Read Hmong Njua Yelemis 7 Bible Online

Yelemis 7 - Hmong Njua bible

Yelemis 7

¹Tug TSWV kuas kuv moog rua ntawm lub roojvaag kws moog rua huv lub Tuamtsev, qhov chaw kws cov Yudas tuaj pehawm tug TSWV. Tug TSWV kuas kuv sawv ntawm roojvaag qha tug TSWV kws yog cov Yixalayees tug Vaajtswv kws muaj Fwjchim Luj kawg nkaus tej lug rua puab has tas, “Mej ca le tso plhuav mej lub neej qub hab mej tej num tsi zoo kws mej ua tseg, hab tig lug ua lub neej tshab, kuv txhaj yuav pub mej nyob ntawm nuav.

⁴Mej tsi xob ntseeg luas tej lug kws dlaag has tas, ‘Peb dlim lawm! Ntawm nuav yog tug TSWV lub Tuamtsev, ntawm nuav yog tug TSWV lub Tuamtsev, ntawm nuav yog tug TSWV lub Tuamtsev!’

⁵“Mej ca le tso plhuav mej lub neej qub hab tej num tsi zoo kws mej ua tseg, ib leeg ua ncaaj rua ib leeg.

⁶Tsi xob quab yuam lwm tsaav tuabneeg, cov mivnyuas ntsuag hab tej puj ntsuag. Tsi xob tua tej tuabneeg tsi muaj txim kws nyob huv mej lub tebchaws. Tsi xob pe luas tej vaajtswv, rua qhov tej ntawd yuav ua rua mej raug kev puamtsuaj.

⁷Yog mej ua lub neej tshab, kuv txhaj yuav pub mej nyob huv lub tebchaws kws kuv muab rua mej cov yawmkoob ua puab tug moog ibtxhis lawm.

⁸“Mej sim saib, mej tsuas ca sab rua tej lug dlaag ntxag xwb.

⁹Mej ua tubsaab, tua tuabneeg, ntxag luas quaspuj luas quasyawg, dlaag twv ntuj twv teb, tua tsaj fij rua Npa-aas hab pe luas tej vaajtswv kws mej yeej tsi tau pe dlua le.

¹⁰Mej ua tej kws kuv ntxub los mej tseem muaj plhus tuaj sawv taabmeeg kuv huv lub Tuamtsev hab khaav has tas, ‘Peb tub dlim lawm!’

¹¹Mej xaav has tas, kuv lub Tuamtsev yog qhov chaw rua tej tubsaab tuaj nkaum nua los? Kuv tub pum tej kws mej ua taag lawm.

¹²Mej ca le moog rua peg lub nroog Silaus hab saib lub chaw kws yaav taag lug kuv xaiv tseg ua thawj lub chaw rua suavdlawg pehawm kuv, saib zoo le caag lawm. Kuv ua rua lub nroog ntawd puamtsuaj taag, tub yog vim kuv tsaav tuabneeg Yixalayees ua kev phem kev qas.

¹³Mej tau ua tej kev txhum kws kuv has ntawd lawm. Txawm yog kuv ntuag mej ntau zag lawm los mej tsi noog kuv has le, hab thaus kuv hu mej los mej tsi teb,

¹⁴yog le ntawd, kuv yuav rhuav lub Tuamtsev kws mej ca sab rua ib yaam le kuv rhuav lub nroog Silaus lawm. Thaaj chaw kws kuv muab rua mej cov yawmkoob hab mej nuav, kuv yuav muab rhuav ib yaam le kuv rhuav lub nroog Silaus hab.

¹⁵Kuv yuav ntab mej tsiv ntawm kuv moog, ib yaam le kuv ntab mej cov kwvtij Yixalayees tawm moog lawm. Kuv yog tug TSWV kws has le ntawd.”

¹⁶Tug TSWV has tas, “Yelemis, koj tsi xob thov kuv paab cov tuabneeg nuav. Koj tsi xob quaj hab thov kuv cawm puab; tsi xob thov kuv zaam txim rua puab, rua qhov kuv yuav tsi noog koj tej lug thov.

¹⁷Koj tsi pum tej kws puab taabtom ua nyob huv cov Yudas tej nroog, hab tom tej kev kws nyob huv lub nroog Yeluxalees los?

¹⁸Tej mivnyuas moog khaws tawg, cov txivneej rauv tawg, cov quaspuj ntse moov nplej puab ncuav cub coj moog fij rua tug mlom quaspuj kws hu ua ‘Nam Vaajntxwv Ntuj; puab muab cawv laub fij rua luas lwm tug vaajtswv ua rua kuv chim.

¹⁹Tabsis kuv puas yog tug kws chim? Puab txhaj yog cov kws chim hab poob ntsejmuag.’

²⁰Yog le ntawd, kuv yog tug TSWV kws kaav ib puas tsaav yaam, yuav laub kuv txujkev chim lug rua lub Tuamtsev nuav. Kuv yuav laub rua sau tej tuabneeg, tej tsaj txhu, tej ntoo hab tej qoobloo. Kuv txujkev chim zoo ib yaam le lub cubtawg kws tsi muaj leejtwg yuav tua tau.

²¹“Kuv tsaav tuabneeg, tej tsaj kws mej coj tuaj tua hlawv fij rua kuv, muaj ibtxha mej muab hlawv taagnrho fij rua sau lub thaaj hab muaj ibtxha mej noj tau. Txawm yog txuj kevcai txwv tsi pub noj los kuv kws yog tug TSWV has tas, mej noj tau!”

²²Thaus kuv coj mej cov yawmkoob tsiv nraag tebchaws Iziv lug, kuv tsi tau has txug tej tsaj kws puab coj tuaj tua hlawv fij lossis lwm yaam khoom fij le.

²³Tabsis kuv has kuas puab noog kuv lug, kuv txhaj yog puab tug Vaajtswv hab puab txhaj yog kuv tsaav tuabneeg. Kuv has kuas puab coj lawv le kuv tej lug, puab lub neej txhaj yuav vaammeej.

²⁴Tabsis puab tsi noog kuv has lossis tsi quavntsej kuv tej lug le. Puab tawv ncauj hab ua lawv le puab lub sab phem qha puab. Vim le ntawd, puab txhaj ua phem zuj zug hab ua tsi tau zoo le lawm.

²⁵Txij nub kws mej cov yawmkoob tsiv nraag tebchaws Iziv lug txug nwgnuav, kuv khaiv kuv cov tubkhai kws yog cov cev kuv lug tuaj cevlug rua mej tsi tu ncua le.

²⁶Tabsis mej tsi quavntsej lossis tsi noog puab tej lug qha. Mej seem hajyam tawv ncauj hab ntxeev sab ua phem tshaaj mej cov yawmkoob.

²⁷“Yog le ntawd Yelemis, koj yuav pav tej lug nuav rua kuv tsaav tuabneeg, tabsis puab yuav tsi noog koj has; koj hu puab tabsis puab yuav tsi teb.

²⁸Koj yuav has rua puab tas, puab yog tsaav tuabneeg kws tsi noog tug TSWV kws yog puab tug Vaajtswv lug, txawm yog kuv rau txim rua puab los puab tsi zeem le. Puab tsi ca sab rua kuv, tsi muaj leejtwg has txug kuv le lawm.”

²⁹“Cov tuabneeg kws nyob huv lub nroog Yeluxalees, mej ca le quaj ntsuag; mej ca le txav mej tej plaubhau hab coj moog povtseg, ca le moog hu zaaj nkauj quaj ntsuag sau tej ncov roob, rua qhov kuv kws yog tug TSWV chim rua mej, kuv txhaj tso kuv tsaav tuabneeg tseg lawm.

³⁰“Cov Yudas ua phem ua qas kawg le. Puab muab puab tej mlom kws kuv ntxub coj tuaj tso rua huv kuv lub Tuamtsev, ua rua lub Tuamtsev tsi huv lawm.

³¹Puab tseem teeb tau ib lub thaaj hu ua Taufes rua huv lub Haav Hinoos, ua chaw rua puab coj puab tej tub tej ntxhais moog tua hlawv fij. Tabsis kuv tsi tau kuas puab ua le ntawd, kuv tsi tau xaav txug tej ntawd le.

³²Yog le ntawd, muaj ib nub suavdlawg yuav tsi hu has tas Taufes lossis lub Haav Hinoos lawm, tabsis yuav hu ua lub Haav Tua Tuabneeg. Luas yuav coj tej tuabneeg tuag tuaj log rua ntawd, rua qhov tsi muaj chaw log tuag lawm.

³³Tej noog hab tej tsaj nruab nraag yuav lug noj tej cev tuag ntawd, hab tsi muaj leejtwg yuav lawv tej tsaj ntawd tsiv.

³⁴Lub tebchaws ntawd yuav ua suabpuam. Kuv yuav ua kuas tej suab raaj suab qeej kws nrov lomzem hab kev noj tshoob haus kug huv cov Yudas tej nroog hab huv lub nroog Yeluxalees tej kev ntsag moog.