Read Hmong Njua Yelemis 47 Bible Online

Yelemis 47 - Hmong Njua bible

Yelemis 47

¹Ua ntej Falaus tuaj tua lub nroog Nkaxas, tug TSWV has rua kuv txug cov Filitees.

²Nwg has tas, “Mej saib, dlej yuav nphau nphwv saab qaumteb tuaj hab yuav kuav ib yaam le dlej nyaab. Dlej yuav nyaab puv nkaus lub tebchaws hab txhua yaam, yuav nyaab tej nroog hab tej tuabneeg huv tuabsi. Tej tuabneeg yuav quaj qw thov kev paab, tuabneeg thoob nplajteb txhua tug yuav quaj qhuav sab qhawv.

³Puab yuav nov tej suab neeg dlha nrov, tej tsheb neeg caij tua rog hab tej lug tsheb nrov dloog dlaj. Tej nam tej txiv yuav tsiv tsi tig saib puab tej mivnyuas; puab tej npaab yuav tsaug dlai vag.

⁴Tub txug lub sijhawm kws rhuav cov Filitees kuas puamtsuaj lawm, kuv yuav txav lub nroog Tiles hab lub nroog Xidoos kev paab cov Filitees kws seem. Rua qhov kuv kws yog tug TSWV yuav rhuav cov Filitees kws nyob lawv ntug havtxwv Keletes kuas puamtsuaj.

⁵Cov tuabneeg kws nyob huv Nkaxas yuav quaj ntsuag, cov tuabneeg kws nyob huv Asekeloos puamtsuaj taag lawm. Cov Filitees yuav quaj ntsuag moog txug thaus twg?

⁶Mej ca le qw has tas, ‘Tug TSWV raab ntaaj! Thaus twg koj maam le tseg tsi tua tuabneeg? Ca le rov moog rua huv koj lub naab hab su!’

⁷Tabsis yuav ua le caag raab ntaaj txhaj su tau thaus kuv tseem kuas nwg ua num? Kuv saamfwm kuas nwg tua cov tuabneeg kws nyob huv lub nroog Asekeloos hab cov tuabneeg kws nyob lawv ntug havtxwv.”