Read Hmong Njua Nkauj Quaj Ntsuag 1 Bible Online

Nkauj Quaj Ntsuag 1 - Hmong Njua bible

Nkauj Quaj Ntsuag 1

¹Lub nroog Yeluxalees kws nyob mluag mlob, yaav taag lug muaj tuabneeg nyob xauv npo; Yaav taag lug tuabneeg nplajteb qhuas nwg kawg le, nwgnuav nwg zoo ib yaam le tug puj ntsuag lawm xwb; Cov numtswv huv tej nroog puavleej poob moog ua luas qhev.

²Yeluxalees quaj ib mos kaaj ntug, kua muag ndlwg lawg ntawm nwg lub plhu; nwg tej qub phoojywg tsi muaj ib tug tuaj nplig nwg sab le; Cov tuabneeg kws koom teg nrug nwg los ntxeev sab rua nwg hab cov tuabneeg ntawd txhua tug puavleej tawmtsaam nwg.

³Cov tuabneeg Yudas yog cov qhev kws taag kev ca sab lawm, puab raug ntab tsiv moog dleb heev ntawm puab lub tebchaws, Puab moog nyob rua lwm lub tebchaws kws tsi muaj ib lub chaw yog puab tug, yeebncuab nyob puagncig puab, tsi muaj kev tsiv dlim le.

⁴Nwgnuav tsi muaj ib tug tuabneeg tuaj pehawm tug TSWV huv lub Tuamtsev nub kws dlawbhuv le lawm. Cov hluas nkauj kws hu nkauj los raug kev txomnyem ntsuav, hab cov povthawj los tsuas naj nub quaj dlhuj dlhev xwb. Tej roojvaag nroog qheb lug ca hab Xi-oos lwj sab ntsuav.

⁵Yeluxalees cov yeebncuab vaammeej; puab muaj fwjchim, puab txhaj tswj tau nwg. Tug TSWV ua rua nwg raug kev txomnyem vim tej kev txhum kws nwg ua; nwg cov mivnyuas raug luas nteg hab coj moog taag lawm.

⁶Yeluxalees lub koob meej kws nrov nchaa moo lug tsuas yog muaj yaav taag lug xwb; nwg cov thawjcoj zoo le tej muaslwj kws tshaib plaab qaug quas zig lawm xwb; puab dlha qaug quas zig ua cov tuabneeg kws caum puab tua ntej.

⁷Lub nroog Yeluxalees kws raug puamtsuaj lawm nwgnuav nyob khua sab khuav, nwg tig rov lug xaav txug lub koob meej kws thaus u nyob nchaa moo lug. Thaus nwg poob moog rua yeebncuab teg lawm, tsi muaj leejtwg kaam paab nwg le; Cov tuabneeg kws tua yeej nwg luag nwg plig thaus kws nwg poob tsaam.

⁸Yeluxalees lub koob meej tub pluj taag lawm; nwg labqaab hab raug luas thuam. Nwg quaj pus muag nti hab txaajmuag kawg le. Yeluxalees rov ua rua nwg vuabtsuab heev vim nwg txujkev txhum.

⁹Luas pum ntsoov Yeluxalees txujkev ua phem ua qas. Tabsis nwg yeej tsi nyuaj sab txug nwg lub neej hlo le. Nwg poob tsaam txaus ntshai kawg le, yeej tsi muaj leejtwg nplig tau nwg lub sab. Nwg cov yeebncuab tub yeej lawm, nwg maam le quaj thov tug TSWV hlub.

¹⁰Cov yeebncuab fuab taagnrho nwg tej nyaj huv tuabsi moog lawm. Nwg pum ntsoov puab tuaj rua huv lub Tuamtsev qhov chaw kws tug TSWV txwv tsi pub lwm tsaav tuabneeg moog rua huv le.

¹¹Nwg cov tuabneeg quaj ntsoog qeeg nrhav saib puas muaj dlaabtsi noj; puab muab puab tej nyaj moog yuav mov noj cawm puab txujsa. Lub nroog Yeluxalees tsaa suab hlo quaj has tas, “Tug TSWV, thov koj tsaa qhovmuag saib kuv, saib kuv txujkev txomnyem.”

¹²Lub nroog Yeluxalees quaj rua cov tuabneeg dlua kev has tas, “Mej ca le tsaa qhovmuag saib kuv maj!” “Yeej tsi muaj leejtwg raug txomnyem npaum le kuv raug, yog txujkev txomnyem kws tug TSWV tso lug rua kuv thaus lub sijhawm kws nwg chim.

¹³“Tug TSWV tso suavtawg sau ntuj lug kub ti nkaus rua huv kuv lub nrog cev, Nwg cuab hlua maag kuv kutaw hab chua kuas kuv qaug rua huv aav. Ces nwg tso kuv tseg hab ca kuv nyaj mob.

¹⁴“Nwg sau taagnrho kuv tej kev txhum lug ua ke hab muab paav ua ib qhoo; nwg muab tej kev txhum ntawd lug rig rua kuv cejdlaab, hab ua rua kuv tug zug ntaug nphaws vim nyaav heev. Tug TSWV muab kuv cob rua cov yeebncuab teg hab kuv tsi muaj zug tawmtsaam puab.

¹⁵“Tug TSWV luag kuv cov tubrog kws sab tawv tshaaj plawg ntawd plig kawg le, nwg tso ib paab tubrog tuaj rhuav ua rua kuv cov tub hluas raug puamtsuaj taag; nwg tsuj kuv cov tuabneeg ib yaam le tsuam txiv maab.

¹⁶“Tub yog vim le nuav kuv tej kua muag txhaj ndlwg si laim huv kuv ob lub qhovmuag lug, tsi muaj leejtwg nplig kuv sab; tsi muaj leejtwg txhawb kuv tug zug le. Yeebncuab ntaus yeej kuv, Kuv cov tuabneeg tsi tshuav ib yaam dlaabtsi le.

¹⁷“Kuv cev teg ncuv, tabsis tsi muaj leejtwg paab; Tug TSWV tau hu kuas yeebncuab tuaj txhua txuj hauv kev tuaj tawmtsaam kuv; Puab saib kuv zoo ib yaam le tej khoom kws tsi muaj nqes.

¹⁸“Tabsis tug TSWV yeej ncaaj nceeg, vim kuv tsi noog nwg lug xwb. Cov tuabneeg kws nyob txhua qhov, mej ca le noog kuv has, mej ca le tsaa qhovmuag saib kuv tej mob saib. Kuv cov tub hluas hab ntxhais hluas tub raug luas nteg coj moog taag lawm.

¹⁹“Kuv hu cov tuabneeg kws koom teg nrug kuv, tabsis puab tsi kaam paab kuv. Kuv cov povthawj hab cov thawjcoj moog nrhav zaub mov noj cawm puab txujsa, tabsis puab moog tuag taag rua ntawm tej kev huv nroog lawm.

²⁰“Tug TSWV, thov koj tsaa qhovmuag saib kuv tug mob, saib kuv tug ntsujplig kws txomnyem ntsuav lauj! Kuv lub sab puag taag rua txujkev quaj ntsuag vim kuv tej kev txhum. Muaj kev tua tuabneeg nyob txhua txujkev; huv tsev los muaj tuabneeg tuag pawg lug.

²¹“Thov noog kuv lub suab quaj; Vim tsi muaj leejtwg nplig kuv sab. Kuv cov yeebncuab zoo sab heev, vim koj tso kev puamtsuaj lug rua kuv. Thov coj nub zoo kws koj tau coglug tseg lawm lug rua kuv; hab ua kuas kuv cov yeebncuab raug kev txomnyem yaam le kuv raug.

²²“Thov koj txav txim rua puab, vim puab tej kev ua phem ua qas; Thov rau txim rua puab ib yaam le koj rau txim rua kuv, vim kuv tej kev txhum. Kuv quaj rua kuv txujkev txomnyem hab mob kuv sab kawg nkaus le.”