Read Hmong Njua Yelemis 8 Bible Online

Yelemis 8 - Hmong Njua bible

Yelemis 8

¹“Lub sijhawm ntawd luas yuav tuaj khawb cov Yudas tej vaajntxwv, tej numtswv, cov povthawj, cov cev kuv lug hab cov pejxeem kws nyob huv lub nroog Yeluxalees tej pobtxhaa tawm huv puab tej qhov ntxaa moog.

²Tsimnyog sau tej pobtxhaa ntawd coj moog log, tabsis luas muab puab tej pobtxhaa tso pawg lug rua sau npoo aav ib yaam le tej quav nyuj. Luas yuav muab tej pobtxhaa ntawd tso rua lub nub, lub hli hab tej nubqub zab, yog lub nub lub hli hab tej nubqub kws puab teev, puab pe, puab moog tuavxaam hab puab nyam.

³Cov tuabneeg kws seem ntawm tsaav tuabneeg kws ua phem ua qas nuav, puab nyob ntawm tej chaw kws kuv ntab puab moog nyob, puab yuav ntshaw tuag tshaaj ntshaw ua neej nyob. Kuv yog tug TSWV kws muaj Fwjchim Luj kawg nkaus has le ntawd.”

⁴Tug TSWV kuas kuv has rua nwg tsaav tuabneeg has tas, “Tug tuabneeg kws qaug lawm txawm yuav tsi sawv le los? Tug tuabneeg kws yuam kev lawm txawm yuav tsi thim rov lug le los?

⁵Kuv tsaav tuabneeg, vim le caag mej tsiv ntawm kuv moog, mej txawm tsi tig rov lug cuag kuv le lawm? Mej nyam mej tej mlom heev, mej txhaj tsi rov lug cuag kuv.

⁶Kuv ua tuab zoo noog, tabsis mej tsi has tej lug tseeb le. Mej cov tsi muaj ib tug kws txawj tu sab rua nwg tej kev txhum; mej cov tsi muaj ib tug nug has tas, ‘Kuv ua txhum dlaabtsi?’ Mej txhua tug nyag ua lawv le nyag lub sab nyam ib yaam le tug neeg kws dlha too hauv quas li moog rua huv tshaav rog.

⁷Txawm yog tej noog paag hawv los tub paub lub caij kws yaa rov lug rua ntawm nwg lub chaw; tej nquab, tej luv hab tej noog dlej los tub paub lub caij tsiv. Tabsis kuv tsaav tuabneeg, mej tsi paub txuj kevcai kws kuv muab rua mej coj le?

⁸Mej yuav ua le caag has tau tas, mej yog tuabneeg txawj ntse hab mej paub kuv tej kevcai zoo? Mej saib, cov sau kevcai tub muab tej kevcai hloov lawm!

⁹Mej tej tuabneeg txawj ntse yuav raug kev txaajmuag, puab yuav ntshai hab raug nteg moog; puab tub tsi leeg paub kuv tej lug, yuav ua le caag has tas puab muaj tswvyim?

¹⁰Yog le ntawd, kuv yuav muab puab tej teb rua lwm tug, hab yuav muab puab tej quaspuj rua lwm tug txivneej yuav. Cov tuabneeg ntawd, tsi has tej numtswv lossis tej pejxeem, txhua tug puavleej ua tsi ncaaj kuas puab npluanuj. Txawm yog cov cev kuv lug hab cov povthawj los ua tsi ncaaj rua cov pejxeem ib yaam nkaus.

¹¹Puab suav has tas, kuv tsaav tuabneeg tej qhov txhaab tsuas yog kus mivntsiv xwb. Puab txhaj has tas, ‘Zoo lawm lauj!’ Tabsis qhov tseeb tag, yeej tsi tau zoo le.

¹²Kuv tsaav tuabneeg, mej tsi txaajmuag rua tej kev phem kev qas kws mej ua le los? Mej tsi paub txaajmuag le; mej tub tsi paub has tas, ua le ntawd mej yuav poob ntsejmuag. Yog le ntawd, mej txhaj poob ntsejmuag le lwm tug kws tub poob ntsejmuag lawm; thaus kuv rau txim rua mej, yog nub kawg rua mej lawm. Kuv yog tug TSWV kws has le ntawd.

¹³“Kuv xaav sau kuv tsaav tuabneeg ib yaam le tug kws nwg sau nwg tej qoob; tabsis puab zoo ib yaam le tsob txiv maab hab tsob txiv ncuav pas kws tsi txi txiv; txawm yog tej nplooj tub qhuav hab zeeg taag lawm los kuv yuav ca lwm tsaav tuabneeg tuaj txeeb lub tebchaws nuav.”

¹⁴Tug TSWV tsaav tuabneeg sis nug has tas, “Peb tseem yuav nyob le nuav tog ua dlaabtsi? Peb ca le tsiv moog rua huv tej nroog kws muaj ntsaa yeej hab tuag rua ntawd. Tug TSWV kws yog peb tug Vaajtswv yeej pum zoo ca peb tuag. Tug TSWV muab tshuaj muaj taug rua peb haus, vim peb ua txhum rua nwg lawm.

¹⁵Peb nrhav kev thaajyeeb, tabsis tsi tau ib qhov zoo le; peb nrhav kev khu mob, tabsis tau kev txhawj kev ntshai xwb.

¹⁶Peb cov yeebncuab tub tuaj nyob txhij huv lub nroog Daas lawm; hab peb nov puab tej neeg tshuab zum zawg. Thaus puab cov neeg hee ua rua peb lub tebchaws tseeg nkawg. Peb cov yeebncuab tuaj rhuav peb lub tebchaws hab txhua yaam kws nyob huv, peb lub nroog hab cov tuabneeg kws nyob huv kuas puamtsuaj huv tuabsi.”

¹⁷Tug TSWV has tas, “Mej tsaa qhovmuag saib, kuv yuav tso ib cov naab muaj taug lug rua huv mej; cov naab ntawd yuav tum mej, mej yuav ntxag tsi tau le.”

¹⁸Kuv txujkev quaj ntsuag kh u tsi tau le; mob kuv lub sab kawg.

¹⁹Mej noog saib! Kuv nov kuv tsaav tuabneeg lub suab quaj thoob plawg lub tebchaws. “Tug TSWV tsi nyob sau roob Xi-oos lawm los? Tug vaajntxwv kws kaav Xi-oos tsi nyob lawm los?” Tug TSWV kws yog puab tug Vaajntxwv teb has tas, “Vim le caag mej pe mej tej mlom hab nyo taubhau hawm lwm tsaav tuabneeg tej vaajtswv kws tsi muaj qaabhau ua rua kuv chim?”

²⁰Tej tuabneeg quaj has tas, “Lub caij ntuj kub tub xaus hab lub caij sau qoobloo los tub dlhau lawm, tabsis peb tseem tsi tau dlim.”

²¹Kuv lub sab quaj ntsuag, vim kuv cov tuabneeg raug puamtsuaj lawm; kuv quaj tu sab nrho ua rua kuv ib ce txhaav taag.

²²Txawm tsi muaj tshuaj nyob huv cheebtsaam Nkile-as le los? Txawm tsi muaj kws khu mob nyob qhov ntawd le los? Vim le caag, tsi muaj leejtwg khu kuv tsaav tuabneeg kuas zoo mob le?