Read Hmong Njua Yelemis 52 Bible Online

Yelemis 52 - Hmong Njua bible

Yelemis 52

¹Thaus Xedekiyas ua vaajntxwv kaav tebchaws Yudas nwg noobnyoog muaj neeg nkaum ib xyoos. Nwg nyob huv lub nroog Yeluxalees kaav tau kaum ib xyoos. Nwg nam hu ua Hamutas, nwg nam yog tug Yelemis kws nyob huv lub nroog Linas tug ntxhais.

²Vaajntxwv Xedekiyas ua txhum rua tug TSWV ib yaam le Vaajntxwv Yehauyakees ua.

³Tug TSWV chim rua cov tuabneeg huv lub nroog Yeluxalees hab huv tebchaws Yudas, nwg txhaj muab puab ntab tawm moog lawm. Xedekiyas ntxeev sab rua Vaajntxwv Nenpukajnexales kws kaav tebchaws Npanpiloos,

⁴yog le ntawd thaus Xedekiyas ua vaajntxwv tau cuaj xyoos, lub kaum hli nub xab kaug, Nenpukajnexales txhaj coj nwg cov tubrog tuaj tua lub nroog Yeluxalees. Puab tuaj tsuam yeej nyob saab nrau ntug nroog, hab puab meem ib tug ntswg puagncig lub nroog,

⁵hab puab vij lub nroog Yeluxalees moog txug thaus Xedekiyas kaav tebchaws tau kaum ib xyoos.

⁶Xyoo ntawd, lub plaub hlis nub xab cuag, thaus ntawd suavdlawg tshaib nqhes heev, tsi muaj ib yaam dlaabtsi noj le lawm,

⁷cov yeebncuab tsoo tug ntsaa yeej ib qho pob. Txawm yog cov tubrog Npanpiloos tub vij lub nroog taag lawm los thaus ib taag mo Vaajntxwv Xedekiyas hab nwg cov tubrog tseem tsiv tawm moog hlaa vaajntxwv lub vaaj moog rua ntawm lub roojvaag kws nyob kis nruab nraab ntawm ob txheej ntsaa yeej moog rua tom lub Haav Yauladees lawm.

⁸Tabsis cov tubrog Npanpiloos caum puab qaab moog nteg tau Vaajntxwv Xedekiyas ntawm lub taj nraag kws nyob ze lub nroog Yelikaus. Nwg cov tubrog tsiv taag tso nwg tseg.

⁹Thaus puab nteg tau Xedekiyas lawm, puab coj nwg lug cob rua Vaajntxwv Nenpukajnexales ntawm lub nroog Lilas huv cheebtsaam Hamas, hab Nenpukajnexales txav txim rua Xedekiyas qhov ntawd

¹⁰Nenpukajnexales muab Xedekiyas cov tub tua taabmeeg Xedekiyas huv lub nroog Lilas, hab Nenpukajnexales kuas luas muab cov Yudas tej numtswv tua huv tuabsi.

¹¹Tom qaab ntawd, Nenpukajnexales muab Xedekiyas ob lub qhovmuag kaus povtseg hab muab saw hlau khi caab moog rua tim tebchaws Npanpiloos lawm. Xedekiyas nyob huv tsev lojcuj moog txug nub kws nwg tuag le.

¹²Thaus Nenpukajnexales ua vaajntxwv kaav tebchaws Npanpiloos tau kaum cuaj xyoos, lub tsib hlis nub xab kaug, Nenpuxaladaas kws yog vaajntxwv tug tuavxaam hab yog tug tubrog txawm tuaj rua huv lub nroog Yeluxalees.

¹³Nwg hlawv lub Tuamtsev, vaajntxwv lub loog, cov numtswv tej tsev ua num hab taagnrho tej vaaj tse huv Yeluxalees kub nyab taag;

¹⁴hab nwg cov tubrog muab tej ntsaa yeej tsoo pob puag taag huv tuabsi.

¹⁵Nenpuxaladaas nteg cov tuabneeg kws seem nyob huv lub nroog, tsi has cov kws tsiv lug thawj, cov kws txawj txaug yaam nuav yaam u kws nyob huv lub nroog moog rua tebchaws Npanpiloos huv tuabsi lawm.

¹⁶Tabsis nwg tseg cov tuabneeg txomnyem ibtxha kws tsi muaj laj tsi muaj teb nyob rua huv tebchaws Yudas, hab nwg kuas puab tu luas tej teb hab tej vaaj txiv maab.

¹⁷Cov Npanpiloos muab tej ncej tooj, tej tsheb txawb, lub rhawv tooj kws txawb ntawm lub Tuamtsev tsoo tawg taag, hab puab nqaa tej tooj ntawd moog rua tim tebchaws Npanpiloos lawm.

¹⁸Puab tseem nqaa tej toomtxhob, tej laug tooj kws luas siv yawm tshauv sau lub thaaj, tej txab txav teebxeeb, tej taig phab rau tej ntshaav tsaj kws tua theej txhoj, tej laujkaub kws hlawv moov tshuaj tsw qaab hab tej twj taig tooj kws siv ua kevcai huv lub Tuamtsev moog huv tuabsi lawm.

¹⁹Puab nqaa txhua yaam kws muab nyaj muab kub nchuav ua huv tuabsi moog lawm: tsi has tej laujkaub miv, tej yag rau ncaig tawg, tej taig phab rau tej ntshaav tsaj kws tua theej txhoj, tej laug tooj yawm tshauv, tej ncej txawb teeb, tej laujkaub rau moov tshuaj tsw qaab hab tej taig kws rau cawv txiv maab ua khoom fij.

²⁰Tej kws Vaajntxwv Xalumoos tsim tseg rua huv lub Tuamtsev: tsi has ob tug ncej tooj, cov tsheb txawb, lub rhawv tooj hab kaum ob tug nyuj kws txawb lub rhawv tooj rua sau, nyaav heev muab lug luj tsi tau rua sau teev.

²¹Ob tug ncej tooj ntawd sis luag zog: sab kaum yim tshim, qhov luj puagncig kaum ob tshim, khoob hab tuab plaub nti. Luas muab tooj ua ob lub hau ua paaj txawb rua sau ob tug hauv ncej, ib lub hau twg sab tsib tshim, luas muab xuv tooj qhab ua ob txuj saw thi puagncig ob lub hau, hab muab tooj nchuav ua ob tshaam txiv ntsab pobkws dlai rua sau.

²³Ob tshaam txiv ntsab pobkws ntawd, ib tshaam twg muaj ib puas lub, tabsis yog tuaj huv nuav saib rua sau, tsuas pum cuaj caum rau lub xwb.

²⁴Dlua le ntawd, Nenpuxaladaas kws yog tug thawj tubrog tseem nteg Xelayas kws yog tug Povthawj Hlub, hab tug povthawj Xefaniyas kws yog tug paab, hab nteg peb tug tuabneeg tseemceeb kws tu lub Tuamtsev coj moog lawm.

²⁵Nenpuxaladaas nteg tug thawj tubrog kws saib taagnrho cov tubrog, vaajntxwv xyaa tug tuavxaam, tug thawj tubrog kws yog tug paab hab tuav cov tubrog tej ntaub ntawv, hab rau caum leej tuabneeg tseemceeb kws nyob huv lub nroog moog lawm.

²⁶Nenpuxaladaas coj cov tuabneeg ntawd moog cob rua Vaajntxwv Nenpukajnexales ntawm lub nroog Lilas

²⁷huv cheebtsaam Hamas. Vaajntxwv Nenpukajnexales kuas luas muab puab ntaus hab tua rua huv lub nroog ntawd. Yog le ntawd luas txhaj coj cov Yudas tawm huv lub tebchaws moog lawm.

²⁸Ntawm nuav yog has txug cov Yudas kws Vaajntxwv Nenpukajnexales nteg coj moog: Thaus Nenpukajnexales ua vaajntxwv tau xyaa xyoo, nwg nteg cov Yudas peb txheeb neeg nkaum peb leeg;

²⁹hab thaus nwg ua vaajntxwv tau kaum yim xyoo, nwg nteg cov Yudas yim pua peb caug ob leeg huv lub nroog Yeluxalees coj moog,

³⁰hab thaus nwg ua vaajntxwv tau neeg nkaum peb xyoos, Nenpuxaladaas rov tuaj nteg tau cov Yudas xyaa pua plaub caug tsib leeg. Xaam taagnrho cov tuabneeg kws raug luas nteg coj moog, muaj plaub txheeb rau pua leej.

³¹Xyoo kws Evimeludas pib ua vaajntxwv kaav tebchaws Npanpiloos, nwg hlub Yehauyakhees kws ua vaajntxwv kaav tebchaws Yudas, nwg txhaj tso Yehauyakhees tawm huv tsev lojcuj. Suav txij nub kws luas nteg Yehauyakhees huv tebchaws Yudas moog txug nub kws luas tso nwg tawm huv tsev lojcuj lug yog tau peb caug xyaa xyoo rua lub kaum ob hlis, nub neeg nkaum tsib.

³²Vaajntxwv Evimeludas, ua zoo rua Yehauyakhees hab muab nwg saib hlub dlua lwm tug vaajntxwv kws luas nteg moog rua huv tebchaws Npanpiloos.

³³Yog le ntawd, luas txhaj muab dlua ib cev rig tsho rua Yehauyakhees naav, hloov cev kws nwg naav nyob huv tsev lojcuj, hab nwg naj nub tau nrug vaajntxwv noj mov sau vaajntxwv lub rooj moog taag nwg simneej.

³⁴Thaus kws Yehauyakhees tseem ua neej nyob, Vaajntxwv Evimeludas kws kaav tebchaws Npanpiloos naj nub muab nyaj rua Yehauyakhees yuav noj yuav naav kuas txaus moog txug nub kws taag Yehauyakhees simneej.