Read Hmong Njua Yelemis 50 Bible Online

Yelemis 50 - Hmong Njua bible

Yelemis 50

¹Tug TSWV has rua kuv txug lub nroog Npanpiloos hab nwg cov tuabneeg le nuav:

²“Koj ca le qha rua txhua tsaav tuabneeg! Tshaajtawm rua suavdlawg! Ca le tsaa chij hab tshaajtawm kuas suavdlawg paub! Tsi xob zais ib yaam dlaabtsi le! Npanpiloos swb lawm! Luas tub muab nwg tug vaajtswv Madus tsoo tawg taag lawm! Npanpiloos tej mlom raug rhuav poob ntsejmuag; nwg tej mlom kws phem qas raug tsoo tawg taag!

³“Muaj ib tsaav tuabneeg kws nyob rua saab qaumteb yuav tuaj tua lub nroog Npanpiloos, kuas ua suabpuam taag. Tej tuabneeg hab tej tsaj txhu yuav tsiv taag tsi nyob huv lawm.”

⁴Tug TSWV has tas, “Thaus txug lub sijhawm ntawd, cov Yixalayees hab cov Yudas yuav quaj lug nrhav kuv kws yog puab tug Vaajtswv.

⁵Puab yuav nug txujkev kws moog rua huv lub nroog Xi-oos hab taug txujkev ntawd moog. Puab yuav nrug kuv coglug ruaj khov moog ibtxhis tsi rhuav le lawm.

⁶“Kuv tsaav tuabneeg zoo ib yaam le paab yaaj kws tug yug yaaj ca puab moog yuam kev rua sau tej roob. Puab moog ib lub roob rua ib lub roob ib yaam le paab yaaj kws nrhav tsi tau kev rov lug tsev.

⁷Txhua tug kws ntsib puab muab puab tua. Puab cov yeebncuab has tas, ‘Cov Yixalayees ua txhum rua tug TSWV, yog le ntawd tej kws peb ua yeej tsi txhum hab. Puab cov yawmkoob yeej ibtxwm ca sab rua tug TSWV. Tsimnyog puab muab sab npuab tug TSWV hab.’

⁸“Cov Yixalayees, mej ca le tsiv tawm huv lub nroog Npanpiloos moog! Ca le tso lub tebchaws nuav tseg! Mej ca le ua cov kws xub tsiv ntaag!

⁹Kuv yuav tshoov tej tsaav tuabneeg nyob saab qaumteb kws muaj zug heev ua ib paab tuaj tawmtsaam lub nroog Npanpiloos; puab yuav tuaj tsheej kev tuaj tua hab txeeb tau lub tebchaws Npanpiloos; puab yog cov kws tua neevnti ncaaj heev, puab tua tsi saav le.

¹⁰Luas yuav tuaj fuab lub nroog Npanpiloos. Cov tuabneeg kws tuaj fuab yuav nqaa txhua yaam zoo kws puab xaav yuav moog. Kuv yog tug TSWV kws has le ntawd.”

¹¹Tug TSWV has tas, “Cov Npanpiloos, mej fuab kuv tsaav tuabneeg. Mej zoo sab hab txaus sab ib yaam le tug xyuas nyuj dlha tom tshaav zaub lossis ib yaam le tug txiv neeg xob kws hee quas lawg,

¹²tabsis mej lub nroog yuav poob ntsejmuag hab txaajmuag kawg le. Npanpiloos yuav poob qeg tshaaj txhua lub tebchaws huv tuabsi; nwg yuav ua suabpuam qhuav nkig nkuav tsi muaj dlej.

¹³Vim kuv txujkev chim, Npanpiloos raug rhuav puamtsuaj taag tsi muaj tuabneeg nyob; tej tuabneeg kws dlua kev yuav ceeb hab xaav tsi thoob.

¹⁴“Cov tuabneeg kws tua neevnti yuav tuaj sawv ua tsheej phaj vij tua lub nroog Npanpiloos. Ca le tua mej tej xub neevnti rua huv Npanpiloos, rua qhov nwg tau ua txhum rua kuv kws yog tug TSWV lawm.

¹⁵Ca le qw hab dlha moog vij lub nroog! Nwgnuav Npanpiloos tub lug thawj lawm. Luas tub rhuav nwg tej ntsaa yeej pob taag lawm. Kuv taabtom ua pauj cov Npanpiloos, yog le ntawd, mej ca le ua pauj cov Npanpiloos, hab ua rua puab ib yaam le puab tau ua rua lwm tsaav tuabneeg lawm.

¹⁶Tsi xob cog hab sau qoob huv lub tebchaws ntawd le. Lwm tsaav tuabneeg kws nyob huv lub tebchaws ntawd yuav ntshai tej tubrog kws tuaj tua lub nroog Npanpiloos, puab yuav ca le rov qaab moog tsev.”

¹⁷Tug TSWV has tas, “Cov Yixalayees zoo ib yaam le paab yaaj kws tsuv ntxhuav caum tawg tsiv ri sua. Thawj zag puab raug tug vaajntxwv kws kaav tebchaws Axilias tua, hab tom qaab ntawd puab raug Vaajntxwv Nenpukajnexales kws kaav tebchaws Npanpiloos cua puab tej pobtxhaa.

¹⁸Vim le ntawd, kuv yog tug TSWV kws yog cov Yixalayees tug Vaajtswv kws muaj Fwjchim Luj kawg nkaus yuav rau txim rua Vaajntxwv Nenpukajnexales hab nwg lub tebchaws ib yaam le kuv rau txim rua tug vaajntxwv kws kaav tebchaws Axilias.

¹⁹Kuv yuav coj cov Yixalayees rov lug rua huv puab lub tebchaws. Puab yuav tau noj tej qoob kws puab cog rua sau Roob Kalemees hab ntawm cheebtsaam Npasaas, hab tau noj tej qoob kws yog puab cog rua cheebtsaam Efalayees hab Nkile-as.

²⁰Thaus txug lub sijhawm ntawd, cov Yixalayees yuav tsi ua txhum, hab cov Yudas yuav tsi ua kev phem kev qas, rua qhov kuv yuav zaam txim rua cov tuabneeg kws kuv tseg puab txujsa. Kuv yog tug TSWV kws has le ntawd.”

²¹Tug TSWV has tas, “Ca le moog tua lub tebchaws Melathayees hab cov tuabneeg Pekaus, tua hab rhuav kuas puab puamtsuaj taag. Ca le ua txhua yaam lawv le kuv saamfwm rua mej. Kuv yog tug TSWV kws has le ntawd.

²²Nov tej suab sis ntaus sis tua nrov thoob tebchaws, hab muaj kev puamtsuaj luj heev.

²³Npanpiloos muab rauj tsoo lub nplajteb tawg ntsoog ntxawg, nwgnuav raab rauj ntawd tub tawg taag lawm. Tej xwm kws raug lub tebchaws Npanpiloos ua rua txhua tsaav tuabneeg thoob nplajteb ceeb luj kawg le.

²⁴Npanpiloos, koj sawv tawmtsaam kuv, nwgnuav koj tub maag lub vuj hlua kws kuv cuab tog koj kev lawm; txawm le ntawd los koj tub tsi paub le.

²⁵Kuv tub qheb lub chaw kws ntim kuv tej cuabyeej ua rog, vim kuv txujkev chim, kuv txhaj rhu tej ntawd tawm, rua qhov kuv yog tug TSWV kws muaj Fwjchim Luj kawg nkaus hab kaav ib puas tsaav yaam, kuv muaj num tseemceeb ua nyob huv tebchaws Npanpiloos.

²⁶Ca le puav tua txhua phaab tuaj hab tsoo lub txhaab rau khoom kuas tawg; sau tej khoom kws puab fuab tau lug teeb ua tej pawg ib yaam le tej pawg nplej! Ca le rhuav lub tebchaws kuas puamtsuaj, tsi xob tseg ib yaam dlaabtsi le.

²⁷Ca le tua puab tej tubrog! Ca le muab puab tua kuas tuag taag! Cov Npanpiloos raug puamtsuaj lawm! Tub txug lub sijhawm rau txim rua puab lawm!”

²⁸(Cov tuabneeg kws tsiv huv tebchaws Npanpiloos rov lug rua huv lub nroog Yeluxalees, puab has tas tug TSWV kws yog peb tug Vaajtswv tau ua pauj rua cov Npanpiloos, vim tej kws puab tau ua tsi zoo rua nwg lub Tuamtsev.)

²⁹“Ca le has kuas cov tuabneeg kws txawj tua neevnti nqaa puab tej neevnti hab xub vug moog tawmtsaam lub nroog Npanpiloos. Ca le moog vij lub nroog hab tsi pub ib tug twg tsiv dlim le. Ua pauj rua nwg lawv le tej kws nwg tau ua lawm, hab ua phem rua puab lawv le nwg tau ua rua lwm tug lawm, rua qhov nwg khaavtheeb tawmtsaam kuv kws yog cov Yixalayees tug TSWV kws dlawbhuv.

³⁰Yog le ntawd, nwg tej tub hluas yuav raug tua tuag taag rua ntawm tej kev huv nroog, hab taagnrho nwg cov tubrog yuav raug tua tuag taag rua nub ntawd. Kuv yog tug TSWV kws has le ntawd.

³¹“Npanpiloos, koj lub sab puv nkaus kev khaavtheeb, yog le ntawd, kuv kws yog tug TSWV kws muaj Fwjchim Luj kawg nkaus hab kaav ib puas tsaav yaam yuav tawmtsaam koj. Tub txug lub sijhawm kws kuv rau txim rua koj lawm!

³²Koj tsaav tuabneeg kws khaavtheeb yuav dlawm hab qaug, tsi muaj leejtwg paab tsaa koj sawv le. Kuv yuav hlawv koj tej nroog hab ib puas tsaav yaam kws nyob puagncig ntawd kuas kub nyab taag.”

³³Tug TSWV kws muaj Fwjchim Luj kawg nkaus has tas, “Cov Yixalayees hab cov Yudas raug luas tsimtxom nyaav kawg. Cov kws nteg puab ntawd zuv puab nruj heev tsi pub puab moog qhov twg le.

³⁴Tabsis tug kws yuav tso puab dlim muaj zug heev, nwg lub npe hu ua tug TSWV kws muaj Fwjchim Luj kawg nkaus. Nwg yuav lug txav puab rooj plaub hab coj kev thaajyeeb lug rua lub nplajteb nuav, tabsis cov Npanpiloos yuav raug kev ntxhuv sab.”

³⁵Tug TSWV has tas, “Ca kev tuag lug raug Npanpiloos! Ca kev tuag lug raug nwg cov pejxeem, nwg cov numtswv hab nwg tej tub txawg tub ntse.

³⁶Ca kev tuag lug raug nwg cov cevlug cuav, vim puab ruag kawg le! Ca kev tuag lug raug nwg cov tubrog, ua rua puab ntshai kawg le!

³⁷Ca le rhuav nwg tej neeg hab tsheb neeg kuas puamtsuaj! Ca kev tuag lug raug tej tubrog kws nwg ndlav tuaj paab, ua rua puab qaug zug! Ca le rhuav nwg tej txhaab nyaj hab fuab nwg tej nyaj moog.

³⁸Ca nwg lub tebchaws qhuav nkig nkuav, hab ua kuas nwg tej dlej tu nqhuab taag. Npanpiloos yog lub tebchaws kws muaj mlom ntau, txhaj ua rua suavdlawg qaug sab rua tej mlom ntawd.

³⁹“Yog le ntawd, tej tsaj nruab nraag, maa hab tej noog tsi huv yuav lug nyob huv Npanpiloos. Txij nuav moog yaav tom ntej yuav tsi muaj tuabneeg moog nyob huv le lawm.

⁴⁰Tej kev puamtsuaj kws lug raug lub nroog Npanpiloos zoo ib yaam le tej kws lug raug lub nroog Xaudoos, lub nroog Kaumaulas hab tej zog miv kws nyob ibncig ntawd. Yuav tsi muaj tuabneeg lug nyob qhov ntawd le lawm. Kuv yog tug TSWV kws has le ntawd.

⁴¹“Muaj tuabneeg taabtom tuaj saab qaumteb tuaj, Yog tsaav tuabneeg kws muaj zug hab muaj ntau tug vaajntxwv taug kev dleb tuaj ua rog.

⁴²Puab npaaj rawv puab tej neevnti hab tej ntaaj. Puab limham hab tsi taabncuab leejtwg le. Puab caij neeg dlha nrov nroo ntwg tuaj tawmtsaam lub nroog Npanpiloos ib yaam le havtxwv ndlaas;

⁴³Tug vaajntxwv kws kaav tebchaws Npanpiloos nov txug tej xwm nuav, ua rua nwg ob txhais npaab tsaug taag tsi muaj zug le lawm; kev ntxhuv sab ua rua nwg mob ib yaam le tug quaspuj kws mob plaab yug mivnyuas.

⁴⁴“Kuv yuav ua kuas cov Npanpiloos tsiv tawm huv puab lub nroog moog thaus puab tsi nwm ib yaam le tug tsuv ntxhuav kws tawm huv thaaj haav zoov ntawm ntug Dlej Yauladees moog rua huv lub tshaav zaub. Ces tug thawjcoj kws kuv xaiv yuav tau kaav lub tebchaws. Leejtwg txhaj yuav pev tau kuv? Leejtwg txhaj yuav muaj cuabkaav nrug kuv sis tw? Tug thawjcoj twg txhaj yuav tawmtsaam yeej kuv?

⁴⁵Yog le ntawd, mej ca le noog tej kws kuv npaaj sab yuav ua rua lub nroog Npanpiloos hab nwg cov pejxeem. Luas yuav coj puab tej mivnyuas moog, ua rua txhua tug ntshai heev.

⁴⁶Thaus lub nroog Npanpiloos puamtsuaj lub nplajteb ua zug koog, hab txhua tsaav tuabneeg yuav nov nwg lub suab quaj.”