Read Hmong Njua Yelemis 6 Bible Online

Yelemis 6 - Hmong Njua bible

Yelemis 6

¹Cov Npeenyamees, mej ca le tsiv kuas dlim! Ca le tawm huv lub nroog Yeluxalees moog! Mej ca le tshuab raaj tshuab xyu kuas nrov ntshu nrooj huv Tekau-as hab rauv tawg huv Npethes Hakhelees kuas nchu paa! Kev txomnyem hab kev puamtsuaj yuav tuaj saab qaumteb tuaj raug mej.

²Lub nroog Xi-oos zoo nkauj kawg le, tabsis yuav raug puamtsuaj taag;

³tej vaajntxwv hab puab tej tubrog yuav tuaj tsuam yeej rua qhov ntawd. Puab yuav tsaa puab tej tsevntaub lawv le puab sab nyam puagncig lub nroog.

⁴Puab yuav has tas, “Ca le npaaj kuas txhij, peb yuav moog tua lub nroog Yeluxalees! Peb yuav moog tua thaus taav su!” Tabsis tom qaab ntawd, puab has tas, “Lig heev lawm! Nub tub yuav poob qho hab ntxoov ntxoo lug luas lawm yuav tsaus ntuj.

⁵Peb tog kuas tsaus ntuj peb maam moog tua; peb yuav rhuav lub nroog tej chaw faajxwm kuas puamtsuaj taag.”

⁶Tug TSWV kws muaj Fwjchim Luj kawg nkaus has rua cov vaajntxwv ntawd, kuas moog txav ntoo lug meem ua chaw nce moog vij lub nroog Yeluxalees. Tug TSWV has tas, “Kuv yuav rau txim rua lub nroog Yeluxalees, vim nwg tsimtxom lwm tug.

⁷Dlej txhawv huv lub qhov tshij tuaj le caag, tej kev phem kev qas txhawv huv Yeluxalees tuaj le ntawd. Kuv nov muaj kev nruj kev tsiv hab kev puamtsuaj; lossis kev mob kev nkeeg hab nqaj ndluag ntshaav nrug nyob huv lub nroog ntawd xwb.

⁸Cov tuabneeg huv Yeluxalees, ca tej kev txomnyem nuav qha mej lossis ca kuv tso mej tseg; kuv yuav muab mej lub nroog hloov ua suabpuam kuas tsi muaj tuabneeg moog nyob.”

⁹Tug TSWV kws muaj Fwjchim Luj kawg nkaus has rua kuv tas, “Cov Yixalayees yuav raug luas lwg kuas dlu lug, ib yaam le tej ceg txiv maab kws luas dle txiv taag lawm. Yog le ntawd, mej yuavtsum paab kuas txhua tug dlim thaus kws tseem muaj sijhawm.”

¹⁰Kuv txhaj teb has tas, “Yog kuv moog has hab ntuag puab, leejtwg yuav noog kuv has? Puab yog tuabneeg tawv ncauj hab tsi noog koj tej lug, puab luag tej kws koj kuas kuv qha rua puab.

¹¹Koj txujkev chim tawmtsaam puab kub lug huv kuv tuaj, ua rua kuv nyaj tsi taug lawm.” Ces tug TSWV has rua kuv tas, “Muab kuv txujkev chim laub rua sau tej mivnyuas kws nyob ntawm tej kev hab rua tej tub hluas kws tuaj sis sau ua ke. Tej quaspuj hab txivneej yuav raug luas nteg moog, hab tej tuabneeg laug los luas yuav tsi tseg le.

¹²Puab tej vaaj tse, tej laj teb hab tej quaspuj luas yuav txeeb coj moog rua lwm tug. Kuv yuav rau txim rua cov tuabneeg huv lub tebchaws nuav.

¹³Cov tuabneeg ntawd, tsi has cov numtswv lossis tej pejxeem txhua tug ua tsi ncaaj kuas puab npluanuj; txawm yog cov cev Vaajtswv lug hab cov povthawj los ua tsi ncaaj rua tej pejxeem ib yaam nkaus.

¹⁴Puab yuav has tas kuv tsaav tuabneeg tej qhov txhaab tsuas yog kus mivntsiv xwb. Puab has tas, ‘Zoo lawm lauj!’ Tabsis qhov tseeb tag yeej tsi tau zoo le.

¹⁵Qhov kws puab ua kev phem kev qas le ntawd, puab puas paub txaajmuag? Puab yeej tsi paub txaajmuag le. Puab tub tsi paub has tas, ua le ntawd puab yuav poob ntsejmuag; yog le ntawd, puab txhaj poob ntsejmuag le lwm tug kws tub poob lawm. Thaus kuv rau txim rua puab, yog nub kawg rua puab lawm! Kuv yog tug TSWV kws has le ntawd.”

¹⁶Tug TSWV has rua nwg tsaav tuabneeg has tas, “Mej ca le moog sawv tom tej kev tshuam saib hab nug luas has tas, tej qub kev thaus u nyob qhov twg hab txujkev kws zoo dlua ndlais yog txuj twg? Mej ca le taug txuj ntawd, mej txhaj yuav tau nyob kaaj sab lug.” Tabsis puab teb has tas, “Peb yuav tsi ua le ntawd.”

¹⁷Tug TSWV tsaa ib cov tuabneeg moog zuv tog noog luas tshuab raaj tshuab xyu ceebtoom rua suavdlawg. Tabsis puab teb has tas, “Peb tsi noog.”

¹⁸Yog le ntawd, tug TSWV txhaj has tas, “Txhua tsaav tuabneeg, mej ca le tig qhovntsej noog, mej txhaj paub has tas, yuav muaj xwm dlaabtsi tshwmsim lug raug kuv tsaav tuabneeg.

¹⁹Lub nplajteb, koj ca le noog kuv has; kuv yuav tso kev puamtsuaj lug raug tsaav tuabneeg nuav, rua qhov puab tsi noog kuv lug hab tsi ua lawv le kuv tej lug qha.

²⁰Tej moov tshuaj tsw qaab kws puab coj huv tebchaws Senpas lossis tej txumlom kws puab coj huv lub tebchaws dleb heev tuaj, yuav muaj nqes dlaabtsi rua kuv? Kuv yuav tsi txais puab tej khoom fij hab tej tsaj kws puab coj tuaj hlawv fij.

²¹Kuv yuav ua kuas cov tuabneeg ntawd dlawm qaug. Puab tej txiv tub, tej phoojywg hab tej tuabneeg zej zog yuav tuag taag huv tuabsi.”

²²Tug TSWV has tas, “Yuav muaj tuabneeg tuaj huv lub tebchaws peg saab qaumteb tuaj; puab yog tsaav tuabneeg muaj fwjchim kws nyob dleb heev taabtom npaaj tuaj ua rog.

²³Puab tuav rawv ntaaj hab neevnti ntawm teg; puab yog cov tuabneeg kws ua nruj ua tsiv hab tsi taabncuab leejtwg le. Puab caij neeg dlha nrov nroo ntwg tuaj cuag dlej havtxwv ndlaas. Puab npaaj nrooj yuav tua lub nroog Yeluxalees.”

²⁴Cov tuabneeg kws nyob huv lub nroog Yeluxalees has tas, “Thaus peb nov tej xwm nuav, peb tej teg tsaug leeg tsaa tsi taug. Peb ntshai heev ib ce mob lwj ntsuav ib yaam le tug quaspuj kws mob plaab yug mivnyuas.

²⁵Peb tsi muaj peevxwm tawm moog rua tom tej ntug zog, lossis taug kev moog rua qhov twg le, rua qhov peb cov yeebncuab yeej npaaj rawv tog tua peb xwb, ua rua peb ntshai kawg le.”

²⁶Tug TSWV has rua nwg tsaav tuabneeg tas, “Mej ca le npua ntaub tsaaj hab dlaa qhov tshauv. Quaj kua muag ndlwg lawg ib yaam le mej quaj mej tug tub kws mej hlub tuag, rua qhov tuab ntsais muag xwb, yeebncuab tub tuaj tua mej lawm.

²⁷Yelemis, koj ca le sim kuv tsaav tuabneeg ib yaam le koj sim tooj sim hlau, saib puab yog tuabneeg zoo le caag.

²⁸Puab yog tuabneeg ntxeev sab, tawv ncauj hab puab tawv npaum nkaus le tej tooj hab tej hlau. Puab yog tuabneeg tsi ncaaj hab nyam nkawg xaiv rua nuav rua u.

²⁹Lub yeejvub yeej kub kawg lawm, tabsis tej quav tooj quav hlau tseem tsi yaaj hab ndlwg tawm le. Txawm yog kuv muab kuv tsaav tuabneeg nchuav dlua los yuav tsi muaj nqes dlaabtsi, rua qhov tseem muaj cov tuabneeg ua phem nrug puab nyob.

³⁰Suavdlawg yuav hu puab has tas, yog tej quav tooj quav hlau kws tsi muaj nqes, rua qhov kuv kws yog tug TSWV tso puab tseg lawm.”