab ncuav ci, peb puab tej lub zoo le tug Nam Vaajntxwv Ntuj, tua tsaj hlawv fij rua nwg hab laub cawv txiv maab fij rua nwg los peb tej quasyawg yeej pum zoo peb ua le ntawd!”

²⁰Kuv txhaj has rua cov txivneej hab cov quaspuj kws tuaj has le ntawd rua kuv tas,

²¹“Tej khoom kws mej, mej cov yawmkoob, mej cov vaajntxwv, mej cov thawjcoj hab cov tuabneeg kws nyob huv tebchaws Yudas coj tuaj fij rua huv cov Yudas tej nroog hab ntawm tej kev huv lub nroog Yeluxalees, mej xaav has tas, tug TSWV tsi paub lossis tsi ncu qaab tej ntawd lawm nua los?

²²Mej lub tebchaws puamtsuaj tsi muaj tuabneeg nyob lug txug naj nub nua, tub yog vim tug TSWV tsi xaav saib tej kev phem kev qas hab kev nkauj kev nraug kws mej ua. Luas yuav ntshai mej, txobthuam mej hab tuav mej lub npe foom tsi zoo.

²³Tej kev puamtsuaj nuav lug raug mej, vim mej tua tsaj hlawv fij rua luas tej vaajtswv, hab ua txhum rua tug TSWV hab tsi noog nwg tej lug saamfwm.”

²⁴Kuv qha rua mej hab cov quaspuj suavdlawg, kuas mej paub tej kws tug TSWV kws yog cov Yixalayees tug Vaajtswv kws muaj Fwjchim Luj kawg nkaus has rua cov Yudas kws tseem nyob huv tebchaws Iziv has tas, “Mej hab mej tej quaspuj tau coglug rua Nam Vaajntxwv Ntuj lawm. Mej coglug has tas, mej yuav fij khoom rua nwg, hab laub cawv txiv maab fij rua nwg, mej tub ua lawv le mej tej lug cog tseg rua nwg. Tau lawm lauj! Ca le ceev mej tej lug cog tseg hab ua le ntawd rua nwg!

²⁶Tabsis mej ca le noog kuv kws yog tug TSWV kws muaj Fwjchim Luj kawg nkaus tuav kuv lub npe coglug rua mej cov Yixalayees kws nyob huv tebchaws Iziv nuav: kuv yuav tsi pub mej tuav kuv lub npe coglug has tas, ‘Kuv tuav tug TSWV kws muaj sa nyob hab kaav ib puas tsaav yaam lub npe coglug!’

²⁷Kuv yuav saib ntsoov tsi pub kuas mej vaammeej, tabsis yuav ca kuas mej puamtsuaj. Mej yuav tuag taag, tsi has tuag rua nav ntaaj nav rag lossis tuag rua kaab mob kev nkeeg, moog txug nub kws mej tsi tshuav ib tug le.

²⁸Tabsis mej cov qee leej yuav dlim tsi tuag rua huv tebchaws Iziv hab yuav tau rov moog rua peg tebchaws Yudas. Cov kws dlim ntawd yuav paub has tas leejtwg tej lug txhaj yog lug tseeb. Kuv tej lug lossis puab tej.

²⁹Kuv kws yog tug TSWV yuav muab ib yaam ua cim lug qha rua mej paub has tas, kuv yuav rau txim rua mej hab ua kuas mej puamtsuaj rua ntawm qhov chaw nuav, mej txhaj paub has tas muaj tseeb lawv le kuv tej lug tag.

³⁰Kuv yuav muab Falaus Haufelas kws kaav tebchaws Iziv cob rua nwg cov yeebncuab kws xaav muab nwg tua povtseg, ib yaam le kuv muab Vaajntxwv Xedekiyas kws kaav tebchaws Yudas cob rua Vaajntxwv Nenpukajnexales kws kaav tebchaws Npanpiloos kws yog Xedekiyas tug yeebncuab kws xaav muab nwg tua povtseg.”