Read Hmong Njua Yelemis 5 Bible Online

Yelemis 5 - Hmong Njua bible

Yelemis 5

¹Cov tuabneeg kws nyob huv lub nroog Yeluxalees, ca le moog rua tom tej kev! Tsaa muag saib puagncig mej! Mej saib kuas tseeb! Moog nrhav tom tej kab tej khw saib puas muaj ib tug tuabneeg ncaaj nceeg hab muab sab npuab Vaajtswv? Yog mej nrhav tau tug tuabneeg ncaaj nceeg, ces tug TSWV yuav zaam Yeluxalees lub txim.

²Txawm yog mej has tas, mej pehawm tug TSWV, mej has le ntawd, tabsis mej tsi ua lawv le mej has.

³Qhov tseemceeb, tug TSWV xaav kuas mej muaj txujkev ncaaj nceeg xwb. Tug TSWV nplawm mej, tabsis mej tsi quavntsej; nwg ntaus mej, tabsis mej tsi xyum ua zoo. Mej tawv ncauj heev hab tsi tso mej tej kev txhum tseg le.

⁴Kuv xaav has tas, “Cov tuabneeg nuav tsi meejpem hab tsi paub qaabhau le. Puab ua le tuabneeg ruag, puab tsi paub ua tej kws puab tug Vaajtswv nyam, hab puab tsi paub tej kws Vaajtswv xaav kuas puab ua.

⁵Kuv yuav moog cuag cov tuabneeg kws muaj meejmom hab nrug puab thaam. Puab paub tej kws puab tug Vaajtswv nyam, hab puab paub tej kws tug TSWV xaav kuas puab ua.” Tabsis puab txhua tug tsi leeg paub tug TSWV lub fwjchim hab tsi noog nwg lug.

⁶Vim le ntawd tsuv ntxhuav txhaj tawm huv haav zoov lug tum puab; maa yuav lug tom taj suabpuam lug muab puab dlua kuas ndluag ua tej dlaim, hab tsuv txaij yuav nyaag lug rua huv puab tej nroog. Yog puab tawm moog rua saab nrau, puab yuav raug dlua ua tej dlaim vim puab ua kev txhum ntau heev, hab tso Vaajtswv tseg zug zug lawm.

⁷Tug TSWV has tas, “Vim le caag kuv txhaj zaam txim rua kuv tsaav tuabneeg? Puab tso kuv tseg hab moog pe tej mlom kws tsi yog Vaajtswv lawm. Kuv pub kuv tsaav tuabneeg tau noj tsau npo, tabsis puab moog ua kev nkauj kev nraug hab siv puab lub sijhawm moog ntxag tej namndlav.

⁸Puab zoo ib yaam le tej txiv neeg qus kws rog hab xaav phuv maum; puab xaav ntsoov rua txujkev ntxag luas tej quaspuj.

⁹Puas tsimnyog ca kuv rau txim rua puab, vim puab tej kev txhum? Hab ca kuv ua pauj rua tsaav tuabneeg kws ua le nuav?

¹⁰Kuv yuav ca yeebncuab tuaj txav kuv tsaav tuabneeg tej vaaj txiv maab povtseg, tabsis tsi pub ua kuas puab tuag taag, kuv yuav kuas yeebncuab muab tej ceg txiv maab ntshua povtseg; rua qhov tej ceg txiv maab ntawd tsi yog kuv le.

¹¹Cov Yixalayees hab cov Yudas tsi muab sab npuab kuv hlo le. Kuv yog tug TSWV kws has le ntawd.”

¹²Tug TSWV tsaav tuabneeg tsi leeg paub nwg hab has tas, “Nwg yeej yuav tsi ua le caag rua peb le! Yuav tsi muaj kev puamtsuaj lug raug peb! Yuav tsi muaj kev tsuv kev rog lossis kev tshaib kev nqhes lug raug peb le!”

¹³Puab has tas cov cev Vaajtswv lug tso ncua xwb, puab yeej tsi nov tug TSWV has rua puab le. Tabsis tug TSWV kws yog Vaajtswv tug muaj Fwjchim Luj kawg nkaus has rua kuv tas, “Yelemis, vim cov tuabneeg nuav has lug saib tsi taug kuv le ntawd, kuv yuav muab kuv tej lug kws kub cuag suavtawg tso rua huv koj qhovncauj. Cov tuabneeg ntawd yuav zoo ib yaam le tej tawg, suavtawg yuav kub puab taag dlu lug.”

¹⁵Cov Yixalayees, tug TSWV yuav coj ib tsaav tuabneeg kws nyob dleb heev tuaj tawmtsaam mej. Yog tsaav tuabneeg kws muaj zug hab nyob ntev lug lawm. Mej tsi paub tsaav tuabneeg ntawd tej lug le.

¹⁶Puab cov tubrog kws tua neevnti muaj zug heev, hab puab tua tsi taabncuab leejtwg le.

¹⁷Puab yuav noj mej tej qoob hab tej zaub mov; puab yuav tua mej tej tub tej ntxhais kuas tuag taag. Puab yuav tua mej tej tsaj txhu hab yuav txav mej tej txiv maab hab ntuv tej txiv ncuav pas povtseg. Tej nroog muaj ntsaa yeej kws mej ca sab rua yuav raug yeebncuab tej tubrog muab tsoo pob puag taag.

¹⁸Tug TSWV has tas, “Txawm yog le caag los nub ntawd, kuv yuav tsi pub kuas kuv tsaav tuabneeg tuag tu noob.

¹⁹Yelemis, thaus puab nug has tas, vim le caag kuv ua tej nuav, koj has rua puab tas, vim puab tso kuv tseg hab moog pe luas lwm tsaav tuabneeg tej vaajtswv huv mej lub tebchaws, yog le ntawd puab yuav tau moog pe lwm tsaav tuabneeg tej vaajtswv nyob rua lwm tebchaws.”

²⁰Tug TSWV has tas, “Koj ca le moog has rua Yakhauj cov xeebntxwv huv tebchaws Yudas has tas,

²¹Mej cov kws yog tuabneeg ruag hab tsi totaub, ca le tig pobntseg noog kuv tej lug; mej muaj qhovmuag tabsis tsi pum kev hab muaj pobntseg, tabsis tsi nov lug.

²²Kuv yog tug TSWV; vim le caag mej tsi fwm kuv? Vim le caag mej tsi ntshai kuv tshee nyo ntawm kuv lub xubndlag? Kuv muab lub taj xuabzeb ua nrim quas dlej havtxwv, yog tug nrim kws nyob moog ibtxhis tsi muaj leejtwg hlaa dlhau. Txawm yog havtxwv ntsawj tuaj los yuav tsi dlhau hab havtxwv ndlaas tuaj los yuav tsi pob.

²³Tabsis mej yog tuabneeg tawv ncauj hab ntxeev sab, mej moog xu quas dlaag rua ib caag hab tso kuv tseg.

²⁴Txawm yog kuv tso naag lug lawv caij lawv nyoog rua mej hab pub mej muaj qoobloo sau txhua xyoo los mej tsi paub fwm kuv le.”

²⁵Mej tej kev txhum ua rua mej tsi tau txais Vaajtswv tej koob moov.

²⁶“Muaj ib cov tuabneeg sab phem nyob nrug kuv tsaav tuabneeg; puab pw zuv tog ib yaam le tej tuabneeg nthuav tsig cuab noog, tabsis yog puab cuab muv kuas maag tuabneeg.

²⁷Tej tuabneeg moog cuab tau noog puv tawb le caag, cov tuabneeg sab phem moog fuab luas tej khoom lug puv tsev ib yaam le ntawd. Vim le ntawd puab txhaj npluanuj hab muaj fwjchim,

²⁸hab muaj noj muaj haus nplua mag ua rua puab rog. Puab ua kev phem kev qas tsi paub dlhuav le. Puab tsi paab tsaa tej mivnyuas ntsuag cai lossis tsi ua ncaaj rua cov tuabneeg kws raug luas tsimtxom.

²⁹“Tabsis kuv kws yog tug TSWV, yuav rau txim rua puab, vim tej kws puab ua ntawd; kuv yuav ua pauj rua tsaav tuabneeg nuav.

³⁰Muaj ib yaam xwm phem kws xaav tsi thoob tshwm rua huv lub tebchaws nuav:

³¹Cov cevlug has lug dlaag xwb; cov povthawj tswjfwm cov pejxeem lawv le cov cevlug has, hab kuv tsaav tuabneeg tsi caam le. Tabsis thaus kawg puab yuav ua le caag?”