Read Hmong Njua Yelemis 51 Bible Online

Yelemis 51 - Hmong Njua bible

Yelemis 51

¹Tug TSWV has tas, “Kuv taabtom tso cua ntsawj kev puamtsuaj lug tawmtsaam Npanpiloos hab nwg cov pejxeem.

²Kuv yuav tso lwm tsaav tuabneeg tuaj rhuav Npanpiloos ib yaam le cua ntsawj tej quavnyaab. Nub kws kev puamtsuaj lug txug, hab puab yuav tuaj txhua phaab tuaj tua Npanpiloos kuas lub tebchaws nyob qhuav nkuag ca.

³Tsi xob pub nwg cov tubrog tau sijhawm tua puab tej neevnti lossis naav puab tej rig tsho ua rog le. Tsi xob tseg tej tub hluas le. Tua cov tubrog kuas tuag taag!

⁴Puab yuav raug mob hab tuag rua ntawm tej kev huv puab tej nroog.

⁵Kuv yog tug TSWV kws yog Vaajtswv tug kws muaj Fwjchim Luj kawg nkaus, txawm yog cov Yixalayees hab cov Yudas tau ua txhum tawmtsaam kuv kws yog puab tug Vaajtswv kws dlawbhuv los kuv tsi tso puab tseg.

⁶Mej ca le tsiv tawm huv Npanpiloos moog! Tsiv tag kuas mej dlim! Tsi xob this cov Npanpiloos lub txim tuag. Nwgnuav kuv taabtom ua pauj hab rau txim rua cov Npanpiloos lawv le puab tsimnyog raug.

⁷Npanpiloos zoo ib yaam le lub khob kub huv kuv txhais teg kws muab rua tuabneeg nplajteb haus kuas qaug. Txhua tsaav tuabneeg kws haus cov cawv huv lub khob ntawd ua rua puab tsi meejpem lawm.

⁸Tsi nwm Npanpiloos ca le qaug hab puamtsuaj lawm. Ca le quaj ntsuag rua Npanpiloos! Ca le muab tshuaj qhwv nwg tej qhov txhaab, tej zag nyaj nwg yuav zoo.

⁹Tej tuabneeg txawv tebchaws kws nyob ntawd has tas, ‘Peb paab Npanpiloos, tabsis paab tsi tau, peb ca le rov qaab moog tsev. Vaajtswv rau txim nyaav heev rua Npanpiloos, nwg txhaj puamtsuaj lawm.’ ”

¹⁰Tug TSWV has tas, “Kuv tsaav tuabneeg, mej ca le qw has tas, ‘Peb cov kws nyob ntawm nwg saab xis ca le moog pav tej kws tug TSWV kws yog peb tug Vaajtswv tau ua lawm rua cov tuabneeg kws nyob huv Yeluxalees paub.’ ”

¹¹Tug TSWV tub tshoov cov vaajntxwv kws kaav tebchaws Medias sab, kuas tuaj rhuav tebchaws Npanpiloos lawv le nwg npaaj sab lawm. Rua qhov puab tau tuaj rhuav tug TSWV lub Tuamtsev, tug TSWV txhaj ua pauj rua puab. Cov thawj tubrog saamfwm has tas, “Mej ca le huv mej tej xub vug! Ca le nqaa mej tej thaiv nav ntaaj!

¹²Ca le kwv chij coj tubrog moog tsoo lub nroog Npanpiloos tej ntsaa yeej. Ca le tso tubrog moog zuv tej chaw faajxwm khov kho. Tso tubrog moog zuv kev tog kuas zoo!” Tug TSWV tau ua rua cov Npanpiloos lawv le nwg tau has tseg lawm.

¹³Muaj ntau tug dlej hab ntau lub qhov nyaj qhov kub nyob huv lub tebchaws ntawd, tabsis nwg lub sijhawm taag lawm, hab nwg txujsa tu lawm.

¹⁴Tug TSWV kws muaj Fwjchim Luj kawg nkaus coglug has tas, nwg yuav coj tuabneeg coob heev ib yaam le cov kooj txomfaav tuaj tawmtsaam lub nroog Npanpiloos, puab yuav qw zoo sab rua qhov puab yeej lawm.

¹⁵Tug TSWV tsim lub nplajteb lug ntawm nwg lub fwjchim; nwg tsim lub nplajteb lug ntawm nwg lub tswvyim; hab nthuav lub ntuj lug ntawm nwg txujkev txawj ntse.

¹⁶Thaus tug TSWV has rua tej dlej sau nruab ntug, ces tej dlej txawm nrov nroo ntwg. Nwg ua kuas muaj fuab tsaus nti tim qaab ntug lug. Nwg ua kuas muaj tsaglig xub thaus lug naag, hab tso cua huv nwg lub txhaab tuaj ntsawj.

¹⁷Tuabneeg txhua tug puavleej ruag hab tsi muaj kev txawj ntse; cov tuabneeg nchuav mlom yuav raug txaajmuag; rua qhov tej mlom kws puab nchuav tsi muaj sa hab cuav xwb.

¹⁸Tej mlom ntawd tsi muaj qaabhau hab tsimnyog raug thuam; thaus tug TSWV lug txav txim rua puab, puab yuav puamtsuaj taag.

¹⁹Yakhauj tug Vaajtswv tsi zoo le tej mlom ntawd; nwg yog tug kws tsim ib puas tsaav yaam, hab nwg xaiv cov Yixalayees lug ua nwg tsaav tuabneeg. Nwg lub npe hu ua tug TSWV kws muaj fwjchim luj kawg nkaus.

²⁰Tug TSWV has tas, “Npanpiloos, koj yog kuv raab rauj kws yog kuv tej cuabyeej ua rog. Kuv siv koj tsoo ntau tsaav tuabneeg hab ntau lub tebchaws,

²¹tsoo cov tubrog caij neeg hab tej neeg, tsoo cov tsaav tsheb neeg hab tej tsheb neeg,

²²tua cov txivneej hab cov quaspuj, tua cov laug hab cov hluas, tua tej mivnyuas tub hab tej mivnyuas ntxhais,

²³tua cov tuabneeg yug yaaj hab puab tej yaaj, tua tej tub qoob tub loo hab puab tej neeg laij teb, tua tej tswv xeev hab tej numtswv huv tuabsi povtseg.”

²⁴Tug TSWV has tas, “Mej yuav pum kuv ua pauj rua Npanpiloos hab nwg cov pejxeem kws tau ua phem ua qas rua lub nroog Yeluxalees.

²⁵Npanpiloos, koj zoo ib yaam le lub hauv roob kws ua rua lub nplajteb puamtsuaj, tabsis kuv kws yog tug TSWV, kuv yog koj tug yeebncuab. Kuv yuav chua koj rua huv aav, hab ca koj dlaa qhov tshauv.

²⁶Tej pobzeb kws tawm ntawm koj lug, tsi muaj ib lub zoo coj moog ua tsev le, koj yuav ua suabpuam moog ibtxhis. Kuv yog tug TSWV kws has le ntawd.

²⁷“Ca le kwv chij txhij tubrog, hab tshuab raaj tshuab xyu kuas txhua tsaav tuabneeg npaaj moog ua rog tawmtsaam Npanpiloos! Has kuas lub tebchaws Alalaj, Minis hab Akenas cov tubrog coj ib cov neeg coob ib yaam le cov kooj txomfaav moog tua Npanpiloos hab tsaa ib tug ua tug thawjcoj moog tua rog.

²⁸Kuas txhua tsaav tuabneeg npaaj moog ua rog rua Npanpiloos. Ca le has kuas Medias cov vaajntxwv, puab cov thawjcoj, cov numtswv hab cov tubrog kws nyob huv tej tebchaws kws puab kaav tuaj.

²⁹Lub nplajteb qeeg ua zug koog, rua qhov tug TSWV ua rua Npanpiloos puamtsuaj ua suabpuam taag tsi muaj tuabneeg nyob lawv le nwg tau npaaj tseg lawm.

³⁰Npanpiloos tej tubrog tseg tsi sis tua lawm, puab nyob tuabywv huv tej yeej, rua qhov puab zug ntaug taag zoo le tej quaspuj xwb. Tej roojvaag nroog pob puag taag hab puab tej vaaj tse los kub nyab taag huv tuabsi lawm.

³¹Cov tuabneeg moog tshaab xu rua tug vaajntxwv kws kaav Npanpiloos ib tug taag ib tug tuaj has tas, nwg lub nroog tub puamtsuaj taag lawm!

³²Yeebncuab tub tuaj txeeb tau tug dlej kws ndlwg phua huv lub nroog hab tub hlawv tej chaw faajxwm kub nyab taag lawm. Cov tubrog Npanpiloos ntshai tshee nyo ua ib ce tuag taag.

³³Tsi ntev yeebncuab tub yuav tuaj muab puab hlais hab tsuj ib yaam le luas tsuj nplej huv lub tshaav ntaus nplej. Kuv yog tug TSWV kws yog cov Yixalayees tug Vaajtswv kws muaj Fwjchim Luj kawg nkaus has le ntawd.”

³⁴Tug vaajntxwv kws kaav Npanpiloos muab lub nroog Yeluxalees noj lawm. Nwg ua rua lub nroog nyob khoob lug ca ib yaam le lub hub; zoo ib yaam le tug zaaj nqog lub nroog Yeluxalees. Nwg coj txhua yaam kws nwg xaav tau moog taag, hab tseg tej kws nwg tsi xaav yuav xwb.

³⁵Cov tuabneeg kws nyob huv Xi-oos ca le has tas, “Ca Npanpiloos ris lub txim kws nwg ua nruj ua tsiv rua peb.” Cov tuabneeg kws nyob huv lub nroog Yeluxalees ca le has tas, “Ca Npanpiloos ris lub txim kws nwg ua rua peb raug kev txomnyem!”

³⁶Yog le ntawd, tug TSWV has rua cov tuabneeg kws nyob huv lub nroog Yeluxalees tas, “Kuv yuav paab txheem mej rooj plaub, hab kuv yuav ua pauj mej cov yeebncuab lawv le tej kws puab tau ua rua mej lawm. Kuv yuav ua kuas Npanpiloos tej qhovdlej hab tej dlej cag qhuav.

³⁷Kuas lub tebchaws puamtsuaj ua chaw rua tej tsaj qus lug nyob. Tej tuabneeg dlua kev yuav txobthuam hab ntshai, tsi muaj leejtwg moog nyob huv.

³⁸Cov Npanpiloos yuav nyooj ib yaam le tsuv ntxhuav hab yuav quaj ib yaam le tej mivnyuas tsuv ntxhuav.

³⁹Puas yog puab ua tuabneeg sab hlub? Kuv yuav npaaj ib rooj noj haus rua puab, kuas puab noj tsau haus qaug hab zoo sab, puab yuav moog pw hab tsi sawv le lawm.

⁴⁰Kuv yuav coj puab moog tua ib yaam le luas tua tej mivnyuas yaaj, tej tshis hab tej laug yaaj. Kuv yog tug TSWV kws has le ntawd.”

⁴¹Tug TSWV has txug Npanpiloos le nuav: “Lub nroog kws tuabneeg nplajteb qhuas luas tub txeeb tau lawm! Npanpiloos raug puamtsuaj ua rua tuabneeg nplajteb ntshai kawg le!

⁴²Dlej havtxwv ndlaas nphau nphwv hab nrov nroo ntwg tuaj nyaab Npanpiloos.

⁴³Tej nroog huv Npanpiloos yuav ua suabpuam tsi muaj dlej, tuabneeg yuav ntshai tsi moog qhov ntawd lossis tsi muaj tuabneeg moog nyob huv.

⁴⁴Kuv yuav rau txim rua Npeles kws yog Npanpiloos tug vaajtswv kuas nwg tsi xob moog nyag luas tug; tej tuabneeg nplajteb yuav tsi hawm nwg ntxiv lawm. “Npanpiloos tej ntsaa yeej tub pob puag taag lawm.

⁴⁵Cov Yixalayees, mej ca le tsiv tawm huv Npanpiloos moog! Ca le tsiv kuas mej dlim ntawm kuv txujkev chim.

⁴⁶Tsi xob ntshai lossis qaug zug rua tej xwm tsi zoo kws mej nov. Tej xwm tsi zoo ntawd ib xyoos luas has txawv lawm ib yaam, yog has txug tej xwm ua nruj ua tsiv huv lub tebchaws kws ib tug vaajntxwv sawv tawmtsaam ib tug.

⁴⁷Tub yuav txug lub sijhawm kws kuv rau txim rua Npanpiloos tej mlom. Thoob plawg nwg lub tebchaws yuav poob ntsejmuag, hab nwg tej pejxeem yuav raug luas tua tuag taag.

⁴⁸Thaus cov tuabneeg kws nyob saab qaumteb tuaj rhuav Npanpiloos puamtsuaj lawm, txhua tsaav yaam kws nyob huv lub nplajteb hab sau nruab ntug yuav qw zoo sab heev.

⁴⁹Vim Npanpiloos tau ua rua tej tuabneeg kws nyob thoob nplajteb raug kev pluj kev tuag, hab ua rua cov Yixalayees coob leej raug kev pluj kev tuag, nwgnuav Npanpiloos txhaj yuav poob rua luas teg. Kuv yog tug TSWV kws has le ntawd.”

⁵⁰Tug TSWV has rua nwg tsaav tuabneeg kws nyob huv Npanpiloos has tas, “Mej tub dlim kev tuag lawm! Nwgnuav mej ca le tawm moog! Tsi xob tog le! Txawm yog mej moog nyob dleb mej lub tebchaws los mej yuavtsum ncu ntsoov kuv kws yog mej tug TSWV, hab xaav ntsoov txug lub nroog Yeluxalees.

⁵¹Mej has tas, ‘Peb raug luas rhuav ntsejmuag ua rua peb txaajmuag kawg. Peb taag kev ca sab, rua qhov cov tuabneeg txawv tebchaws tuaj txeeb tau lub Tuamtsev kws yog qhov chaw dlawbhuv lawm.’

⁵²Yog le ntawd kuv qha rua mej has tas, tub yuav txug lub sijhawm kws kuv rau txim rua Npanpiloos tej mlom, hab cov tuabneeg kws raug mob thoob tebchaws yuav ntsaaj zum zawg.

⁵³Txawm yog Npanpiloos yuav nce moog txug sau nruab ntug hab ua chaw faajxwm ruaj khov rua sau los kuv yuav tso tuabneeg moog rhuav kuas puamtsuaj taag. Kuv Yog tug TSWV kws has le ntawd.”

⁵⁴Tug TSWV has tas, “Mej ca le noog tej suab quaj huv Npanpiloos, tej suab quaj suab nyav huv lub tebchaws kws raug puamtsuaj.

⁵⁵Kuv taabtom rhuav Npanpiloos kuas nwg lub suab ntsag. Tej tubrog tuaj nrov nroog ntwg ib yaam le dlej havtxwv ndlaas; hab qw ntshu nrooj tuaj tawmtsaam nwg.

⁵⁶Puab tuaj rhuav Npanpiloos kuas puamtsuaj; Npanpiloos tej tubrog tub raug luas nteg hab puab tej neevnti luv taag lawm. Kuv yog tug TSWV kws rau txim rua txujkev phem kev qas, hab kuv yuav rau txim rua Npanpiloos kuas tsimnyog nwg tej kev txhum.

⁵⁷Kuv yuav muab cawv rua nwg cov numtswv, tej tub txawg tub ntse, tej thawjcoj hab tej tubrog haus kuas qaug. Puab yuav moog pw hab tsi sawv le lawm. Kuv yog tug Vaajntxwv kws has le ntawd; kuv yog tug TSWV kws muaj Fwjchim Luj kawg nkaus!

⁵⁸Npanpiloos tug ntsaa yeej kws ruaj khov yuav pob puag taag rua huv aav, hab nwg tej roojvaag tsomfaaj raug hlawv kub nyab taag. Teg num kws txhua tsaav tuabneeg ua tsi muaj qaabhau. Puab tej zug ntaug taag. Kuv yog tug TSWV kws muaj Fwjchim Luj kawg nkaus has le ntawd.”

⁵⁹Yelemis saamfwm rua Xelayas kws yog Vaajntxwv Xedekiyas ib tug nom, Xelayas yog Nelayas tug tub hab yog Maxeyas tug xeebntxwv. Thaus kws Xedekiyas ua vaajntxwv kaav tebchaws Yudas tau plaub xyoos, Xelayas raug nteg nrug Vaajntxwv Xedekiyas moog rua tebchaws Npanpiloos lawm.

⁶⁰Kuv sau ib thooj ntawv has txug tej kev puamtsuaj kws yuav lug raug Npanpiloos, tej lug kws kuv sau nuav yog has txug tej kev puamtsuaj hab lwm yaam kws yuav lug raug Npanpiloos.

⁶¹Kuv has rua Xelayas has tas, “Thaus koj moog txug tim Npanpiloos lawm, koj ncu ntsoov nyeem kuv cov lug kws sau rua huv thooj ntawv nuav nrov nrov rua suavdlawg noog.

⁶²Tom qaab ntawd, mej thov Vaajtswv has tas, ‘Tug TSWV koj has tas, koj yuav rhuav lub nroog nuav kuas tsi muaj ib yaam dlaabtsi nyob huv, tsi has tuabneeg lossis tej tsaj txhu hab lub nroog nuav yuav ua suabpuam moog ibtxhis.’

⁶³Xelayas, thaus koj nyeem thooj ntawv nuav rua puab noog taag lawm, koj muab paav rua ib lub pobzeb hab pov rua huv tug Dlej Efalates,

⁶⁴hab has tas, ‘Yuav muaj tej xwm le nuav lug raug Npanpiloos, Npanpiloos yuav tog rua huv qaab thu ib yaam le nuav hab tsi tawm lug le lawm, rua qhov tug TSWV yuav tso kev puamtsuaj lug raug Npanpiloos.’ ” Yelemis cov lug xaus le nuav.