Read Hmong Njua Nkauj Quaj Ntsuag 2 Bible Online

Nkauj Quaj Ntsuag 2 - Hmong Njua bible

Nkauj Quaj Ntsuag 2

¹Tug TSWV txujkev chim lug khwb nkaus lub Roob Xi-oos tsaus nti; Nwg muab Xi-oos lub koob meej kws nto moo lug rhuav puamtsuaj taag. Txawm yog nwg lub Tuamtsev los nub kws nwg chim nwg yeej muab tso povtseg.

²Tug TSWV yuav rhuav txhua lub zog huv tebchaws Yudas kuas puamtsuaj taag tsi taabncuab leejtwg le; hab muab tej chaw faajxwm kws tiv thaiv lub tebchaws rhuav povtseg. Nwg ua rua lub tebchaws hab tej thawjcoj kuas raug kev txaajmuag.

³Vim tug TSWV chim heev, nwg txhaj ua rua cov Yixalayees tug zug ntaug; nwg tsi paab peb thaus cov yeebncuab tuaj tua peb. Nwg tuaj tawmtsaam peb ib yaam le suavtawg kub txhua yaam puamtsuaj taag lawm.

⁴Nwg taw rawv nwg cov xub neevnti rua peb ib yaam le taw rua tej yeebncuab; Nwg muab txhua tug kws peb nyam hab tshua tua povtseg huv tuabsi. Nwg laub nwg txujkev chim ib yaam le nplaim tawg lug rua Xi-oos tug ntxhais lub tsevntaub.

⁵Tug TSWV rhuav cov Yixalayees ib yaam le nwg rhuav tej yeebncuab ntaag; nwg muab Yeluxalees tej chaw faajxwm hab tej tsev rhuav puamtsuaj taag. Nwg coj txujkev txomnyem kws tsi txawj kawg lug rua cov Yudas.

⁶Nwg muab lub Tuamtsev kws yog qhov chaw pehawm nwg tsoo tawg taag; tug TSWV ua kuas Xi-oos tsi xob ncu qaab txug nub dlawbhuv hab nub Xanpataus. Cov vaajntxwv hab cov povthawj puavleej raug nwg txujkev chim ib yaam nkaus.

⁷Tug TSWV muab nwg lub thaaj tso tseg hab ua rua nwg lub Tuamtsev dlawbhuv ua suabpuam taag, nwg tso cai rua yeebncuab tuaj muab lub Tuamtsev tej ntsaa yeej tsoo tawg taag. Puab qw muaj yeej rua ntawm qhov chaw kws thaus peb pehawm Vaajtswv hab zoo sab.

⁸Tug TSWV yeej txav txim sab ua kuas Xi-oos tug ntxhais tug ntsaa yeej raug puamtsuaj; Nwg tub muab hlua ntsuag tuab zoo taag lawm; nwg yeej tsi cheem nwg txhais teg kws rhuav lub nroog ntawd. Tej chaw tsomfaaj hab tej ntsaa yeej, nwgnuav tub qaug taag ua ib pawg lawm.

⁹Tej roojvaag puag taag qaug rua huv aav, nwg muab tej nqaaj roojvaag tsoo tawg ua tej dlaim; cov vaajntxwv hab cov numtswv raug luas nteg coj moog lawm; txuj kevcai los tsi muaj leejtwg qha, hab tug TSWV tsi ua rua cov cev Vaajtswv lug ua ywgtoog pum le lawm.

¹⁰Yeluxalees cov tuabneeg laug nyob quastsawg huv aav tsi has lug le; puab tsuab moov aav rua sau puab taubhau hab muab ntaub tsaaj lug naav; cov ntxhais hluas nyo taubhau ti nkaus rua huv aav.

¹¹Kuv quaj heev txhaj ua rua kuv qhovmuag plooj taag; kuv tug plig ua mob ntsuav. Kuv tu sab heev ua rua kuv tug zug ntaug taag vim kuv tsaav tuabneeg txujkev puamtsuaj. Tej mivnyuas hab cov mivnyuas mog qaug tsi ncu qaab taag rua ntawm tej kev huv nroog.

¹²Cov mivnyuas ntawd quaj rua puab nam has tas, “Tshaib plaab hab nqhes dlej kawg le;” Puab qaug pawg lug rua ntawm tej kev ua rua puab tej nqaj to taag, puab sav yau zuj zug hab tuag rua ntawm puab nam lub xubndlag.

¹³Yeluxalees kws kuv hlub, kuv yuav has le caag rua koj? Yuav ua le caag kuv txhaj rov nplig tau koj lub sab? Tsi tau muaj dlua ib tug twg kws txomnyem npaum nuav. Koj txujkev puamtsuaj nyaav npaum nkaus le dlej havtxwv tsi muaj leejtwg paab tau.

¹⁴Koj cov cevlug tsi muaj dlaabtsi qha rua koj lawm, tabsis puab dlaag xwb, Puab tej lug qhuab qha yeej nthuav tsi tau koj txujkev txhum tawm. Puab ua rua koj xaav has tas, tsi taag koj hloov dlua sab tshab.

¹⁵Cov tuabneeg dlua kev ntawm lub nroog nuav, saib tsi taug koj kag le. Puab cu taubhau hab luag lub nroog Yeluxalees kws puamtsuaj taag lawm has tas, “Ntawm nuav puas yog lub nroog kws zoo nkauj heev? Ntawm nuav puas yog txujkev zoo sab ntawm lub nplajteb nuav?”

¹⁶Taagnrho koj cov yeebncuab puavleej saib tsi taug koj hab ua qhovmuag qauj leg ntxub koj kawg nkaus le. Puab zig ncauj hab ntxi muag rua koj has tas, “Peb ua rua nwg puamtsuaj lawm lauj! Nub nua yog nub kws peb tog ntsoov xaav pum heev ntaag!”

¹⁷Thaus kawg tug TSWV tau ua lawv le nwg tau npaaj tseg lawm; nwg ua rua peb puamtsuaj taag tsi taabncuab leejtwg le, lawv le nwg tub ceebtoom rua peb ua ntej ntev lug lawm. Nwg ca Peb cov yeebncuab kovyeej peb, nwg ca puab zoo sab thaus peb qaug lawm.

¹⁸Yeluxalees, ca koj tej ntsaa yeej quaj qw rua tug TSWV! Ca koj tej kua muag ndlwg tawm ib yaam le tej dlej taag nub taag mo; ca le quaj hab tu sab kuas koj tug zug ntaug.

¹⁹Koj sawv taag los sawv dlua lug quaj thov tug TSWV ib mos kaaj ntug plawg; ca le qheb koj lub sab hab thov kuas nwg taabncuab koj tej mivnyuas, tej mivnyuas tuag tshaib pawg lug ntawm tej ntug kev.

²⁰Tug TSWV, thov koj tsaa qhovmuag saib cov tuabneeg kws koj ua rua puab raug kev txomnyem ntawd lauj! Cov quaspuj taabtom noj tej mivnyuas kws puab hlub heev! Cov povthawj hab cov cevlug raug luas tua tuag rua huv lub Tuamtsev.

²¹Tej laug hab tej hluas los tuag pawg lug rua ntawm tej kev ib yaam nkaus; cov tub hluas hab ntxhais hluas raug yeebncuab muab ntaaj tua tuag taag. Nub kws koj chim, koj muab puab tua tuag pawg lug tsi taabncuab leejtwg le.

²²Koj caw kuv cov yeebncuab tuaj npaaj rooj noj rooj haus txaus ntshai heev nyob puagncig kuv. hab nub kws koj chim yeej tsi muaj leejtwg tsiv dlim le. Puab muab cov mivnyuas kws kuv tu hlub hab kuv hlub tua povtseg taag.