Read Hmong Njua Yelemis 48 Bible Online

Yelemis 48 - Hmong Njua bible

Yelemis 48

¹Ntawm nuav yog tug TSWV kws muaj Fwjchim Luj kawg nkaus has txug lub tebchaws Mau-am: “Cov tuabneeg huv Nenpaus raug puamtsuaj, rua qhov puab tej nroog tub pob puag taag lawm! Luas txeeb tau lub nroog Kili-athayees, tsoo nwg tej chaw faajxwm pob taag, hab nwg cov pejxeem poob ntsejmuag kawg le;

²Mau-am lub koob meej kws nchaa moo lug pluj lawm, yeebncuab tub tuaj txeeb tau lub nroog Hesenpoos, puab yuav rhuav lub tebchaws Mau-am kuas puamtsuaj taag. Lub nroog Mamees los yuav puamtsuaj ib yaam nkaus, rua qhov yuav muaj tubrog tuaj tawmtsaam nwg.

³Cov tuabneeg huv Haulunayees yuav quaj qw has tas: ‘Kev nruj tsiv! Kev puamtsuaj!’

⁴“Mau-am tub raug puamtsuaj taag lawm; ca le noog cov mivnyuas yau tej suab quaj.

⁵Nov puab tej suab seev taug kev moog rua peg lub nroog Luhis; tej suab quaj txomnyem taug kev moog rua nraag lub nroog Haulunayees.

⁶Puab has tas, ‘Ca le tsiv tag kuas mej dlim! Dlha ib yaam le tug neeg luav qus kws nyob tom taj suabpuam!’

⁷“Mau-am, koj ca sab rua koj tug zug hab koj txujkev npluanuj, tabsis nwgnuav koj tub swb lawm; koj tug mlom Khemaus yuav raug luas coj nrug nwg cov numtswv hab cov povthawj moog rua lwm lub tebchaws.

⁸Tsi muaj ib lub nroog yuav dlim kev puamtsuaj le, tej haav hab tej taj nraag puavleej yuav raug kev puamtsuaj taag. Kuv yog tug TSWV kws has le ntawd.

⁹Ca le muab ib dlaim laag zeb npug Mau-am; rua qhov nwg tub yuav puamtsuaj. Nwg tej nroog los yuav puamtsuaj taag, tsi muaj tuabneeg nyob le lawm.”

¹⁰(Tug kws tsi ua tug TSWV teg num ntawm lub sab dlawb paug, yuav raug foom tsi zoo! Tug kws tsi tua cov Mau-am lawv le tug TSWV has, tug ntawd yuav raug foom tsi zoo!)

¹¹Tug TSWV has tas, “Mau-am yeej ibtxwm tau zoo nyob tso sab plhuav, tsi raug luas nteg moog rua lwm lub tebchaws. Mau-am zoo ib yaam le cov cawv txiv maab kws luas tshwj tseg tsi muab theej ib lub hub rua ib lub. Cov cawv txiv maab tseem qaab hab tsw qaab ntxag le qub.

¹²“Yog le ntawd, nwgnuav tub txug lub sijhawm kws kuv yuav tso tuabneeg tuaj muab Mau-am laub povtseg ib yaam le laub cawv txiv maab. Puab yuav muab cov cawv txiv maab laub povtseg kuas tej hub khoob lug ca, hab yuav muab tej hub tsoo kuas tawg taag.

¹³Ces cov Mau-am yuav poob ntsejmuag vim puab tug vaajtswv Khemaus ib yaam le cov Yixalayees poob ntsejmuag vim tug vaajtswv Npethes kws puab ca sab rua.

¹⁴“Cov tuabneeg Mau-am, vim le caag mej khaav has tas mej cov tubrog ua tau hab muaj sab tawv ntaus rog?”

¹⁵Mau-am hab nwg tej nroog tub raug puamtsuaj taag; nwg tej tub hluas kws ua tau heev los tub raug tua tuag taag lawm. Kuv yog tug TSWV kws yog vaajntxwv tug kws muaj Fwjchim Luj kawg nkaus, kuv has le ntawd.

¹⁶Tej kev puamtsuaj kws yuav raug Mau-am tub lug ze lawm; hab tej kev puag ntsoog kws yuav raug nwg tub lug yuav txug.

¹⁷“Mej cov kws nyob puagncig Mau-am, ca le quaj nyav nwg, mej txhua tug kws paub txug nwg lub koob meej ca le has tas; ‘Mau-am lub fwjchim kws tswj teb kaav chaw tub pluj lawm, nwg lub meejmom hab nwg tug zug tsi muaj taag lawm!’

¹⁸Cov tuabneeg kws nyob huv lub nroog Dinpoos, mej ca le txu fwjchim lug nyob rua huv aav; rua qhov Mau-am tug yeebncuab tub tuaj tawmtsaam mej lawm, nwg yuav rhuav mej tej chaw faajxwm kuas puamtsuaj taag.

¹⁹Cov tuabneeg kws nyob huv lub nroog Alu-es, mej ca le moog sawv ntawm kev tog; hab nug cov tuabneeg kws tsiv lug kuas puab qha mej saib muaj xwm dlaabtsi.

²⁰Puab yuav teb mej has tas, ‘Mau-am tub pob puag taag lawm; nwg poob ntsejmuag heev, ca le quaj nyav nwg. Ca le qha rua cov tuabneeg kws nyob lawv tug ntug Dlej Alenoos kuas paub has tas Mau-am tub puamtsuaj taag lawm.’

²¹“Kev txav txim taabtom lug raug lub nroog Hauloos, lub nroog Yaxas, lub nroog Mefas,

²²lub nroog Dinpoos, lub nroog Nenpaus, lub nroog Npethes Dilathayees,

²³lub nroog Kili-athayees, lub nroog Npethes Nkamus, lub nroog Npethes Me-oos,

²⁴lub nroog Keli-aus hab lub nroog Npauxelas kws nyob huv taj nraag. Kev txav txim tub lug raug cov nroog kws nyob huv tebchaws Mau-am tsi has dleb hab ze.

²⁵Mau-am tug zug tub ntaug hab nwg lub fwjchim tub pluj lawm. Kuv yog tug TSWV kws has le ntawd.”

²⁶Tug TSWV has tas, “Muab cawv rua Mau-am haus kuas qaug, rua qhov nwg ntxeev sab rua kuv. Mau-am yuav dlaa nwg cov ntuav, ces tej tuabneeg yuav luag nwg.

²⁷Mau-am, koj puas ncu has tas, koj muab cov Yixalayees tso dlaaj tso luag? Koj ua rua puab ib yaam le puab yog tubsaab.

²⁸“Cov tuabneeg kws nyob huv tebchaws Mau-am, mej ca le tsiv tawm huv mej tej nroog moog nyob rua sau tej roob tsuas! Ua le tug nquab kws ua zeg rua ntawm rooj tsuas.

²⁹Mau-am khaavtheeb heev! Peb nov nwg tej lug khaavtheeb, tsaav fwjchim, muab hlub hab nwg xaav txug nwg xwb.

³⁰Kuv kws yog tug TSWV, kuv paub nwg lub sab kws khaavtheeb. Nwg tej lug khaav yog lug dlaag, hab nwg tej num tsi ruaj tsi khov.

³¹Yog le ntawd, kuv yuav quaj cov Mau-am txhua tug, hab quaj cov tuabneeg huv Kis Heles.

³²Kuv yuav quaj cov tuabneeg Xinpemas heev dlua kuv quaj cov tuabneeg Yaxes. Lub nroog Ximas, koj zoo ib yaam le tsob txiv maab kws tej ceg hlaav dlhau Havtxwv Tuag moog txug lub nroog Yaxes. Tabsis nwgnuav koj tej txiv ntoo hab txiv maab kws sav thaus lub caij ntuj qhua tub raug luas muab rhuav puamtsuaj taag lawm.

³³Tej kev zoo sab hab kev lomzem raug tshem huv lub tebchaws Mau-am kws aav rog hab zoo qoob lawm. Kuv tsi pub kuas puab tsu tau kua txiv maab; yuav tsi muaj tuabneeg tsu kua txiv maab hab qw lomzem le lawm.

³⁴“Cov tuabneeg kws nyob huv Hesenpoos hab huv Ele-ales yuav tsaa suab quaj, hab puab tej suab quaj yuav ntxhe moog txug lub nroog Yahas; cov tuabneeg Xau-as los nov puab tej suab quaj, puab tej suab quaj yuav nrov moog txug lub nroog Haulunayees hab lub nroog Elas-Selisiyas. Txawm yog tug Dlej Niles los yuav qhuav.

³⁵Kuv yuav txwv tsi pub cov Mau-am tua tsaj hlawv fij rua puab tej chaw teev mlom hab hlawv tshuaj tsw qaab rua puab tej vaajtswv. Kuv yog tug TSWV kws has le ntawd.

³⁶“Yog le ntawd, kuv lub sab txhaj quaj ntsuag rua cov Mau-am hab cov Kis Heles, ib yaam le tug tuabneeg kws tshuab zaaj raaj quaj ntsuag, rua qhov txhua yaam kws yog puab le tub pluj taag lawm.

³⁷Puab txhua tug chais puab tej plaubhau hab fwjtxwv. Puab hlais puab tej teg hab muab ntaub tsaaj lug npua.

³⁸Nyob rua sau cov Mau-am tej ruv tsev hab tom tej tshaav puam, tsi nov suab dlaabtsi le, tsuas yog nov tej suab quaj nyav nkaus xwb, rua qhov kuv ua rua Mau-am ntsoog taag, ib yaam le lub hub kws muab tsoo tawg taag, tsi muaj leejtwg xaav yuav.

³⁹Mau-am raug rhuav puamtsuaj hab poob ntsejmuag, nwg ca le tsaa suab hlo quaj! Mau-am puamtsuaj taag, ua rua txhua tsaav tuabneeg kws nyob puagncig nwg luag nwg plig heev. Kuv yog tug TSWV kws has le ntawd.”

⁴⁰Tug TSWV coglug has tas yuav muaj ib tsaav tuabneeg tuaj tua cov Mau-am ib yaam le tug dlaav yaa qwv ntxaj lug

⁴¹txeeb nwg tej nroog hab tej chaw faajxwm. Nub ntawd Mau-am tej tubrog yuav ntshai ib yaam le tug quaspuj yuav yug mivnyuas.

⁴²Mau-am yuav raug rhuav kuas puamtsuaj, tsi tau ua ib tsaav tuabneeg lawm, rua qhov nwg ntxeev sab rua kuv.

⁴³Tej kev txhawj ntshai, tej qhov hab tej vuj hlua tub cuab tog cov Mau-am kev lawm. Kuv yog tug TSWV kws has le ntawd.

⁴⁴Yog leejtwg tsiv kev txhawj ntshai, tug ntawd yuav poob qhov hab yog leejtwg nce tawm huv qhov lug, tug ntawd yuav maag vuj hlua, rua qhov tug TSWV tub npaaj kev puamtsuaj tog cov Mau-am lawm.

⁴⁵Cov tuabneeg kws tsi muaj leejtwg paab, tsiv moog nrhav chaw nkaum rua huv Hesenpoos, lub nroog kws yaav taag lug Vaajntxwv Xihoos kaav, tabsis suavtawg taabtom kub cig laam lug. Suavtawg kub cov Mau-am kws nyam ua rog huv taj nraag moog rua sau tej hauv roob sab.

⁴⁶Mau-am raug puamtsuaj lawm! Cov tuabneeg kws pe tug mlom Khemaus raug puamtsuaj, hab puab tej tub tej ntxhais raug luas nteg coj moog rua lwm lub tebchaws lawm.

⁴⁷Tej kws has taag lug nuav yuav lug raug cov Mau-am, tabsis muaj ib nub tug TSWV yuav pub kuas cov Mau-am rov muaj kev vaammeej dlua.