Read Hmong Njua Yelemis 49 Bible Online

Yelemis 49 - Hmong Njua bible

Yelemis 49

¹Tug TSWV has rua cov Amoos has tas, “Cov Yixalayees tsi muaj tub los? Puab tsi muaj ib tug lug tuav puab lub tebchaws le los? Vim le caag puab ca cov tuabneeg kws pe tug mlom Maulej tuaj txeeb xeem Khas cheebtsaam aav rua puab nyob lawm?

²Tabsis tub txug lub sijhawm kws kuv ua kuas cov tuabneeg kws nyob huv lub nroog Lanpas nov tej suab sis ntaus sis tua, lub nroog ntawd yuav puamtsuaj hab tej zog kws nyob ibncig yuav kub nyab taag. Ces cov Yixalayees txhaj yuav txeeb tau puab lub tebchaws kws luas txeeb lawm rov lug.

³Cov tuabneeg kws nyob huv lub nroog Hesenpoos, ca le tsaa suab quaj! Lub nroog A-is raug puamtsuaj lawm! Cov quaspuj kws nyob huv lub nroog Lanpas, ca le quaj ntsuag! Ca le npua ntaub tsaaj hab quaj ntsuag. Ca le moog moog lug lug tsi paub moog qhov twg! Luas yuav coj mej tug vaajtswv Maulej, cov povthawj hab cov numtswv moog rua lwm lub tebchaws.

⁴Cov tuabneeg sab tsi ncaaj, vim le caag mej khaavtheeb ua luaj? Mej tug zug tub ntaug lawm. Vim le caag mej ca sab rua mej tug zug hab has tas, ‘Yuav tsi muaj leejtwg tawmtsaam tau peb le?’

⁵Kuv yuav tso kev txhawj ntshai txhua phaab tuaj rua mej, mej txhua tug nyag taug nyag fuas sav tsiv, mej moog nyob qhov twg los yuav tsi muaj leejtwg sau mej rov lug nyob ua ke le lawm.

⁶“Tabsis tom qaab ntawd kuv yuav ua kuas cov Amoos rov vaammeej dlua. Kuv yog tug TSWV kws has le ntawd.”

⁷Tug TSWV kws muaj Fwjchim Luj kawg nkaus has txug cov Edoos has tas, “Cov Edoos txawm tsi muaj ib tug ntse le los? Puab cov tuavxaam tsi paub qha puab le los? Puab tej tswvyim pluj taag lawm los?

⁸Cov tuabneeg Dedaas, mej ca le tsiv hab tig hlo rov qaab! Ca le tsiv moog nkaum! Kuv yuav rhuav Exaus cov xeebntxwv kuas puamtsuaj taag, rua qhov tub txug lub sijhawm kws kuv rau txim rua puab lawm.

⁹Thaus tuabneeg dle txiv maab puab tseg ibtxha ca rua ntawm txuj maab, hab yog tubsaab tuaj thaus tsaus ntuj, puab tsuas nyag tej kws puab xaav yuav xwb.

¹⁰Tabsis thaus kuv rhuav Exaus cov xeebntxwv, kuv yuav tsi tseg ib qhov chaw rua puab nkaum le. Kuv ua le ntawd kuas puab tsi tau chaw nraim cev. Cov Edoos puamtsuaj taag tsi tshuav ib tug seem le.

¹¹Tseg mej tej mivnyuas ntsuag rua kuv, kuv yuav tu hab tsomkwm puab. Mej cov puj ntsuag los kuas puab tso sab rua kuv.

¹²“Txawm yog cov kws tsi xaav raug txim los yuav raug txim. Mej xaav has tas, mej yuav tsi raug txav txim nua los? Yeej tsi tau le! Mej yuavtsum raug txim xwb!

¹³Kuv coglug has tas, lub nroog Npauxelas yuav ua suabpuam hab ua chaw rua luas ntshai tsi xaav pum; tej tuabneeg dlua kev yuav txobthuam hab tuav nwg lub npe foom tsi zoo; hab tej zog kws nyob ibncig los yuav puamtsuaj taag. Kuv yog tug TSWV kws has le ntawd.”

¹⁴Kuv has tas, “Edoos, kuv tub nov tug TSWV tso tuabneeg xaa xuv moog rua ntau tsaav tuabneeg kuas sau puab tej tubrog tuaj tawmtsaam mej lawm.

¹⁵Tug TSWV yuav ua kuas mej qaug zug, hab tsi muaj leejtwg fwm mej.

¹⁶Mej txujkev khaavtheeb dlaag ntxag mej, tsi muaj leejtwg fwm mej le mej xaav. Txawm yog mej yuav nyob sau tej roob tsuas hab sau tej roob sab; nyob sab ib yaam le tej dlaav yaa los tug TSWV yuav chua kuas mej poob lug. Kuv yog tug TSWV kws has le ntawd.”

¹⁷Tug TSWV has tas, “Txujkev puamtsuaj kws yuav lug raug cov Edoos txaus ntshai heev, ua rua txhua tug tuabneeg kws dlua kev ceeb hab ntshai kawg le.

¹⁸Txujkev puamtsuaj kws raug cov Edoos zoo ib yaam le tej kws lug raug lub nroog Xaudoos hab lub nroog Kaumaulas, hab tej zej zog kws nyob puagncig ntawd, yuav tsi muaj tuabneeg lug nyob le lawm. Kuv yog tug TSWV kws has le ntawd.

¹⁹Kuv yuav ua kuas cov Edoos tsiv tawm huv puab lub tebchaws moog, thaus puab tsi nwm ib yaam le tug tsuv ntxhuav tawm huv thaaj haav zoov ntawm ntug Dlej Yauladees moog rua huv lub tshaav zaub ntaag. Ces tug thawjcoj kws kuv xaiv yuav tau kaav lub tebchaws. Leejtwg txhaj yuav pev tau kuv? Leejtwg txhaj yuav muaj cuabkaav nrug kuv sis tw? Tug thawjcoj twg txhaj yuav tawmtsaam yeej kuv?

²⁰Yog le ntawd, mej ca le noog tej kws kuv npaaj sab yuav ua rua cov Edoos hab cov tuabneeg kws nyob huv lub nroog Temas. Luas yuav coj puab tej mivnyuas moog, yuav ua rua txhua tug ntshai heev.

²¹Thaus Edoos puamtsuaj, hab lub nplajteb ua zug koog, hab yuav nov puab lub suab quaj nrov moog txug nraag Havtxwv Lab.

²²Yeebncuab yuav tuaj tua lub nroog Npauxelas, ib yaam le tug dlaav yaa qwv ntxaj lug. Nub ntawd Edoos tej tubrog yuav ntshai ib yaam le tug quaspuj kws yuav yug mivnyuas.”

²³Tug TSWV has txug lub nroog Damaxes le nuav: “Thaus cov tuabneeg kws nyob huv lub nroog Hamas hab Alepas nov tej xuv tsi zoo, puab yuav txhawj hab ntxhuv sab heev. Kev txhawj hab kev ntxhuv sab ua rua puab lub sab nyob tsi tug ib yaam le havtxwv ndlaas.

²⁴Cov tuabneeg kws nyob huv lub nroog Damaxes qaug zug, ntshai hab tsiv moog lawm. Puab mob hab txomnyem sab ib yaam le tug quaspuj kws mob plaab yuav yug mivnyuas.

²⁵Lub nroog kws ibtxwm nto npe hab muaj kev lomzem tub puamtsuaj taag lawm.

²⁶Nub ntawd nwg tej tub hluas yuav raug tua tuag rua ntawm tej kev hab lub nroog, hab nwg tej tubrog yuav puamtsuaj taag.

²⁷Kuv yuav hlawv lub nroog Damaxes tej ntsaa yeej, hab suavtawg yuav kub Vaajntxwv Npeehadas lub loog. Kuv yog tug TSWV kws muaj Fwjchim Luj kawg nkaus has le ntawd.”

²⁸Tug TSWV has txug xeem Kedas hab cheebtsaam Haxaules kws Vaajntxwv Nenpukajnexales kws kaav tebchaws Npanpiloos tuaj tua yeej has tas, “Ca le moog tua xeem Kedas hab rhuav cov tuabneeg kws nyob saab nubtuaj kuas puamtsuaj taag!

²⁹Ca le moog fuab puab tej tsevntaub, tej yaaj tej tshis, tej ntaub vuv tsev hab txhua yaam kws muaj nyob huv puab tej tsevntaub. Caab puab tej ntxhuav moog hab has rua puab tas, ‘Tej kev txhawj ntshai tuaj vij mej lawm lauj!’ ”

³⁰Tug TSWV has tas, “Cov tuabneeg kws nyob huv lub nroog Haxaules, mej ca le tsiv moog nkaus kuas dleb. Vaajntxwv Nenpukajnexales kws kaav tebchaws Npanpiloos tub tuaj vij hab yuav tua mej. Nwg has tas,

³¹‘Peb ca le moog tua cov tuabneeg kws nyob tso sab lug! Puab lub nroog tsi muaj roojvaag lossis tsi xauv hab tsi muaj dlaabtsi thaiv le.’

³²“Ca le caab taagnrho puab tej ntxhuav hab tej yaaj tej tshis moog. Kuv yuav muab cov tuabneeg kws txav puab tej plaubhau tuab tuab lu lawv tsiv ri sua rua txhua txujkev, hab kuv yuav tso kev puamtsuaj txhua phaab lug raug puab.

³³Lub nroog Haxaules yuav ua suabpuam moog ibtxhis, ua chaw rua tej maa lug nyob. Yuav tsi muaj tuabneeg nyob huv ntxiv lawm. Kuv yog tug TSWV kws has le ntawm.”

³⁴Thaus Xedekiyas ua vaajntxwv kaav tebchaws Yudas tau tsi ntev, tug TSWV kws muaj Fwjchim Luj kawg nkaus has rua kuv txug cov Elames has tas,

³⁵“Kuv yuav muab cov tubrog Elames kws tua neevnti kws ua rua cov Elaas muaj zug heev tua kuas tuag taag.

³⁶Kuv yuav tso cua ntsawj plaub ceg kaum ntuj tuaj tawmtsaam cov Elames, hab kuv lawv nwg cov tuabneeg kuas tsiv ri sua moog rua txhua qhov, tsi muaj ib lub tebchaws kws nwg tsaav tuabneeg tsi tau moog nyob le.

³⁷Kuv yuav ua kuas cov Elames ntshai puab cov yeebncuab kws xaav muab puab tua povtseg. Vim kuv txujkev chim, kuv yuav ua kuas cov Elaas puamtsuaj, hab tso tubrog tuaj tua puab moog txug thaus puab tu noob taag.

³⁸Kuv yuav rhuav puab cov vaajntxwv hab cov thawjcoj kuas puamtsuaj taag hab txawb kuv lub zwmtxwv rua qhov ntawd.

³⁹Tabsis tom qaab ntawd, kuv yuav pub kuas cov Elames rov vaammeej dlua. Kuv yog tug TSWV kws has le ntawd.”