Read Hmong Njua Nkauj Quaj Ntsuag 4 Bible Online

Nkauj Quaj Ntsuag 4 - Hmong Njua bible

Nkauj Quaj Ntsuag 4

¹Peb tej kub tsi ci lawm; tej pobzeb kws ua lub Tuamtsev pob poob pawg lug rua huv tej kev.

²Xi-oos cov tub hluas muaj nqes rua peb ib yaam le tej kub, tabsis nwgnuav puab muaj nqes ib yaam le tej laujkaub aav lawm xwb.

³Txawm yog tug maum maa los yeej pub mig rua nwg tej mivnyuas noj; Tabsis kuv tsaav tuabneeg ua nruj ua tsiv rua puab tej mivnyuas ib yaam le tej noog ntxhuav.

⁴Puab ca puab tej mivnyuas tuag tshaib tuag nqhes taag. Tej mivnyuas moog thov zaub mov noj, tabsis tsi muaj leejtwg muab ib yaam dlaabtsi rua puab le.

⁵Cov tuabneeg kws ibtxwm tau noj tej zaub mov zoo, puavleej tuag tshaib taag rua ntawm tej kev; cov tuabneeg kws ibtxwm npluanuj yuav moog fawb zaub mov ntawm tej chaw pov lamsim noj.

⁶Kuv tsaav tuabneeg raug txim nyaav tshaaj cov tuabneeg huv lub nroog Xaudoos, tuab plag ntshis xwb puab tub raug kev puamtsuaj taag rua Vaajtswv txhais teg.

⁷Peb cov numtswv huv tshaaj tej dlaus hab dlawb dlua kua mig, puab nyob cus plawg hab muaj zug khov kho, tsi muaj mob le.

⁸Nwgnuav puab pw pawg lug huv tej kev tsi muaj tuabneeg paub, puab tej ntsejmuag dlub ncab vim tub tuag lawm; puab tej tawv qhuav ib yaam le tawv ntoo qhwv nkaus puab tej txhaa.

⁹Cov tuabneeg kws tuag rua huv tshaav rog, zoo tshaaj cov kws yoo tshaib yoo nqhes tuag, vim tsi muaj mov cawm puab txujsa.

¹⁰Txujkev puamtsuaj kws lug raug kuv tsaav tuabneeg mas txaus ntshai kawg; cov quaspuj kws hlub puab tej mivnyuas los ca le muab tej mivnyuas tua noj.

¹¹Tug TSWV tso nwg txujkev chim luj kawg nkaus tawm tuaj; nwg tis suavtawg rua Xi-oos kub nyab taag rua huv aav.

¹²Cov vaajntxwv kws nyob huv nplajteb nuav lossis cov tuabneeg kws nyob thoob qaab ntuj, yeej tsi ntseeg has tas yeebncuab hab tubrog muaj cuabkaav nkaag tau Yeluxalees tej roojvaag le.

¹³Tabsis muaj tuabneeg nkaag tau lug, vim nwg cov cev Vaajtswv lug ua txhum; hab nwg cov povthawj lub txim txhaj ua rua cov tuabneeg ncaaj nceeg tuag taag lawm.

¹⁴Yeluxalees cov thawjcoj ncig moog ncig lug txhua txujkev le cov tuabneeg dligmuag; puab ib ce lu ntshaav thoob plawg tsi muaj leejtwg kaam kov puab.

¹⁵Tej tuabneeg qw rua puab has tas, “Mej cov tuabneeg kws tsi huv! Ca le tsiv moog! Tsi xob tuav kuv!” Yog le ntawd, puab txhaj tsiv ib lub tebchaws moog rua ib lub tebchaws; tsi muaj leejtwg kaam tog txais puab hlo le.

¹⁶Tug TSWV yeej tsi mob sab txug puab; nwg txhaj muab puab ntab moog nyob ua saab ua sua. Nwg yeej tsi xaam txug peb cov povthawj hab cov thawjcoj le lawm.

¹⁷Peb lub qhovmuag saib ntsoov moog txug thaus kws tsi muaj txujkev paab le lawm; peb pheej tog kev paab ntawm ib tsaav tuabneeg kws tsi muaj ib yaam dlaabtsi paab peb.

¹⁸Yeebncuab yeej saib ntsoov peb, peb tsi muaj cuabkaav tawm moog rua tom tej kev le. Peb lub sijhawm tub dlhau; nub kawg tub lug txug lawm.

¹⁹Cov tuabneeg kws caum nteg peb tseem dlha ceev tshaaj tej dlaav kws yaa sau nruab ntug. Puab caum nteg peb sau tej ncov roob; Thaus peb tsi ceevfaaj, puab nteg tau peb huv taj suabpuam,

²⁰Puab nteg tau peb lub hauvpaug txujsa, yog tug vaajntxwv kws tug TSWV xaiv; yog tug kws peb ca sab has tas yuav tiv thaiv tau peb ntawm txhua paab yeebncuab.

²¹Cov Edoos hab cov Uxes; mej ca le luag zoo sab. Kev puamtsuaj yeej yuav lug raug mej ib yaam nkaus hab; mej yuav qaug zaaj qaug zig labqaab ploog txaajmuag kawg le.

²²Xi-oos tub raug rau txim pauj nwg lub txim txhum lawm. Tug TSWV yuav tsi ca peb raug luas nteg coj moog ib zag ntxiv lawm. Tabsis Edoos, tug TSWV yuav rau txim rua koj; Nwg yuav nthuav tej kev txhum kws koj ua ntawd tawm huv tuabsi.