Read Hmong Njua Nkauj Quaj Ntsuag 5 Bible Online

Nkauj Quaj Ntsuag 5 - Hmong Njua bible

Nkauj Quaj Ntsuag 5

¹Tug TSWV, thov koj ncu txug tej xwm kws tau lug raug peb ntawd. Thov koj tsaa qhovmuag saib peb hab peb tej kev txaajmuag.

²Peb tej laj tej teb poob rua lwm tsaav tuabneeg teg lawm; cov tuabneeg txawv tebchaws tuaj nyob huv peb tej vaaj tse taag lawm.

³Cov kws yog peb txiv raug yeebncuab muab tua tuag taag huv tuabsi, hab nwgnuav tshuav cov kws yog peb nam ua puj ntsuag nyob lawm xwb.

⁴Peb yuav tau them nyaj rua tej dlej kws peb haus; Peb yuav tau muab nyaj yuav ntoo lug rua peb ua tawg rauv.

⁵Luas lawv hab nplawm peb ib yaam le nplawm tej neeg luav lossis tej ntxhuav; Peb saab kawg nkaus, tabsis luas tsi pub peb su le.

⁶Peb moog thov nraag tebchaws Iziv hab peg tebchaws Axilias, peb txhaj muaj zaub mov txaus noj yug peb txujsa.

⁷Peb cov yawmkoob yeej ua txhum tag, tabsis puab tub tuag taag lawm; peb raug kev txomnyem vim peb tau ris puab tej kev txhum.

⁸Peb raug cov tuabneeg kws tub tsimtxaj tsi npaum le cov qhev tuaj tswjfwm peb, hab tsi muaj leejtwg paab kuas peb dlim ntawm puab txhais teg.

⁹Cov tuabneeg tua tuabneeg nyob thoob plawg tom tej ntug nroog; thaus peb moog nrhav zaub mov noj, peb pheej moo tuav sav rawv moog xwb.

¹⁰Kev tshaib plaab ua rua peb ua npaws ib ce kub lug ib yaam le lub qhovtxus.

¹¹Peb cov quaspuj puavleej raug luas mos sau Roob Xi-oos; peb cov ntxhais los raug luas yuam huv cov Yudas tej zog.

¹²Peb cov thawjcoj raug luas nteg coj moog dlai cejdlaab tuag taag; tsi muaj leejtwg fwm peb cov tuabneeg laug hlo le lawm.

¹³Peb cov tub hluas raug luas yuam moog zum nplej ib yaam le tej qhev; cov mivnyuas tub raug luas yuam moog kwv ntoo nyaav heev ndlog puj poog.

¹⁴Tsi muaj cov laug tuaj nyob ntawm tej roojvaag nroog, hab tsi muaj cov hluas tuaj ntaus suab nkauj le lawm.

¹⁵Txujkev zoo sab tsiv tawm ntawm peb lub neej moog lawm; txujkev quaj ntsuag lug hloov peb tej kev seev cev zoo sab chaw.

¹⁶Txhua yaam kws peb khaav yeej tsi muaj dlaabtsi le lawm; peb ua txhum, nwgnuav peb txhaj raug kev puamtsuaj.

¹⁷Vim le ntawd peb lub sab txhaj mob lwj ntsuav hab peb pum kev tsi tseeb vim peb tej kua muag lug taag.

¹⁸Lub Roob Xi-oos nyob khua sab khuav ua suabpuam taag, hab maa lug khawb lug ntaug ua rua puamtsuaj taag.

¹⁹Tabsis tug TSWV, koj yog tug Vaajntxwv kws nyob moog ibtxhis hab yuav tswj teb kaav chaw moog txug thaus lub sijhawm kawg.

²⁰Vim le caag koj txhaj tso peb tseg ntev ua luaj le? Koj puas tseem ncu txug peb ntxiv lawm hab?

²¹Tug TSWV, thov coj peb rov qaab lug cuag koj! Thov coj peb rov qaab! Thov rov qaab txhim khu kuas peb muaj koob meej le thaus u.

²²Lossis koj yeej muab peb tso tseg moog ibtxhis le lawm? Puas yog koj txujkev chim yeej tsi muaj nub kawg le?