Read Hmong Njua Yelemis 9 Bible Online

Yelemis 9 - Hmong Njua bible

Yelemis 9

¹Kuv xaav kuas kuv lub taubhau yog lub qhovdlej txhawv, hab ca kuv ob lub qhovmuag ua cav dlej rua kua muag ndlwg; kuv txhaj tau quaj taag nub taag mo rua kuv tsaav tuabneeg kws raug luas tua tuag.

²Kuv xaav kuas muaj ib lub chaw rua kuv nyob tom taj suabpuam; kuas kuv nyob nrug dleb kuv tsaav tuabneeg. Puab txhua tug yog tuabneeg tsi ncaaj hab yog tuabneeg ntxeev sab.

³Puab nyam has lug dlaag; puab tsi has lug tseeb, tabsis puab has lug dlaag thoob tebchaws. Tug TSWV has tas, “Kuv tsaav tuabneeg ua kev phem kev qas ib yaam taag ib yaam tuaj; hab puab tsi leeg paub has tas kuv yog puab tug Vaajtswv.”

⁴Txhua tug yuavtsum ceevfaaj nwg tug phoojywg; hab tsi muaj leejtwg ntseeg nwg tug kwvtij sab; rua qhov tej kwvtij puavleej has lug dlaag ib yaam le Yakhauj, hab txhua tug puavleej txobthuam nwg tej phoojywg.

⁵Puab txhua tug ua tsi ncaaj rua puab tej phoojywg; hab tsi muaj ib tug has lug tseeb le; puab cob puab tug nplaig kuas has lug dlaag, hab tsi tso puab tej kev txhum tseg. puab ua kev phem ib yaam taag ib yaam tuaj, hab ib leeg dlaag ib leeg. Tug TSWV has tas, nwg tsaav tuabneeg tso nwg tseg lawm.

⁷Vim le nuav tug TSWV kws muaj Fwjchim Luj kawg nkaus txhaj le has tas, “Kuv tsaav tuabneeg ua phem ua qas heev, kuv yuav ua le caag rua puab? Kuv yuav sim puab, kuv yuav muab kuv tsaav tuabneeg nchuav dlua tshab ib yaam le nchuav nyaj.

⁸Puab tug nplaig zoo ib yaam le xibxub vug kws tua tuabneeg tuag, puab has lug dlaag ntxag xwb. Txhua tug ua txuj has lug zoo rua tej tuabneeg zej zog, tabsis yog puab cuab muv tog luas xwb.

⁹Kuv yuav tsi rau txim rua puab vim tej kws puab ua ntawd los? Kuv yuav tsi ua pauj tsaav tuabneeg kws ua le nuav los? Kuv yog tug TSWV kws has le ntawd.”

¹⁰Yelemis has tas, “Kuv yuav quaj ntsuag rua tej hauv roob, hab quaj rua tej tshaav zaub, rua qhov tej ntawd qhuav taag lawm, hab tsi muaj leejtwg taug kev hlaa qhov ntawd le. Tsi nov tej tsaj nyeg ua suab saab qhov twg le. Tej noog hab tej tsaj qus los tsiv taag lawm.”

¹¹Tug TSWV has tas, “Kuv yuav ua kuas lub nroog Yeluxalees puamtsuaj taag, hab ca ua chaw rua tej maa nyob; tej nroog huv tebchaws Yudas yuav ua suabpuam tsi muaj tuabneeg nyob.”

¹²Kuv nug has tas, “Tug TSWV, vim le caag lub tebchaws nuav yuav qhuav ua suabpuam taag hab tsi muaj tuabneeg taug kev hlaa qhov ntawd le lawm? Leejtwg txhaj yuav txawj ntse hab totaub tej nuav? Koj yuav qha rua leejtwg kuas nwg moog pav rua lwm tug?”

¹³Tug TSWV teb has tas, “Tej nuav tshwmsim, tub yog vim kuv tsaav tuabneeg tso kuv tej lug kws kuv qha rua puab tseg lawm. Puab tsi noog hab tsi ua lawv le kuv tej lug.

¹⁴Tabsis puab tawv ncauj hab moog pe tej mlom Npa-aas ib yaam le puab cov yawmkoob qha puab pe.

¹⁵Yog le ntawd, koj ca le saib tej kws kuv kws yog cov Yixalayees tug Vaajtswv kws muaj Fwjchim Luj kawg nkaus yuav ua, kuv yuav muab nroj ab rua kuv tsaav tuabneeg noj hab muab tshuaj muaj taug rua puab haus.

¹⁶Kuv yuav muab puab ntab moog nrug lwm tsaav tuabneeg kws puab hab puab cov yawmkoob tsi tau paub hab tsi tau pum dlua nyob. Hab kuv yuav ca yeebncuab tuaj tawmtsaam puab moog txug nub kws muab puab rhuav puamtsuaj taag.”

¹⁷Tug TSWV kws muaj Fwjchim Luj kawg nkaus has tas, “Mej xaav saib yuav muaj dlaabtsi tshwm lug! Ca le hu cov quaspuj kws txawj nyav tuaj nyav hab hu cov quaspuj kws txawj hu nkauj quaj ntsuag tuaj hu nkauj.”

¹⁸Tej tuabneeg has tas, “Ca le kawgkag hu puab tuaj hu nkauj hab nyav rua peb noog, kuas peb kua muag ndlwg si laim huv peb qhovmuag lug ib yaam le dlej.”

¹⁹Mej noog tej suab quaj huv lub nroog Xi-oos: “Peb raug puamtsuaj lawm lauj! Peb poob ntsejmuag kawg le! Peb ca le tawm huv peb lub tebchaws moog; peb tej vaaj tse luas tub muab rhuav pob puag taag lawm.”

²⁰Kuv has tas, “Mej cov quaspuj, ca le noog tug TSWV has hab ua tuab zoo noog nwg tej lug, qha mej tej ntxhais kuas txawj nyav, hab qha mej tej phoojywg kuas txawj hu nkauj quaj ntsuag.

²¹Kev tuag tub nkaag ntawm peb tej qhovrais lug rua huv peb tej vaaj tse, hab txav peb tej mivnyuas kws taabtom ua si ntawm tej kev hab tej tub hluas kws ncig tom tej kab tej khw lawm.”

²²“Tej tuabneeg tuag pawg lug rua txhua qhov chaw, ib yaam le tej quav nyuj tom tej nraag, hab ib yaam le tej naab nplej kws cov tuabneeg hlais nplej ua poob tsi muaj leejtwg sau. Tej lug nuav yog tug TSWV kuas kuv has.”

²³Tug TSWV has tas, “Cov tuabneeg txawj ntse tsi xob khaav puab tej tswvyim, lossis cov tuabneeg muaj zug tsi xob khaav puab tug zug, lossis cov tuabneeg npluanuj tsi xob khaav puab tej nyaj txag.

²⁴Yog leejtwg xaav khaav, nwg yuavtsum khaav has tas nwg paub hab totaub kuv, rua qhov kuv txujkev hlub nyob moog ibtxhis, kuv ua ncaaj hab has tseeb xwb. Tej nuav yog tej kws hum kuv sab. Kuv yog tug TSWV kws has le ntawd.”

²⁵Tug TSWV has tas, “Tub txug lub sijhawm kws kuv yuav rau txim rua cov Iziv, cov Yudas, cov Edoos, cov Amoos, cov Mau-am hab cov tuabneeg kws nyob tom taj suabpuam kws pheej nyam txav plaubhau tuab tuab lu. Cov tuabneeg ntawd puavleej ua kevcai txav, tabsis puab tsi ua lawv le kuv tej lug cog tseg. Cov tuabneeg ntawd hab cov Yixalayees puavleej tsi ua lawv le kuv tej lug cog tseg.”