Read Hmong Njua Exekees 1 Bible Online

Exekees 1 - Hmong Njua bible

Exekees 1

¹Lub plaub hlis ntuj nub xab tsib xyoo peb caug, kuv yog Npuxis tug tub Exekees kws ua povthawj, kuv tau nrug cov Yudas kws raug nteg coj moog nyob ntawm tug Dlej Khenpales huv lub nroog Npanpiloos. Ntuj txawm qheb ces kuv ua ywgtoog pum Vaajtswv lug qha rua kuv.

²(Yog xyoo tsib kws Vaajntxwv Yehauyakhees raug luas nteg coj moog).

³Thaus kuv nyob huv lub nroog Npanpiloos kws nyob ntawm tug ntug Dlej Khenpales, kuv nov tug TSWV lug has rua kuv hab nwg lub fwjchim lug kaav hlo kuv.

⁴Kuv tsaa muag saib rua sau, kuv pum muaj naag xub naag cua lug saab qaumteb lug. Muaj tsaglig xub cig laim quas lag huv ib tauv fuab kws luj luj tuaj, hab lub ntuj kws nyob puagncig tauv fuab ntawd los ci ntsaa ab. Nyob rua huv cov tsaglig xub ntawd, muaj ib yaam ci zoo le tooj dlaag.

⁵Nyob rua huv cov naag xub naag cua ntawd, kuv pum plaub tug qhelunpees zoo ib yaam le tuabneeg.

⁶Tabsis ib tug qhelunpees twg muaj plaub lub ntsejmuag hab plaub phob tis.

⁷Puab tej teg taw yag quas leeg hab muaj rau zoo ib yaam le rau nyuj, puab ci ib yaam le tej tooj dlaag kws luas muab txhuam tau lawm.

⁸Dlua le ntawd, ib tug qhelunpees twg muaj plaub txhais teg zoo le teg tuabneeg, ib txhais teg nyob rua huv qaab ib phob tis. Hab cov qhelunpees ntawd cov ntsejmuag hab cov koojtis zoo le nuav:

⁹Txhua tug qhelunpees nthuav tis tuaj sis twb ua ib lub vaajvoog plaub ceg kaum. Thaus puab moog kev, puab moog ua ib paab tsi tig le.

¹⁰Cov qhelunpees ntawd txhua tug puavleej muaj plaub lub ntsejmuag kws zoo tsi sis thooj. Lub ntsejmuag kws zoo le tuabneeg nyob tom hauv ntej, lub ntsejmuag kws zoo le tsuv ntxhuav nyob saab xis, lub ntsejmuag kws zoo le tug txiv nyuj nyob saab txhumphem hab lub ntsejmuag kws zoo le tug dlaav nyob tom qaab.

¹¹Ib tug qhelunpees twg nthuav ob phob tis tsaa rua sau, tug tom qaab nthuav tis moog twb tug tom ntej phob tis. Hab muaj dlua ob phob tis dlauv npug lub cev.

¹²Txhua tug qhelunpees twg muaj plaub lub ntsejmuag rua plaub saab. Cov qhelunpees ntawd yuav moog rua saab twg los yeej moog tau lawv le puab xaav tsi taag yuav tig cev le.

¹³Nyob huv cov qhelunpees muaj dlua ib yaam zoo le teg tsau kws cig laam lug moog moog lug lug. Cov nplaim tawg ntawd yaa tej ntshuas lab pis vog ib yaam le tsaglig xub tawm tuaj.

¹⁴Cov qhelunpees ntawd txaav moog moog lug lug ceev cuag tsaglig xub laim.

¹⁵Thaus kuv tseem saib ntsoov plaub tug qhelunpees ntawd, kuv pum ib tug qhelunpees twg muaj ib lub lug nyob ntawm ib saab, cov lug ntawd puavleej chwv aav.

¹⁶Plaub lub lug ntawd zoo ib yaam nkaus, cov lug ntawd ci ib yaam le tej qai zeb muaj nqes; hab ib lub lug twg tseem muaj dlua ib lub lug kws nyob rua ntawm ceg kaum saab xis.

¹⁷Cov lug ntawd txhaj ndlog tau moog rua txhua phaab.

¹⁸Muaj qhovmuag nyob thoob plawg cov lug ntawd tej npoo.

¹⁹Thaus twg cov qhelunpees ntawd moog kev, ces cov lug ntawd txawm ndlog moog hab, yog cov qhelunpees ntawd yaa moog sab, cov lug ntawd nqaa sab hab.

²⁰Cov qhelunpees ntawd xaav moog qhov twg los puab yeej moog tau, hab cov lug ndlog lawv le cov qhelunpees ntawd, rua qhov cov qhelunpees yog cov kws tswj cov lug ntawd.

²¹Thaus twg cov qhelunpees ntawd moog kev, nreg lossis yaa sab rua sau nruab ntug, cov lug yeej moog lawv nraim le cov qhelunpees ntawd.

²²Nyob ntawm cov qhelunpees taubhau rua sau, muaj ib yaam nthuav zoo le lub tsev kheej kws muab cov qai zeb muaj nqes ci ci ua.

²³Cov qhelunpees ntawd sawv huv qaab qhov kws zoo le lub tsev kheej ntawd, puab nthuav tis ib tug twb ib tug, hab muab ob phob tis nthuav npug lub cev.

²⁴Thaus cov qhelunpees ntawd yaa, kuv nov puab ntxuaj tis nrov ib yaam le dlej havtxwv ndlaas hab ib yaam le paab tubrog coob coob moog kev, hab yaam le Vaajtswv tug kws muaj Fwjchim Luj kawg nkaus lub suab. Thaus puab tsaws, puab qhaws nkaus puab tej tis,

²⁵tabsis tseem muaj ib lub suab nrov sau qhov kws zoo le lub tsev kheej kws nyob sau cov qhelunpees ntawd taubhau tuaj.

²⁶Nyob sau qhov kws zoo le lub tsev ntawd, muaj ib qhov zoo le lub zwmtxwv kws yog muab cov qai zeb Xafiles ua hab tug kws nyob sau lub zwmtxwv ntawd muaj tug yaam ntxwv zoo le tuabneeg.

²⁷Tug yaam ntxwv ntawd ci ib yaam le tej tooj dlaag kws muab hlawv rua huv qhovcub. Muaj nplaim tawg cig laam lug puagncig tug yaam ntxwv ntawd,

²⁸hab nyob huv cov nplaim tawg ntawd, muaj ib yaam zoo le tug dluab zaaj. Qhov ntawd yog tug TSWV tug tshwjchim kws ci ntsaa ab nyob ntawm nwg xubndlag. Thaus kuv pum dlheev le ntawd, kuv nyo ntshis ti nkaus rua huv aav, ces kuv txawm nov ib lub suab