Read Hmong Njua Yelemis 46 Bible Online

Yelemis 46 - Hmong Njua bible

Yelemis 46

¹Tug TSWV has rua kuv txug tej tsaav tuabneeg,

²yog xub has txug cov Iziv. Tug TSWV has txug Falaus Nekaus kws yog cov Iziv tug vaajntxwv cov tubrog kws Vaajntxwv Nenpukajnexales kws kaav tebchaws Npanpiloos tuaj tua yeej huv lub nroog Kakhemis kws nyob ze ntawm tug Dlej Efalates, yog xyoo plaub kws Yehauyakhees ua vaajntxwv kaav tebchaws Yudas:

³“Cov Iziv cov thawj tubrog qw has tas, ‘Ca le npaaj mej tej thaiv nav ntaaj kuas txhij moog ntaus rog!

⁴Muab eeb pem rua mej tej neeg hab caij; ca le ntoo mom hlau hab moog sawv ua tej kaab! Huv mej tej muv hab naav mej tej tsho hlau!’ ”

⁵Tabsis tug TSWV nug has tas, “Kuv pum dlaabtsi? Puab ntshai hab thim rov qaab; puab cov tubrog raug tua ua rua puab ntshai hab tsiv tsi saib qaab le.

⁶Txawm yog cov kws dlha ceev heev los yeej tsiv tsi dlhau, cov tubrog los tsiv tsi dlim. Puab dlawm hab qaug taag rua ntawm tug Dlej Efalates saab qaumteb.

⁷Leejtwg txhaj yuav sawv taug nphau nphwv ib yaam le tug Dlej Niles, hab ib yaam le tug dlej kws fuam puv nkaus ntug?

⁸Tub yog Iziv sawv nphau quas nphwv ib yaam le tug Dlej Niles, hab ib yaam le tug dlej kws fuam puv nkaus ntug. Iziv has tas, ‘Kuv yuav fuam hab nyaab lub nplajteb; kuv yuav rhuav tej nroog hab tej tuabneeg kws nyob huv kuas puamtsuaj taag.

⁹Tej neeg ca le dlha moog hab tej tsheb ca le ndlog! Ca le txhij cov Sudaas hab cov Linpias tej tubrog kws nqaa tej thaiv nav ntaaj, hab cov Lidias tej tubrog kws txawj tua neevnti moog.’ ”

¹⁰Nub nua yog tug TSWV kws kaav ib puas tsaav yaam hab muaj Fwjchim Luj kawg nkaus nub: Nub nua nwg yuav ua pauj; nub nua nwg yuav rau txim rua nwg cov yeebncuab nwg raab ntaaj yuav noj puab tej nqaj kuas tsau, hab haus puab tej ntshaav kuas txaus sab. Nub nua tug TSWV kws muaj Fwjchim Luj kawg nkaus muab cov kws nwg tua tuag lawm coj moog fij rua ntawm tug Dlej Efalates saab qaumteb.

¹¹Cov Iziv, mej ca le moog rua peg Nkile-as hab nrhav tshuaj rua mej! Mej tej tshuaj tsi zoo hab khu tsi tau mej tej mob.

¹²Txhua tsaav tuabneeg nov mej tej kev txaajmuag; hab txhua tug nov mej quaj. Tej tubrog sis dlawm qaug rua huv aav.

¹³Thaus Vaajntxwv Nenpukajnexales kws kaav tebchaws Npanpiloos tuaj tua tebchaws Iziv, tug TSWV has rua kuv tas,

¹⁴“Koj ca le moog qha rua lub nroog Midaules, lub nroog Meefis hab lub nroog Tapahes huv tebchaws Iziv has tas, ‘Mej ca le npaaj sis tua, rua qhov yuav muaj kev tsuv kev rog tuaj ua kuas mej puamtsuaj.

¹⁵Vim le caag mej tug vaajtswv Anpis kws muaj fwjchim qaug lawm? Tub yog tug TSWV muab tsoo tawg taag lawm!’

¹⁶Mej cov tubrog dlawm qaug taag lawm. Mej ib leeg has rua ib leeg tas, ‘Peb ca le rov moog tsev, moog cuag peb cov tuabneeg, peb txhaj dlim yeebncuab tej nav ntaaj nav rag!’

¹⁷“Puab tis dlua ib lub npe tshab rua Falaus kws yog cov Iziv tug vaajntxwv hu ua, ‘Tug kws ua tsi tau dlaabtsi, ca nwg lub sijhawm dlhau moog.’

¹⁸Kuv yog tug TSWV kws muaj Fwjchim Luj kawg nkaus kws yog Vaajntxwv, hab kuv yog Vaajtswv tug kws muaj sa nyob. Lub Roob Tanpaus sawv sab tshaaj tej hauv roob hab lub Roob Kalemees sawv sab tshaaj havtxwv le caag, tug kws yuav tuaj tawmtsaam mej muaj zug npaum le ntawd.

¹⁹Cov Iziv, mej ca le sawbsim, luas yuav tuaj nteg mej moog, Meefis yuav ua suabpuam tsi muaj tuabneeg nyob.

²⁰Iziv zoo ib yaam le tug xyuas nyuj kws zoo nkauj heev, tabsis ib tug yoov nyuj yuav tuaj saab qaumteb tuaj tum nwg.

²¹Txawm yog tej tubrog kws nwg ndlav tuaj paab nwg los tsuas zoo ib yaam le tug xyuas nyuj ntawd. Puab tiv tsi taug tej kev sis ntaus sis tua; puab thim tsiv rov qaab. Nub kws puab raug kev puamtsuaj tub lug txug lawm, yog nub kws puab raug txav txim.

²²Thaus yeebncuab cov tubrog tuaj ze lawm, cov Iziv tsiv nrov xuav ib yaam le naab ndlaug, yeebncuab nqaa taus tuaj tua cov Iziv ib yaam le ntuv ntoo

²³hab ib yaam le luas ntuv zoov. Yeebncuab cov tubrog coob heev yeej suav tsi txheeb le; puab cov tubrog coob tshaaj tej kooj txomfaav.

²⁴Cov Iziv raug kev txaajmuag; puab yuav swb cov tuabneeg kws tuaj saab qaumteb tuaj. Kuv yog tug TSWV kws has le ntawd.”

²⁵Tug TSWV kws yog cov Yixalayees tug Vaajtswv kws muaj Fwjchim Luj kawg nkaus has tas, “Kuv yuav rau txim rua Amoos kws yog Thenpes tug vaajntxwv, cov Iziv, puab tej vaajtswv hab puab tej vaajntxwv. Kuv muab Falaus kws kaav tebchaws Iziv hab txhua tug kws tuaj nwg tog

²⁶cob rua Vaajntxwv Nenpukajnexales kws kaav tebchaws Npanpiloos hab cov tubrog kws xaav muab nwg tua povtseg. Tom qaab ntawd, yuav muaj tuabneeg rov qaab lug nyob huv tebchaws Iziv, ib yaam le yaav taag lug lawm. Kuv yog tug TSWV kws has le ntawd.”

²⁷“Kuv tsaav tuabneeg, mej tsi xob ntshai, tsaav tuabneeg Yixalayees, mej tsi xob txhawj! Kuv yuav paab mej cov kws luas nteg moog nyob rua lub tebchaws kws dleb heev. Mej yuav tau rov lug tsev hab nyob kaaj sab lug; mej yuav nyob tso sab lug hab tsi muaj leejtwg ua rua mej ntshai.

²⁸Kuv yuav lug cuag mej hab cawm mej. Kuv yuav rhuav txhua tsaav tuabneeg kws kuv ntab mej moog nrug nyob kuas puamtsuaj, tabsis kuv yuav tsi ca kuas mej puamtsuaj. Kuv yuav rau txim rua mej, tabsis thaus kuv rau txim rua mej, kuv yuav ua ncaaj. Kuv yog tug TSWV kws has le ntawd.”