Read Hmong Njua Nkauj Quaj Ntsuag 3 Bible Online

Nkauj Quaj Ntsuag 3 - Hmong Njua bible

Nkauj Quaj Ntsuag 3

¹Kuv yog ib tug kws paub has tas, qhov kws Vaajtswv rau txim ntawd nyaav npaum le caag

²Nwg ntab hab coj kuv moog ti nkaus rua huv qhov kws tub tshaaj plawg hab tsaus ntuj nti.

³Nwg muab kuv ntaus taag los ntaus dlua tsi taabncuab kuv le.

⁴Nwg ua rua kuv tej nqaj tej tawv ndluag rua rug hab tsoo kuv tej pobtxhaa luv.

⁵Nwg muab kuv kaw rua huv txujkev txomnyem hab lwj sab.

⁶Nwg yuam kuv nyob huv qhov chaw tsaus ntuj nti ib yaam le cov tuabneeg kws tub tuag tau ntev lug lawm.

⁷Nwg muab saw hlau khi kuv; kuv yog tug tuabneeg raug txim. kws tsi muaj kev ca sab has tas yuav tsiv dlim le.

⁸Kuv tsaa suab hlo quaj nrov nrov thov paab, tabsis Vaajtswv tsi noog kuv tej lug thov le.

⁹Kuv moog kev qaug paaj qaug poog, nwg muab tej txag zeb lug ua ntsaa loog thaiv kuv txhua txuj hauv kev.

¹⁰Tug TSWV tog kuv kev ib yaam le tug dlais; nwg dlha tuaj tum kuv ib yaam le tug tsuv ntxhuav.

¹¹Nwg coj kuv moog rua tom ntug kev, muab kuv dlua ndluag ua tej dlaim hab tso kuv povtseg.

¹²Nwg ntaa nwg raab neev hab muab kuv cuab ua dlaim phaj rua nwg tua.

¹³Nwg tua nwg cov xub tuaj raug kuv moog tub heev rua huv kuv lub nrog cev.

¹⁴Tuabneeg luag kuv plig ib nub tsaus ntuj; puab muab kuv tso dlaaj tso luag ua si.

¹⁵Tug TSWV muab txujkev txomnyem kws ab sab heev rua kuv noj hab haus nkaus xwb.

¹⁶Nwg muab kuv lub ntsejmuag coj moog txhuam rua huv aav, hab muab kuv cov nav tsoo sau pobzeb luv taag.

¹⁷Kuv txhaj tsi ncu txug kev noj qaab nyob zoo, kev thaajyeeb hab kev zoo sab le lawm.

¹⁸Kuv txujsa nyob tsi ntev lawm, kuv txujkev ca sab rua tug TSWV tub pluj taag lawm.

¹⁹Kuv xaav txug txujkev lwj sab, kuv tsi muaj vaaj tse nyob, mas yog tej tshuaj lom kws ab kawg nkaus le.

²⁰Kuv pheej xaav txug txujkev lwj sab, hab kuv nyuaj sab kawg nkaus.

²¹Thaus kuv ncu txug tej nuav, ua rua kuv rov muaj kev ca sab.

²²Tug TSWV txujkev hlub kws ruaj khov hab nwg txujkev taabncuab yeej muaj tsi paub kawg,

²³txujkev hlub ntawm muaj txhua nub ib yaam le lub nub naj taagkig tawm tuaj.

²⁴Kuv tsuas muaj tug TSWV tuab leeg xwb, yog le ntawd, kuv txhaj ca sab rua nwg.

²⁵Tug TSWV yeej ua zoo rua txhua tug kws vaamkhom nwg.

²⁶Qhov kws zoo tshaaj, yog ua lub sab ntev tog moog txug nub kws nwg lug cawm peb,

²⁷hab qhov kws zoo tshaaj, yog peb xyum ua sab ntev thaus hluas lug.

²⁸Thaus peb raug kev txomnyem, peb yuavtsum ua sab ntev nyob ntsag tu.

²⁹Tsimnyog peb txhus caug nyo ti nkaus huv aav, yog ua le ntawd tseem yuav muaj kev ca sab.

³⁰Txawm yog raug ntaus hab raug thuam los peb yeej zoo sab txais huv tuabsi.

³¹Tug TSWV yog tug muaj kev taabncuab, hab nwg yuav tsi tso peb tseg moog ibtxhis.

³²Txawm yog nwg ua rua peb raug kev ntxhuv sab, los nwg yeej hlub peb lawv le nwg txujkev hlub kws ruaj khov.

³³Tug TSWV yeej tsi muaj pluaj sab ca peb raug kev ntxhuv sab lossis kev tsimtxom.

³⁴Thaus peb raug luas caij tsuj huv tsev lojcuj los tug TSWV yeej paub;

³⁵Tug TSWV paub thaus peb tsi ua ncaaj nceeg le nwg has;

³⁶Thaus luas txav txim tsi ncaaj huv tsev tu plaub los tug TSWV yeej paub.

³⁷Tsuas yog tej kws hum tug TSWV sab xwb txhaj le ua tau.

³⁸Kev zoo hab kev phem los ib yaam nkaus, puavleej yog tug TSWV kws muaj Fwjchim Luj kawg nkaus saamfwm txhaj le muaj.

³⁹Vim le caag peb pheej ywg thaus peb raug rau txim vim peb tej kev txhum?

⁴⁰Ca peb tshuaj saib peb lub neej hab tig rov lug cuag tug TSWV.

⁴¹Ca peb qheb peb lub sab rua Vaajtswv tug kws nyob sau ntuj hab thov has tas,

⁴²“Tug TSWV, peb tau ua txhum hab ntxeev sab rua koj lawm, koj tsi tau zaam txim rua peb le.

⁴³“Koj caum peb hab tua peb povtseg, koj txujkev chim roog koj txujkev taabncuab lawm.

⁴⁴Tauv fuab kws yog koj txujkev npautawg tuab heev, peb tej lug thov txhaj tuaj tsi txug koj.

⁴⁵Koj ua rua peb raug tuabneeg nplajteb saib zoo ib yaam le tej khoom kws tsi muaj nqes.

⁴⁶“Peb cov yeebncuab txhua tug thuam peb hab saib tsi taug peb.

⁴⁷Peb tub raug kev txomnyem hab kev puamtsuaj lug lawm; peb ua neej nyob tuav xov xeeb hab ntshai kawg le.

⁴⁸Kuv kua muag ndlwg lawg, thaus kuv pum kuv tsaav tuabneeg raug kev puamtsuaj.

⁴⁹“Kuv cov kua muag yuav ndlwg lug tsi paub tu ib yaam le tug dlej ndlwg

⁵⁰moog txug thaus tug TSWV tsaa qhovmuag saib sau ntuj tuaj pum peb lawm.

⁵¹Thaus kuv pum tej xwmtxheej lug raug cov quaspuj kws nyob huv lub nroog, mas kuv tu sab kawg.

⁵²“Cov tuabneeg kws ua yeebncuab rua kuv ca le laam ntxub kuv, hab cuab hlua maag kuv ib yaam le noog maag tsig.

⁵³Puab muab kuv pov caj rua huv ib lub qhov hab muab ib lub pobzeb npug lub ncauj qho.

⁵⁴Dlej vuv dlhau plawg sau kuv taubhau, hab kuv xaav has tas, ‘Kev tuag lug ze lawm lauj!’

⁵⁵“Tug TSWV, kuv nyob huv qaab qho, kuv quaj thov koj,

⁵⁶Hab thaus kuv thov kuas koj noog kuv tej lug thov, koj yeej nov.

⁵⁷Koj teb kuv tej lug thov hab has kuas kuv tsi xob ntshai.

⁵⁸“Tug TSWV, koj tub tuaj tso kuv dlim hab cawm tau kuv txujsa lawm.

⁵⁹Tug TSWV, koj tub pum tej kws luas ua tsi ncaaj rua kuv lawm, thov koj txav txim kuas ncaaj nceeg rua kuv rooj plaub.

⁶⁰Koj yeej paub has tas kuv cov yeebncuab ntxub kuv heev, hab tuavhuv tawmtsaam kuv le caag.

⁶¹“Tug TSWV, koj yeej paub tej kws puab tuavhuv ua phem rua kuv; hab koj yeej nov tej lug kws puab thuam kuv.

⁶²Puab has txug kuv hab tuav tswvyim ua phem rua kuv ib nub tsaus ntuj.

⁶³Puab muab kuv tso dlaaj tso luag thaus sawv ntxuv moog txug thaus tsaus ntuj.

⁶⁴“Tug TSWV, thov koj rau txim rua puab lawv le tej kws puab tau ua taag lug lawm.

⁶⁵Thov koj foom phem rua puab hab tsi xob pub kuas puab muaj kev ca sab hlo le.

⁶⁶Thov koj caum hab lawv kuas puab tsiv tawm huv lub nplajteb nuav moog taag dlu lug.”